រញ្ជួយដី​នៅ​វ៉េណេស៊ុយអេឡា៖ ចំនួនអ្នកស្លាប់ឡើងដល់ ៩២០នាក់ និង​របួសជាង ៣ ៣៦០​នាក់

គិត​ត្រឹម​ព្រឹក​​ថ្ងៃ​សៅរ៍ ទី​២៧ ខែមិថុនា ឆ្នាំ​២០២៦ នេះ ចំនួនអ្នកស្លាប់ផ្លូវការ បានកើនឡើងដល់ ៩២០នាក់ និងអ្នករងរបួសឡើងដល់ ៣ ៣៦០នាក់ហើយ ក្រោយកើត​មាន​គ្រោះរញ្ជួយដីធំៗពីរលើកបន្តបន្ទាប់គ្នា នៅ​ក្នុង​ប្រទេស​វ៉េណេស៊ុយអេឡា កាល​ពី​ថ្ងៃពុធ។

យោងតាមការ​ផ្សាយរបស់ Anadolu ទិន្នន័យចុងក្រោយ បាន​បង្ហាញ​ថា អគារធំៗចំនួន ៣៨៣ខ្នងបានរងការខូចខាតកម្រិតធ្ងន់ ដែលធ្វើឱ្យប្រព័ន្ធហេដ្ឋារចនាសម្ព័ន្ធក្នុងតំបន់ ត្រូវជាប់​គាំងទាំងស្រុង។ គ្រោះមហន្តរាយនេះ បានធ្វើឱ្យប្រជាពលរដ្ឋចំនួន ៣ ០០៧​នាក់ត្រូវជម្លៀសខ្លួនចេញពីផ្ទះសម្បែង ហើយបច្ចុប្បន្នពួកគេ កំពុងស្នាក់នៅក្នុងជម្រកបណ្តោះអាសន្ន និងវាល​មន្ទីរពេទ្យ​ថ្មី ដែលទើបបង្កើតឡើង។ ក្រុមសង្គ្រោះបន្ទាន់ក្នុងស្រុក ដោយមានការគាំទ្រពីក្រុមស្វែងរក និងសង្គ្រោះអន្តរជាតិ កំពុងតែបន្តប្រណាំងប្រជែងនឹងពេលវេលា ដើម្បីកាយស្វែងរកអ្នករស់រានមានជីវិត ដែលនៅជាប់គាំងនៅឡើយ។

ស្ថាប័នស្រាវជ្រាវភូគព្ភសាស្ត្រអាមេរិក (USGS) បានឱ្យដឹងថា គ្រោះរញ្ជួយដីទាំងពីរលើកនេះ មានកម្លាំងខ្លាំងរហូតដល់ ៧.២រ៉ិចទ័រ និង ៧.៥រ៉ិចទ័រ ដោយបានវាយប្រហារបន្តបន្ទាប់គ្នា ក្នុងរយៈពេលត្រឹមតែ ៣៩វិនាទីប៉ុណ្ណោះ។ ចំណុចកណ្តាលនៃការរញ្ជួយដីកម្លាំង ៧.៥រ៉ិចទ័រ គឺស្ថិតនៅចម្ងាយប្រហែល ២៣គីឡូម៉ែត្រ ភាគអាគ្នេយ៍នៃទីក្រុង Yumare ក្នុងរដ្ឋ Yaracuy ខណៈដែលការរញ្ជួយដីកម្លាំង ៧.២រ៉ិចទ័រ គឺស្ថិតនៅក្បែរទីក្រុង San Felipe ក្នុងរដ្ឋដដែលនេះ៕

ប្រែសម្រួល៖ ឈាង