ព័ត៌មានអន្ដរជាតិ

តៃវ៉ាន់ ប្រកាសចំណាយថវិការាប់ពាន់លានដុល្លារបន្ថែមលើវិស័យការពារជាតិ ដើម្បីទប់ទល់ការគំរាមកំហែងពី ចិន

បានផុស

៣ years មុន

នៅ

ថ្ងៃព្រហស្បតិ៍ ១៦ កញ្ញា ២០២១

ដោយ

នៅថ្ងៃព្រហស្បតិ៍នេះ តៃវ៉ាន់បានប្រកាសពីគម្រោងចំណាយថវិកាបន្ថែមចំនួន ២៤០ ពាន់លានដុល្លារតៃវ៉ាន់ (ស្មើនឹង ៨.៦៩ ពាន់លានដុល្លារអាមេរិក) លើវិស័យការពារជាតិរួមទាំងមីស៊ីលថ្មីផងដែរក្នុងរយៈពេល ៥ ឆ្នាំខាងមុខទៀត ដោយព្រមានពីតម្រូវការបន្ទាន់ក្នុងការធ្វើទំនើបកម្មអាវុធ ខណៈកំពុងប្រឈមមុខនឹងការគំរាមកំហែងធ្ងន់ធ្ងរ ពីប្រទេសជិតខាងដ៏ធំរបស់ខ្លួនគឺចិន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ចប់ថវិកាដែលលើសពីផែនការយោធាឆ្នាំ ២០២២ ដែលមានចំនួន ៤៧១.៧ ពាន់លានដុល្លារតៃវ៉ាន់ នៅតែត្រូវអនុម័តដោយសភារបស់តៃវ៉ាន់ ។

ទន្ទឹមនោះព័ត៌មាននេះកើតឡើង បន្ទាប់ពីមានរបាយការណ៍កាលពីថ្ងៃពុធថា កងទ័ពអាកាសតៃវ៉ាន់បានផ្តល់ថវិកាចំនួន ៣៣ ពាន់លានដុល្លារតៃវ៉ាន់ក្នុងការធ្វើឲ្យប្រសើរឡើងនូវមូលដ្ឋានរបស់ខ្លួន ក៏ដូចជាជួសជុលផ្លូវរត់របស់យន្តហោះ និងផលិតមីស៊ីលជាដើម ។

ចំណែកក្រសួងការពារជាតិតៃវ៉ាន់បាននិយាយនៅក្នុងសេចក្តីថ្លែងការណ៍មួយ បន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍របស់ពួកគេថា “ចិនបានបន្តវិនិយោគយ៉ាងច្រើនក្នុងថវិកាការពារជាតិ ហើយកម្លាំងយោធារបស់ពួកគេបានកើនឡើងយ៉ាងឆាប់រហ័ស ហើយពួកគេក៏បានបញ្ជូនយន្តហោះ និងនាវាជាញឹកញាប់ដើម្បីលុកលុយ និងយាយីដល់ដែនសមុទ្រ និងដែនអាកាសរបស់យើង” ។

សេចក្តីថ្លែងការណ៍បានបន្ថែមថា “ប្រឈមមុខនឹងការគំរាមកំហែងយ៉ាងធ្ងន់ធ្ងរពីសត្រូវ យោធារបស់ប្រទេសនេះបានចូលរួមយ៉ាងសកម្មក្នុងការងារកសាង និងរៀបចំយោធា ហើយវាជាការបន្ទាន់ដើម្បីទទួលបានអាវុធ និងឧបករណ៍ផលិតទ្រង់ទ្រាយធំដែលមានភាពចាស់ទុំ និងឆាប់រហ័សក្នុងរយៈពេលដ៏ខ្លី” ។

ជាចុងក្រោយក្រសួងការពារជាតិបានសន្និដ្ឋានថា តៃវ៉ាន់មានគម្រោងទិញមីស៊ីល និងនាវាចម្បាំងរួមជាមួយឧបករណ៍យោធាទំនើបៗផ្សេងទៀតផងដែរ ៕