ព័ត៌មានអន្ដរជាតិ

អ៊ីស្រាអែល ប្រាប់ថា ហាម៉ាសនៅមានគ្នីគ្នា ២០ ០០០នាក់ទៀត ទោះរងខាតបង់យ៉ាងធ្ងន់ធ្ងរ

បានផុស

៨ ខែ មុន

នៅ

ថ្ងៃពុធ ២២ តុលា ២០២៥

ដោយ

Chheang

យោងតាមការចុះផ្សាយរបស់ New York Post កងកម្លាំងការពារអ៊ីស្រាអែល (IDF) បាននិយាយថា បច្ចុប្បន្នក្រុមហាម៉ាសបានកសាងកម្លាំងយោធារបស់ខ្លួនឡើងវិញ ដោយដាក់ពង្រាយក្រុមយុទ្ធជនប្រយុទ្ធប្រមាណ ២០ ០០០នាក់ និងរក្សាបាននូវអាវុធរាប់ម៉ឺនដើម រួមទាំងមីស៊ីលដែលមានសមត្ថភាពវាយប្រហារជ្រៅក្នុងទឹកដីអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីបានសម្លាប់ពួកសកម្មប្រយុទ្ធហាម៉ាសជាង ២២ ០០០នាក់ និងរុះរើហេដ្ឋារចនាសម្ព័ន្ធជាច្រើនរបស់ក្រុមក្នុងរយៈពេល២ឆ្នាំចុងក្រោយនេះក៏ដោយ IDF បានលើកឡើងថា ក្រុមហាម៉ាសនៅតែអាចបំពេញកងកម្លាំងរបស់ខ្លួន និងអះអាងការគ្រប់គ្រងឡើងវិញនៅទូទាំងតំបន់ហ្គាហ្សាស្ទ្រីប។ នេះបើយោងតាមកាសែត Times of Israel។

ចារកម្មអ៊ីស្រាអែលប៉ាន់ប្រមាណថា ក្រុមហាម៉ាសនៅតែកាន់អាវុធធុនតូចរាប់ពាន់ដើម និងគ្រាប់រ៉ុកកែតរយៈចម្ងាយខ្លីរាប់រយដើម ដោយមីស៊ីលមួយចំនួនអាចផ្លោងដល់កណ្តាលប្រទេសអ៊ីស្រាអែល។ យោធាអ៊ីស្រាអែលជឿថា បណ្តាញផ្លូវរូងក្រោមដីរបស់ក្រុមហាម៉ាសត្រឹមតែមួយភាគបួនប៉ុណ្ណោះ ត្រូវបានបំផ្លាញ ទោះបីជាខ្លួនទទូចថា បញ្ជាការសំខាន់ៗ និងកន្លែងផលិតកម្មជាច្រើនត្រូវបានកម្ចាត់ចោលក៏ដោយ។

មុនពេលសង្រ្គាម អ៊ីស្រាអែលបានប៉ាន់ប្រមាណកម្លាំងរបស់ហាម៉ាសមានប្រហែល ៣០ ០០០នាក់ ដែលបានរៀបចំជាកងវរសេនាតូចចំនួន២៤០។ ឥឡូវ IDF ពិពណ៌នាអំពីក្រុមប្រដាប់អាវុធរបស់ក្រុមនេះថាជា «កងកម្លាំងទ័ពព្រៃ» ដោយនិយាយថា យុទ្ធជនដែលត្រូវជ្រើសរើសថ្មីរបស់ហាម៉ាសខ្វះការបណ្តុះបណ្តាល និងបទពិសោធន៍ បើប្រៀបធៀបទៅនឹងកម្មាភិបាលមុនៗ។

ទោះបីជាយ៉ាងណាក៏ដោយ ក្នុងអំឡុងពេលបទឈប់បាញ់បច្ចុប្បន្ន ក្រុមយុទ្ធជនហាម៉ាសបានបង្ហាញខ្លួនឡើងវិញនៅទូទាំងតំបន់ហ្គាហ្សា ដោយពង្រឹងការគ្រប់គ្រងរបស់ពួកគេ និងគៀបសង្កត់លើជនស៊ីវិល ស្រដៀងគ្នានឹងឈុតឆាកកាលបទឈប់បាញ់កាលពីខែមករា នៅពេលដែលក្រុមសកម្មប្រយុទ្ធប្រដាប់អាវុធមួយនេះបានធ្វើព្យុហយាត្រាជាសាធារណៈ និងបង្ហាញចំណាប់ខ្មាំងជានិមិត្តរូបនៃការប្រឆាំង។

ក្រុមអ្នកវិភាគនិយាយថា ស្ថានភាពមនុស្សធម៌ដ៏អាក្រក់របស់ហ្គាហ្សាបានជួយក្រុមហាម៉ាស ទាក់ទាញអ្នកចំណូលថ្មី ដោយអ្នកខ្លះបានចូលរួមដោយអស់សង្ឃឹម ឬចង់សងសឹក។ ចំណាប់ខ្មាំងអ៊ីស្រាអែល Tal Shoham ដែលត្រូវបានដោះលែង បានរំលឹកថា អ្នកចាប់ខ្លួនគាត់ជាច្រើននាក់ធ្លាប់ជាគ្រូបង្រៀន និងជាវេជ្ជបណ្ឌិត ដោយអះអាងថា ពួកគេត្រូវបាន«លាងខួរក្បាល» ក្នុងការបម្រើក្រុមហាម៉ាស។

ខណៈដែលក្រុមហាម៉ាសកំពុងធ្វើការដើម្បីកសាងការកាន់កាប់របស់ខ្លួននៅលើតំបន់ហ្គាហ្សាឡើងវិញ ភាពមិនប្រាកដប្រជានៅតែមានថាតើខ្លួននឹងគោរពតាមលក្ខខណ្ឌបទឈប់បាញ់របស់ប្រធានាធិបតីអាមេរិក លោក ដូណាល់ ត្រាំ ដែលអំពាវនាវឲ្យក្រុមនេះរំសាយអាវុធ និងបោះបង់ការគ្រប់គ្រងទឹកដីឬយ៉ាងណា៕

ដោយ៖ ឈាង