ព័ត៌មានអន្ដរជាតិ

អ៊ីស្រាអែល ប្រើកម្មវិធី AI វិភាគទិន្នន័យទិញពីអាមេរិក សម្រាប់ស៊ើបការណ៍ និងវាយប្រហារគ្រប់ជម្លោះ

បានផុស

១ ខែ មុន

នៅ

ថ្ងៃចន្ទ ១១ ឧសភា ២០២៦

ដោយ

ក្រុមហ៊ុនវិភាគទិន្នន័យបច្ចេកវិទ្យា Palantir មានមូលដ្ឋាននៅសហរដ្ឋអាមេរិក បានពង្រីកតួនាទីខ្លួនក្នុងការស៊ើបការណ៍សម្ងាត់លើវិស័យការពារជាតិនិងយោធា ប្រើប្រាស់ដោយយោធាអ៊ីស្រាអែល តាមរយៈប្រព័ន្ធដំណើរការដោយបញ្ញាសិប្បនិម្មិត (AI) ដាក់ពង្រាយក្នុងតំបន់ហ្គាហ្សា លីបង់ និងប្រតិបត្តិការដែលទាក់ទងជាមួយអ៊ីរ៉ង់។ នេះបើយោងតាមរបាយការណ៍និងការវាយតម្លៃរបស់អ្នកជំនាញ រាយការណ៍ដោយទីភ្នាក់ងារសារព័ត៌មានតួកគី Anadolu ថ្ងៃទី១០ ខែឧសភា ឆ្នាំ២០២៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Palantir បានរួមបញ្ចូលឧបករណ៍ស៊ើបការណ៍សម្ងាត់ជំរុញដោយបញ្ញាសិប្បនិម្មិតកាន់តែច្រើនឡើងៗ ទៅក្នុងប្រតិបត្តិការយោធា តាមរយៈកម្មវិធី Gotham, វេទិកាបញ្ញាសិប្បនិម្មិត (AIP), Foundry និង Skykit រួមបញ្ចូលគ្នានូវការវិភាគទិន្នន័យទ្រង់ទ្រាយធំ ប្រព័ន្ធបញ្ញាសិប្បនិម្មិតប្រតិបត្តិការ និងសមត្ថភាពស៊ើបការណ៍សម្ងាត់ចល័ត។

កាលពីឆ្នាំមុន ក្រុមហ៊ុននេះបានចុះហត្ថលេខាលើកិច្ចព្រមព្រៀងតម្លៃ ១០ប៊ីលានដុល្លារជាមួយយោធាអាមេរិក ហើយក្លាយជាដៃគូសំខាន់នៅក្នុងកម្មវិធី Maven របស់មន្ទីបញ្ចកោណ ប្រើប្រាស់ AI សម្រាប់ការកំណត់អត្តសញ្ញាណគោលដៅ និងការវិភាគសមរភូមិ។

សហស្ថាបនិក Palantir គឺ លោក Alex Karp និង លោក Peter Thiel បានធ្វើកិច្ចប្រជុំក្រុមប្រឹក្សាភិបាលនៅទីក្រុង Tel Aviv ក្នុងខែមករា ឆ្នាំ ២០២៤ ជួបជាមួយប្រធានាធិបតីអ៊ីស្រាអែល លោក Isaac Herzog ឈានដល់កិច្ចព្រមព្រៀងជាមួយមន្ត្រីការពារជាតិអ៊ីស្រាអែលលើកិច្ចសហប្រតិបត្តិការជាយុទ្ធសាស្ត្រជាមួយកងទ័ពអ៊ីស្រាអែល។

ក្រោយមក ក្រុមហ៊ុននេះបានប្រកាសថា ខ្លួននឹងផ្តល់ការគាំទ្របច្ចេកវិទ្យា AI ផ្តោតលើការកំណត់គោលដៅ និងការវិភាគទិន្នន័យសម្រាប់បេសកកម្មទាក់ទងនឹងសង្គ្រាម ទោះបីជាក្រុមហ៊ុនមិនបានបង្ហាញព័ត៌មានលម្អិតនៃកិច្ចព្រមព្រៀង ឬប្រព័ន្ធពាក់ព័ន្ធក៏ដោយ។

ក្រុមហ៊ុនវិភាគទិន្នន័យបច្ចេកវិទ្យា Palantir. រូបភាព៖ Reuters

អំឡុងពេលទស្សនកិច្ចទៅកាន់ទីក្រុង Tel Aviv លោក Karp លើកឡើងពីតម្រូវការរបស់អ៊ីស្រាអែលសម្រាប់សេវាកម្មរបស់ក្រុមហ៊ុនកើនឡើង បន្ទាប់ពីថ្ងៃទី៧ ខែតុលា ឆ្នាំ ២០២៣ ដោយសំដៅទៅលើថ្ងៃដែលអ៊ីស្រាអែលចាប់ផ្តើមយុទ្ធនាការប្រល័យពូជសាសន៍លើតំបន់ហ្គាហ្សា៕

ប្រែដោយ៖ ណឺ មិនា