លោក ត្រាំ គំរាមដកទ័ពចេញពីអឺរ៉ុប បើដាណឺម៉ាក មិនព្រមប្រគល់កោះហ្គ្រីនលែនឱ្យអាមេរិក

ជាថ្មីម្ដងទៀត ប្រធានាធិបតីអាមេរិក លោក ដូណាល់ ត្រាំ បានប្រកាសចំៗនៅក្នុងកិច្ចប្រជុំ​អង្គការ​ណាតូ​ថា កោះហ្គ្រីនលែន គួរតែស្ថិតក្រោមការគ្រប់គ្រងរបស់អាមេរិក មិនមែនដាណឺម៉ាកនោះទេ ហើយ​លោកថែមទាំងព្រមានខ្លាំងៗថា លោកអាចនឹងដកកងទ័ពអាមេរិកទាំងអស់ចេញពីតំបន់អឺរ៉ុបទៀតផង ប្រសិនបើសម្ព័ន្ធមិត្តមិនព្រមតាមចិត្តលោក។

យោងតាម​សារព័ត៌មាន Global News នៅក្នុងជំនួបជាមួយប្រធានាធិបតីតួកគី លោក Recep Tayyip Erdoğan កាល​ពី​ថ្ងៃទី​៧ ខែកក្កដា ឆ្នាំ​២០២៦ លោក ដូណាល់ ត្រាំ បាននិយាយថា ដាណឺម៉ាក មិនបានចំណាយលុយជួយកោះហ្គ្រីនលែនពិតប្រាកដ​ឡើយ ហើយកោះនេះក៏គ្មានប្រយោជន៍អ្វីសម្រាប់ពួកគេដែរ។ ប្រមុខ​សេតវិមាន​រូបនេះ សង្កត់ធ្ងន់ទៀត​ថា ហ្គ្រីនលែនគឺ​​សំខាន់ណាស់សម្រាប់អាមេរិក ព្រោះបច្ចុប្បន្នមាននាវាចម្បាំងរបស់ចិន និងរុស្ស៊ី កំពុង​បរ​ចោមរោមជុំវិញនោះ ដែលជាការគំរាមកំហែងដល់សន្តិសុខជាតិ។ នៅពេលអ្នកកាសែតសួរថា តើលោកនឹងធ្វើដល់កម្រិតណាដើម្បីបានកោះនេះ លោកឆ្លើយយ៉ាងខ្លីថា «រង់​ចាំតែ​មើលទៅ» ប៉ុន្តែលោកបានបញ្ជាក់ថានឹងមិនប្រើកម្លាំងបាយឡើយ។

ភ្លាមៗនោះ នាយករដ្ឋមន្ត្រីរបស់ដាណឺម៉ាក លោកស្រី Mette Frederiksen បានចេញមុខមកតបតវិញ​ថា លោកស្រីសង្ឃឹមគ្រប់គ្នានឹងដឹងច្បាស់ថា កោះហ្គ្រីនលែនមិនមែនសម្រាប់លក់ដូរនោះទេ ហើយរឿងអាមេរិកចង់មកទិញ ឬគ្រប់គ្រងកោះនេះ គឺមិនអាចកើតឡើងជាដាច់ខាត។ ស្របពេលជាមួយគ្នានេះ រដ្ឋមន្ត្រីការបរទេសកោះហ្គ្រីនលែន លោក Mute Egede ក៏បានបង្ហោះនៅលើហ្វេសប៊ុកដែរថា អនាគតរបស់ហ្គ្រីនលែន ត្រូវតែសម្រេចដោយប្រជាជនខ្លួនឯង មិនមែនអ្នកដទៃទេ។

លោក ដូណាល់ ត្រាំ បានទទួលស្គាល់ថា រឿងចង់បានកោះហ្គ្រីនលែននេះ បានធ្វើឱ្យខូចទំនាក់ទំនងរវាងអាមេរិក និងអង្គការណាតូយ៉ាងខ្លាំង។ លោកបានរអ៊ូថា ដាណឺម៉ាកមិនព្រមស្តាប់តាមលោក ទាំងដែលអាមេរិកបានចំណាយលុយរាប់មិនអស់ ដើម្បីជួយការពារពួកគេពីរុស្ស៊ី។ ពាក់ព័ន្ធនឹង​បញ្ហា​នេះ​ដែរ លោក Marco Rubio រដ្ឋមន្ត្រីការបរទេសអាមេរិក បានបង្ហើបថា ភាគីទាំងអស់នៅតែបន្តបើកការចរចាគ្នារៀងរាល់ខែ ដើម្បីដោះស្រាយបញ្ហានេះដោយសន្តិវិធី៕

ប្រែសម្រួល៖ ឈាង