យន្តហោះចម្បាំងមីយ៉ាន់ម៉ាទម្លាក់គ្រាប់បែក ខ្ទាត​ចូលដីថៃ បង្កឲ្យ​មានការជម្លៀសខ្លួនជាបន្ទាន់

ស្ថានការណ៍នៅតាមបណ្តោយព្រំដែនថៃ និងមីយ៉ាន់ម៉ា បានប្រែជាមានភាពវឹកវរយ៉ាងខ្លាំង នា​ព្រឹក​ថ្ងៃ​ទី២០ ខែមេសា ឆ្នាំ២០២៦ នេះ នៅពេលដែលយន្តហោះចម្បាំងរបស់កងទ័ពអាកាសមីយ៉ាន់ម៉ា បានបើកការវាយប្រហារតាមអាកាសយ៉ាង​ខ្លាំងក្លា​ទៅលើមន្ទីរពេទ្យមួយកន្លែងរបស់ក្រុមឧទ្ទាមការ៉ែន (KNU)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងប្រតិបត្តិការនេះ យន្តហោះចម្បាំងប្រភេទ Yak-130 និង MiG-29 បានទម្លាក់គ្រាប់បែកចំនួន​៩គ្រាប់ តម្រង់ទៅលើតំបន់មន្ទីរពេទ្យ និងសហគមន៍ដែលស្ថិតក្នុងក្រុង Bue So រដ្ឋការ៉ែន ដែលមានចម្ងាយត្រឹមតែ ៥០០ម៉ែត្រប៉ុណ្ណោះពីព្រំដែនប្រទេសថៃ។

បើតាម​ Khaosod មានគ្រាប់បែកមួយគ្រាប់បានធ្លាក់​ទៅ​លើទឹកដីថៃ ត្រង់តំបន់មាត់ទន្លេ Salween ក្បែរភូមិ Mae Sam Laep ខេត្ត Mae Hong Son។ ការផ្ទុះ​នៃគ្រាប់បែកនេះ បានបង្កឲ្យ​មានភាពភ័យស្លន់ស្លោដល់ប្រជាពលរដ្ឋថៃដែលរស់នៅក្បែរនោះយ៉ាងខ្លាំង រហូតធ្វើឲ្យ​ពួកគេនាំគ្នារត់ភៀសខ្លួនដើម្បីសុវត្ថិភាព។ ភ្លាមៗនោះ កម្លាំងទាហានព្រៃ​របស់ថៃ និងអាជ្ញាធរមូលដ្ឋាន បានចុះទៅអន្តរាគមន៍ និងជួយជម្លៀសអ្នកភូមិឲ្យ​ទៅសម្រាកនៅតំបន់មានសុវត្ថិភាពក្នុងភូមិ Huai Kong Kaad ជាបណ្តោះអាសន្ន។

រហូតមកដល់ពេលនេះ ចំនួនអ្នករងគ្រោះ ឬការខូចខាតនៅខាងភាគីមីយ៉ាន់ម៉ានៅមិនទាន់ដឹងច្បាស់នៅឡើយទេ ប៉ុន្តែនេះមិនមែនជាលើកទីមួយឡើយ ដែលការប្រយុទ្ធគ្នារវាងកងទ័ពមីយ៉ាន់ម៉ា និងក្រុមការ៉ែន បានរាលដាលដល់ព្រំដែន។ កាលពីពេលថ្មីៗកន្លងទៅ ការវាយប្រហារតាមអាកាសបែបនេះក៏ធ្លាប់បានកើតឡើងនៅតំបន់ផ្សេងទៀតដែលទល់មុខនឹងទឹកដីថៃផងដែរ ដោយកាលណោះ​មានជនស៊ីវិលការ៉ែនដែលរងរបួសជាច្រើននាក់ ត្រូវបានបញ្ជូនឆ្លងដែនមកព្យាបាលនៅតាមមណ្ឌលសុខភាពក្នុងប្រទេសថៃ៕

ប្រែសម្រួល៖ ឈាង