ថៃ មិនតបតឡើយ បានត្រឹមពង្រឹងសន្តិសុខនិងបន្តឃ្លាំមើល ក្រោយមីយ៉ាន់ម៉ា ទម្លាក់គ្រាប់ចូលដីរបស់ខ្លួន

ក្រោយយន្តហោះចម្បាំងមីយ៉ាន់ម៉ា ទម្លាក់គ្រាប់បែកខ្ទាតចូលដីរបស់ខ្លួន, ប្រទេសថៃ មិនបានចាត់វិធានការបកទៅវិញឬឆ្លើយតបអ្វីឡើយ ពោលគឺបានត្រឹមប្រកាសពង្រឹងសន្តិសុខផ្ទៃក្នុងនិងបន្តតាមដានមើលសភាពការណ៍នៃសមរភូមិនៅមីយ៉ាន់ម៉ា ប៉ុណ្ណោះ។ 

តាមការផ្សាយរបស់ The Nation នៅថ្ងៃអង្គារទី២១ខែមេសាឆ្នាំ២០២៦ ក្រសួងមហាផ្ទៃថៃ បានចេញបញ្ជាបន្ទាន់ឲ្យខេត្តចំនួន៤ជាប់ព្រំដែនមីយ៉ាន់ម៉ា ដូចជា Mae Hong Son, Chiang Mai, Chiang Rai និង Tak ត្រូវមានការប្រុងប្រយ័ត្នខ្ពស់និងឃ្លាំមើលសភាពការណ៍២៤ម៉ោងលើ២៤ម៉ោង ស្របពេលសមរភូមិប្រយុទ្ធនៅប្រទេសជិតខាង កំពុងក្តៅគគុក។ 

លើសពីនេះ ក្រសួងចេញបញ្ជាឲ្យអង្គភាពពាក់ព័ន្ធទាំងឡាយត្រូវពង្រឹងវិធានការសន្តិសុខ បង្កើនការល្បាត ពិនិត្យច្រកព្រំដែន និងតាមដានបើសិនជាសង្កេតឃើញបុគ្គលសង្ស័យ ជាពិសេសជនបរទេស។

ក្រសួងចេញបទបញ្ជានេះបន្ទាប់ពីយន្តហោះចម្បាំងរបស់កងទ័ពអាកាសមីយ៉ាន់ម៉ា បានបើកការវាយប្រហារតាមអាកាសយ៉ាង​ខ្លាំងក្លា​ទៅលើមន្ទីរពេទ្យមួយកន្លែងរបស់ក្រុមឧទ្ទាមការ៉ែន (KNU)។

ក្នុងប្រតិបត្តិការនេះ យន្តហោះចម្បាំងប្រភេទ Yak-130 និង MiG-29 បានទម្លាក់គ្រាប់បែកចំនួន​៩គ្រាប់ តម្រង់ទៅលើតំបន់មន្ទីរពេទ្យ និងសហគមន៍ដែលស្ថិតក្នុងក្រុង Bue So រដ្ឋការ៉ែន ដែលមានចម្ងាយត្រឹមតែ ៥០០ម៉ែត្រប៉ុណ្ណោះពីព្រំដែនប្រទេសថៃ។

បើតាម​ Khaosod មានគ្រាប់បែកមួយគ្រាប់បានធ្លាក់​ទៅ​លើទឹកដីថៃ ត្រង់តំបន់មាត់ទន្លេ Salween ក្បែរភូមិ Mae Sam Laep ខេត្ត Mae Hong Son។ ការផ្ទុះ​នៃគ្រាប់បែក បានបង្កឲ្យ​មានភាពភ័យស្លន់ស្លោដល់ប្រជាពលរដ្ឋថៃដែលរស់នៅក្បែរនោះយ៉ាងខ្លាំង រហូតធ្វើឲ្យ​ពួកគេនាំគ្នារត់ភៀសខ្លួនដើម្បីសុវត្ថិភាព។

ភ្លាមៗនោះ កម្លាំងទាហានព្រៃ​របស់ថៃនិងអាជ្ញាធរមូលដ្ឋាន បានចុះទៅអន្តរាគមន៍ និងជួយជម្លៀសអ្នកភូមិឲ្យ​ទៅសម្រាកនៅតំបន់មានសុវត្ថិភាពក្នុងភូមិ Huai Kong Kaad ជាបណ្តោះអាសន្ន៕

អត្ថបទ៖ សុខ សុវណ្ណ