ជីវិតកម្សាន្ដ

តារាល្បីៗនៅថៃដេកភ័យខ្លួន ក្រោយចូលដៃជាមួយក្រុមហ៊ុនបោកប្រាស់តាមអនឡាញ

បានផុស

៦ ខែ មុន

នៅ

ថ្ងៃសុក្រ ១១ តុលា ២០២៤

ដោយ

កាលពី ថ្ងៃទី ១០ខែតុលា ឆ្នាំ ២០២៤ ព័ត៌មានដ៏កកក្រើកមួយបាននិងកំពុងតែល្បីទូទាំងប្រទេសថៃ ក្នុងពេលដែលតារាប្រុស-ស្រីល្បីៗជួរមុខបានបង្ហាញវត្តមាននៅក្នុងក្រុមហ៊ុន The iCon Group ខណៈមានជននរងគ្រោះជាច្រើនបានសម្រុកមកដាក់ពាក្យបណ្ដឹងថា ក្រុមហ៊ុននេះបោកប្រាល់លុយកាក់ពួកគេអស់រាប់លានដុល្លារ។

យោងតាមការចុះផ្សាយពីសារព៌មានក្នុងស្រុកថៃ Amarintv បានបញ្ចាក់ឲ្យដឹងថា រឿងរ៉ាវកំពុងតែកក្រើកក្នុងប្រទេសបានផ្ទុះឡើងនៅពេលដែលជនរងគ្រោះជាច្រើនសម្រុកទៅប៉ុស្ត៍ប៉ូលិស NCPO និង CCSA ដោយអះអាងថា ពួកគេត្រូវបោកបញ្ឆោតដោយក្រុមហ៊ុនល្បីមួយឲ្យធ្វើអាជីវកម្មបណ្តាញដែលមានអ្នកវិនិយោគជាច្រើនជាអតិថិជនឡុងចុងខាតដើម។ ចំណែកផលិតផលនៅសេសសល់ក៏មិនអាចលក់បានដូចការរំពឹងទុក រហូតដល់ជនរងគ្រោះឯទៀតដល់ថ្នាក់គិតខ្លី ចង់បញ្ចប់ជីវិតថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីព័ត៌មានដ៏រសើបមួយនេះកំពុងតែបែកធ្លាយក្រុមអ្នកលេងអ៊ីនធឺណេត ក៏បានបង្ហោះរូបភាពតារាល្បីៗដែលធ្លាប់ចូលរួមក្នុងកម្មវិធីនេះយ៉ាងគគ្រឹកគគ្រេងដែលរួមមានតារាប្រុស Kan Kantathavorn, Sam Yuranunt, Boy Pakorn, Dome Pakorn និង Min Pechaya ពួកគេនាពេលនេះត្រូវមហាជនជេរប្រទេចនិងរិះគន់ឥតសំចៃមាត់នៅលើបណ្តាញសង្គម។ ក្នុងពេលដែលអ្នកខ្លះត្រូវបិទបណ្ដាញសង្គមមួយរយៈដោយមិនចង់ឆ្លើយឆ្លងជាមួយអ្នកគាំទ្រចោទសួរពីបញ្ហាដែលកំពុងតែកើតឡើង។

យ៉ាងណាក៏ដោយ មិនបង្អង់យូរឡើយទំព័រ The Icon Group បានបង្ហោះរូបភាពតារា៣រូបរួមជាមួយនឹងសារបំភ្លឺថា តារាប្រុស Kan លោក Sam និង Min មិនមែនជាអ្នកដែលមានសិទ្ធិចុះហត្ថលេខាទេ នេះបើតាមវិញ្ញាបនបត្ររបស់ក្រុមហ៊ុន ហើយពួកគេក៏មិនត្រូវបានចុះបញ្ជីជាម្ចាស់ភាគហ៊ុនក្នុងក្រុមហ៊ុនតាមវិធីណាមួយឡើយ។ ពួកគេគ្រាន់តែជាជំនួយការផលិតផលទីផ្សាររបស់ក្រុមហ៊ុនតែប៉ុណ្ណោះ។

ដោយឡែកងាកទៅកាន់តារាប្រុសស្ថិតក្រោមទ្រនំប៉ុស្តិ៍លេខ៣ លោក Boy Pakorn បន្ទាប់ពីរឿងរសើបកំពុងវ័ន្តកភ្លាមៗជំនួយការលោកបានបញ្ជាក់តាមទូរសព្ធប្រាប់អ្នកកាសែតថា លោកគ្រាន់តែជាអ្នកបង្ហាញផលិតផលប៉ុណ្ណោះ។ មិនមានតួនាទីគ្រប់គ្រង នៅក្នុងក្រុមរូបតំណាងណាមួយឡើយ។ គាត់ក៏មិនត្រូវបានគេហៅថាជាចៅហ្វាយឬមានភាគហ៊ុនទេ។ និយាយឲ្យខ្លី លោកមិនទទួលបានចំណែកណាមួយពីការលក់ទេ។ ប្រសិនបើប៉ូលិសកោះហៅចូលបំភ្លឺ លោករីករាយក្នុងការសហការ ដោយបង្ហាញឯកសារកិច្ចសន្យាច្បាស់លាស់ទៅកាន់មហាជនឲ្យកាន់តែជ្រាបជាងមុន។

គួររម្លឹកដែរថា ក្រុមហ៊ុន The Icon Group បានរៀបចំកម្មវិធីពិសេសបំណាច់ឆ្នាំ២០២៣ ជាមួយព្រឹត្តិការណ៍ ICON EVOLUTION EXPO ដោយបានប្រមូលផ្តុំតារាល្បីៗជួរមុខដែលទទួលបានជោគជ័យក្នុងវិស័យសិល្បៈ និងអ្នកជំនួញអនឡាញកំពូលៗក្នុងប្រទេស ហើយព្រមទាំងទាំងបង្ហាញថវិកាលើប្រព័ន្ធផ្សព្វផ្សាយទីផ្សារជាង ៥០០លានបាត គួរឲ្យទុកចិត្តពិតប្រាកដមែន។ ព្រឹត្តិការណ៍កាលពីចុងឆ្នាំ២០២៣នោះ ក៏ត្រូវបានចាត់ទុកថាជាការប្រកាសអំណាច ការប្រមូលផ្តុំថាមពលដ៏អស្ចារ្យ និងអបអរសាទរភាពជោគជ័យនៃម៉ាកយីហោដែលបានឡើងដល់កំពូលម៉ាកអាជីវកម្មអនឡាញនៅក្នុងប្រទេសថៃផងដែរ៕