ព័ត៌មានជាតិ

អាជ្ញាធរឃុំអារក្សត្នោត នាំយកគ្រឿងឧបភោគបរិភោគ ជូនកងពលអន្តរាគមន៍លេខ៧ ក្នុងភូមិសាស្ត្រខេត្តព្រះវិហារ

បានផុស

១ year មុន

នៅ

ថ្ងៃអាទិត្យ ៦ កក្កដា ២០២៥

ដោយ

អាជ្ញាធរឃុំអារក្សត្នោត នៃស្រុកស្ទឹងត្រង់ រួមនឹងសប្បុរសជនបាននាំយកអំណោយជាគ្រឿងឧបភោគបរិភោគ និងថវិកាមួយចំនួនទៅប្រគល់ជូនកងពលអន្តរាគមន៍លេខ៧ ក្នុងភូមិសាស្ត្រខេត្តព្រះវិហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីជាការលើកទឹកចិត្ត និងសកម្មភាពខ្មែរជួយខ្មែរ ជាពិសេសជួយគាំទ្រកម្លាំងចិត្តដល់កងកម្លាំងកងទ័ពជួរមុខដែលយាមនៅតាមបណ្តោយព្រំដែនកម្ពុជា-ថៃ។ លោក អ៊ុន ចាន់ដា អភិបាលខេត្តកំពង់ចាម បានចាត់ឱ្យអាជ្ញាធរតាមមូលដ្ឋាន ជាក់ស្ដែងរដ្ឋបាលឃុំអារក្សត្នោត ដឹកនាំដោយ លោក រស់ វីរ៉េត មេឃុំអារក្សត្នោតរួមនឹងសប្បុរសជន នាំយកអំណោយជាស្បៀងអាហារ បន្លែត្រីសាច់ និងថវិកា ទៅប្រគល់ជូនឧបត្ថម្ភគាំទ្រដល់កងពលអន្តរាគមន៍លេខ៧ ដែលឈរនៅតំបន់ស្បូវខ្មោច ព្រំដែនកម្ពុជា-ថៃ ប្រាសាទព្រះវិហារ ខេត្តព្រះវិហារ។

លោក រស់ វីរ៉េត មេឃុំអារក្សត្នោត បានបញ្ជាក់ថា សម្ភារៈទាំងអស់នេះ បានមកពីការចូលរួមលះបង់ទឹកចិត្តរបស់បងប្អូនប្រជាពលរដ្ឋ និងអាជីវករ រស់នៅក្នុងមូលដ្ឋានឃុំអារក្សត្នោត នៃស្រុកស្ទឹងត្រង់ ក្នុងស្មារតីរួមគ្នាជួយឧបត្ថម្ភគាំទ្រលើកទឹកចិត្តដល់កងកម្លាំងកងទ័ពជួរមុខក្នុងការការពារទឹកដី។

លោកឧត្តមសេនីយ៍ទោ ដួង សំនៀង មេបញ្ជាការកងពលអន្តរាគមន៍លេខ៧ ដែលកំពុងឈរនៅតំបន់ស្បូវខ្មោច ព្រំដែនកម្ពុជា-ថៃ ប្រាសាទព្រះវិហារ ខេត្តព្រះវិហារនេះ បានថ្លែងអំណរគុណដល់រដ្ឋបាលឃុំអារក្សត្នោត នៃស្រុកស្ទឹងត្រង់ និងជាពិសេស ឯកឧត្ដម អ៊ុន ចាន់ដា អភិបាលខេត្តកំពង់ចាម ដែលតែងតែចាត់តំណាងឱ្យនាំយកជាស្បៀងអាហារមកឧបត្ថម្ភកងកម្លាំងជួរមុខជាហូហែរ ហើយក្នុងនាមជាកងកម្លាំងដែលកំពុងឈរនៅតំបន់ព្រំដែនកម្ពុជា-ថៃនេះ សូមប្តេជាចិត្ត និងអនុវត្តប្រកបដោយភាពម៉ុងម៉ាត់ និងការទទួលខុសត្រូវពេញទំហឹង ដើម្បីធានាបានទាំងស្រុងនូវសន្តិភាព ស្ថិរភាព និងសន្តិសុខស្ថិតស្ថេរយូរអង្វែង បម្រើកសាងឱកាសសម្រាប់អភិវឌ្ឍន៍ជាតិ។

សូមបញ្ជាក់ថា អំណោយជាគ្រឿងឧបភោគបរិភោគ របស់រដ្ឋបាលឃុំអារក្សត្នោត នៃស្រុកស្ទឹងត្រង់ និងសប្បុរសជនរួមមាន អង្ករ,ទឹកបរិសុទ្ធ,បន្លែ ត្រី សាច់ និងថវិកា ៨លានរៀល៕