ជំនន់ទឹកភ្លៀងអូរព្រំដែនកម្ពុជា ថៃ បានលិចច្រោះក្បាលស្ពាន និងផ្លូវវាងក្នុងស្រុកសំឡូត

ស្ពានបេឡេមួយកន្លែង បានបាក់ស្រុតម្ខាង ដោយឡែកផ្លូវវាងដែលទុកសម្រាប់ឲ្យបើកបរជាបណ្ដោះអាសន្ន ត្រូវបានទឹកជំនន់ពីអូរព្រំដែនថៃ ជន់ជោរបណ្ដាលឱ្យលិចយ៉ាងខ្លាំង ដែលនេះគឺជាជំនន់ទឹកភ្លៀងក្នុងរយៈពេលប៉ុន្មានថ្ងៃនេះ។

យោងតាមរបាយការណ៍ពីស្រុកសំឡូតបានឲ្យដឹងថា ក្រោយពីមានភ្លៀងធ្លាក់ជាប់ៗគ្នាប៉ុន្មានថ្ងៃចុងក្រោយនេះ បានធ្វើឲ្យទឹកអូរព្រំដែនកម្ពុជា ថៃ ចាប់ផ្ដើមឡើងយ៉ាងគំហុក ហើយក៏បានហូរចុះតាមអូរនានា បណ្ដាលឲ្យទឹកមានសភាពជន់ខ្លាំង។ ដោយឡែកនៅស្ពានអូរថ្ម ស្ថិតក្នុងភូមិអូរតាទៀក ឃុំតាតោក ស្រុកសំឡូត ក៏មានទឹកជំនន់ហូរកាត់ខ្លាំងផងដែរ។

គួរបញ្ជាក់ថា ស្ពានអូរថ្មដែលសាងសង់ជាប្រភេទស្ពានបេឡេ គឺបានបាក់សុទ្ធក្បាលស្ពានម្ខាងនាពេលកន្លងមក ដោយសារតែរថយន្តដឹកខ្សាច់ធំៗឆ្លងកាត់។ ក្រោយពីមានការបាក់ស្រុតរួចមក អាជ្ញាធរមូលដ្ឋានបានធ្វើផ្លូវវាងដើម្បីឲ្យប្រជាពលរដ្ឋធ្វើដំណើរជាបណ្ដោះអាសន្ន ព្រមទាំងមានការដាក់លូនៅពីក្រោមផ្លូវនោះផងដែរ។

លុះលោកព្រឹកថ្ងៃទី១១ ខែកក្កដានេះ ជំនន់ទឹកអូរបានជន់យ៉ាងខ្លាំង បណ្ដាលឱ្យលិចទាំងផ្លូវវាងថែមទៀត ដែលតម្រូវឲ្យកម្លាំងនគរបាល និងកម្លាំងយោធា ចុះជួយអន្តរាគមន៍ដល់ប្រជាពលរដ្ឋដែលធ្វើដំណើរឆ្លងកាត់ ដែលរហូតមកទល់នឹងថ្ងៃរសៀលនេះ ទឹកជំនន់ហាក់មិនទាន់ថមថយនៅឡើយទេ គឺទឹកនៅតែបន្តជន់ខ្លាំងដដែល និងបន្តហូលិចមកបែកខាងក្រោមបន្តទៀត។ ដោយឡែកសម្រាប់ស្ពានបេឡេដែលបាក់ស្រុតជាយូរមកហើយនោះ គេមិនទាន់ឃើញអាជ្ញាធរមូលដ្ឋាន ឬអង្គភាពជំនាញណាមួយចុះធ្វើការសិក្សាដើម្បីជួសជុលឡើងវិញ ឱ្យប្រជាពលរដ្ឋបានធ្វើដំណើរឆ្លងកាត់ដូចដើមនៅឡើយទេ៕

អត្ថបទ៖ សោ និយមរ័ត្ន