មានកត្តាអ្វីរុញច្រានឱ្យតម្លៃហាងឆេងមាសធ្លាក់ចុះ

តម្លៃមាសបានធ្លាក់ចុះជាបន្តបន្ទាប់ពី បន្ទាប់ពីបានហក់ឡើងយ៉ាងគំហុកនៅពេញមួយសប្ដាហ៍​កាលពីដើមខែសីហា ឆ្នាំ ២០២៥ ដល់ជិត ៤១០០ ដុល្លារ ក្នុងមួយតម្លឹង។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់​កម្ពុជាថ្មីថា នៅ​ពេលដែលជំនួបរបស់លោក ពូទីន ប្រធានាធិបតីរុស្ស៊ីកាលពីសប្ដាហ៍មុនជាមួយលោក ដូណាល់ ត្រាំ ប្រធានាធិបតីអាមេរិក តម្លៃហាងឆេងមាស មិនទាន់មានការទម្លាក់ខ្លួនខ្លាំងនោះទេ។ ប៉ុន្តែដល់ពេលជំនួបរបស់លោក ត្រាំ ជាមួយ លោក វ៉ូឡូឌីមៀរ ហ្សេលេនស្គី ប្រធានាធិបតីអ៊ុយក្រែន និងមេដឹកនាំបណ្ដាប្រទេសមួយចំនួននៅលើពិភពលោកតម្លៃហាងឆេងមាសចាប់ផ្ដើមមានការធ្លាក់ចុះ។

លោក ឡុង សំណាងយល់ឃើញថា៖ «ប្រហែលជាម្ដងនេះ មេដឹកនាំលើពិភពលោក គេអាចនឹងជំរុញ បង្កើនក្នុងការ​បញ្ចប់សង្គ្រាមរុស្ស៊ី-អ៊ុយក្រែន ធ្វើម៉េចបញ្ចប់ឱ្យបាន ប៉ុន្តែអ្វីដែលយើងបានឃើញការសម្រេចពីការប្រជុំពាក់ព័ន្ធជាមួយអ៊ុយក្រែន ជាមួយមេដឹកនាំបណ្ដាប្រទេសធំៗ ក៏ដូចជាលោក ដូណាល់ ត្រាំ នឹងអាចមានជំនួបត្រីភាគីជាមួយអាមេរិក ពូទីន និងលោក ហ្សេលេនស្គី នៅកន្លែងណាមួយ»។

លោក ឡុង សំណាងបញ្ជាក់ថា គេចង់បញ្ចប់សង្គ្រាម ប្រហែលជាគេអាចនឹងមានលក្ខ​ខណ្ឌ​ត្រឹមត្រូវមួយ ឬក៏លក្ខខណ្ឌ ដែលពួកគាត់នឹងអាចទទួលយក តើលក្ខខណ្ឌនោះបែប​ណា យើងក៏អត់ដឹងដែរ។

លក្ខខណ្ឌបែបណាក៏យើងអត់ទាន់ដឹងច្បាស់លាស់ថា តើតំបន់ដែល ពូទីនកំពុងកាន់កាប់ តើអ៊ុយក្រែនអាចឱ្យបានដែរឬទេ? ឬក៏អ៊ុយក្រែនមិនអាចចូលជាមួយអង្គការណាតូជារៀងរហូតចាប់ពីពេលនេះតទៅ? នេះគឺជាចំណុចមួយដែល យើងមើលឃើញថា រុស្ស៊ីតែងតែចង់បានតាំងតែពីដើមមក។ អ្វីដែលសំខាន់សួរថា ម្ចាស់ប្រទេស ដែលត្រូវកាត់ទឹកដីឱ្យរុស្ស៊ី យល់ព្រមដែរទេ?» លោក ឡុង សំណាងបញ្ជាក់បន្ថែមបែបនេះ។

ទោះយ៉ាងណា នៅក្នុងកិច្ចប្រជុំរបស់លោក ដូណាល់ ត្រាំ និងមេដឹកនាំពិភពលោក មិនទាន់លើកឡើងសេចក្ដីពិតប្រា​កដមួយថា បញ្ចប់សង្គ្រាមដោយរបៀបណានោះទេ។ លោក ឡុង សំណាង យល់ឃើញថា តម្លៃហាងឆេងមាស នឹងបន្តធ្លាក់ចុះ ប្រសិនបើមានជំនួបត្រីភាគី អាមេរិក រុស្ស៊ី និងអ៊ុយក្រែន។

គិតត្រឹមម៉ោង ៩ ព្រឹកថ្ងៃទី ២១ ខែសីហា ឆ្នាំ ២០២៥ មាសកំពុងជួញដូរនៅក្នុងតម្លៃ ៤០២៤ ដុល្លារ ក្នុងមួយតម្លឹង។ សម្រាប់ហាងឆេងមាសក្នុងស្រុកតាមបណ្ដាហាងនានានៅរាជធានីភ្នំពេញ លក់ចេញ​ក្នុងតម្លៃ ៤០២ ដុល្លារក្នុងមួយជី៕