រាយការណ៍​ពី​ខេត្តកំពង់ចាម មានករណី​ស្លាប់​បុរស​វ័យ​ក្មេង​ម្នាក់ ដោយសារកូវីដ

បុរសវ័យក្មេងម្នាក់ឈ្មោះរស់ មាស អាយុ២៨ឆ្នាំរស់នៅ ភូមិខ្វិត ឃុំតាំងក្រសាំង ស្រុកបាធាយខេត្តកំពង់ចាម បានស្លាប់បាត់បង់ជីវិត ដោយសារជំងឺកូវីដ១៩ នៅថ្ងៃទី០១ខែឧសភាឆ្នាំ២០២១នៅមន្ទីរពេទ្យខេត្តកំពង់ចាម។

បើតាមលោកវេជ្ជបណ្ឌិត គឹម​សួរ ភីរុណ ប្រធានមន្ទីរសុខាភិបាលខេត្តកំពង់ចាមបានឲ្យដឹងថា បុរសដែលស្លាប់នោះកន្លងមកធ្លាប់បានទៅសម្រាកព្យាបាលនៅមន្ទីរពេទ្យមិត្តភាពកម្ពុជាចិនព្រះកុសុមៈមួយរយៈពេល។ បន្ទាប់ពី​ត្រឡប់មកផ្ទះវិញមានអាការៈហត់ ក៏បានមកសម្រាកព្យាបាលជំងឺនៅមន្ទីរពេទ្យបង្អែកជើងព្រៃ ហើយមន្ត្រីមន្ទីរពេទ្យបង្អែកជើងព្រៃក៏បានបញ្ជូនបន្តនៅមន្ទីរពេទ្យខេត្តកំពង់ចាមនៅថ្ងៃទី២៩ខែមេសាឆ្នាំ២០២១វេលាម៉ោង៣និង៥៥នាទី ដោយមានរោគវិនិច្ឆ័យហត់ដង្ហក់។

លោក វេជ្ជបណ្ឌិត បានបន្តថា អ្នកជំងឺបានស្លាប់បាត់បង់ជីវិតនៅថ្ងៃទី០១ខែឧសភាឆ្នាំ២០២១វេលាម៉ោង៦និង៣០នាទីដោយជំងឺកូវីដ១៩ ដែលខូចតម្រង់នោមនិងរលាកសួតធ្ងន់ធ្ងរ។

គិតត្រឹមព្រឹកថ្ងៃទី០២ខែឧសភាឆ្នាំ២០២១នេះកម្ពុជា មានអ្នកស្លាប់ដោយសារជំងឺកូវីដ១៩ចំនួន១០៣នាក់ ដោយមិនរាប់បញ្ចូលករណីបុរសអាយុ២៨ឆ្នាំស្លាប់នៅខេត្តកំពង់ចាមទេ។

គួរបញ្ជាក់ថា គិតត្រឹមព្រឹកថ្ងៃទី០២ខែឧសភាឆ្នាំ២០២១នេះខេត្តកំពង់ចាមមានអ្នកឆ្លងជំងឺកូវីដ១៩ក្នុងព្រឹត្តិការណ៍សហគមន៍២០កម្ភៈចំនួ ន៩៤នាក់ជាសះស្បើយចំនួន៣៣នាក់ស្លាប់១នាក់និងកំពុងសម្រាកព្យាបាលនៅមន្ទីរពេទ្យចំនួន៦០នាក់៕

អត្ថបទ៖ សំអឿន