ព័ត៌មានអន្ដរជាតិ

បាត់មុខច្រើនខែ ភរិយាស្រស់ស្អាតរបស់ គីម ជុងអ៊ុន បង្ហាញមុខសាធារណៈម្សិលមិញ

បានផុស

៤ years មុន

នៅ

ថ្ងៃព្រហស្បតិ៍ ៣ កុម្ភៈ ២០២២

ដោយ

ភរិយារបស់មេដឹកនាំកូរ៉េខាងជើងលោកស្រី រី សូល ជូ (Ri Sol Ju) បានលេចមុខជាសាធារណៈលើកដំបូងកាលពីថ្ងៃពុធ ទី២ ខែកុម្ភៈនេះ បន្ទាប់ពីខានឃើញចេញមុខជាសារណៈប្រហែលជា៥ខែកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីម ជុងអ៊ុន និងភរិយា រី បានចូលរួមក្នុងពិធីសម្តែងសិល្បៈមួយនៅមហោស្រពសិល្បៈ Mansudae ក្នុងទីក្រុងព្យុងយ៉ាងដើម្បីអបអរពិធីបុណ្យចូលឆ្នាំថ្មី ប្រពៃណីចិន។ នេះបើតាមការផ្សាយរបស់ទីភ្នាក់ងារសារព័ត៌មានផ្លូវការ KCNA។

ស្ត្រីទី១កូរ៉េខាងជើងត្រូវបានគេឃើញចេញមុខជាសាធារណៈចុងក្រោយបំផុតកាលពីថ្ងៃទី៩ ខែកញ្ញា ឆ្នាំ២០២១ នៅពេលលោកស្រី និងស្វាមីធ្វើដំណើរទៅកាន់វិមាន Kumsusan Palace ដែលជាកន្លែងបញ្ចុះសពជីតា និងឪពុករបស់លោកគីម ក្នុងទិវាខួបនៃការបង្កើតប្រទេស។

«ពេលលោក គីម បង្ហាញខ្លួននៅសាលមហោស្រពជាមួយភរិយា លោកស្រី រី សូល ជូ ចំពេលតន្ត្រីចាប់ផ្តើមប្រគំដើម្បីស្វាគមន៍ ទស្សនិជនបានទះដៃអបអរសាទរ»។ KCNA បានផ្សាយ និងបន្ថែមថា គូស្វាមីភរិយាបានឡើងលើវេទិកា បន្ទាប់ពីស្វាគមន៍ដោយបានចាប់ដៃ និងថតរូបជាមួយអ្នកសម្តែង។

លោកស្រី រី ទទួលបានការចាប់អារម្មណ៍ខ្លាំងពីអន្តរជាតិ ដោយសារលោកស្រីតែងតែអមដំណើរលោក គីម ក្នុងកិច្ចការសង្គម ពាណិជ្ជកម្ម និងការងារយោធា ដែលផ្ទុយពីឪពុកគឺលោក គីម ជុងអ៉ីល ដែលកម្របង្ហាញមុខភរិយានៅទីសាធារណៈណាស់។

លោកស្រីបានបាត់មុខពីប្រព័ន្ធផ្សព្វផ្សាយរដ្ឋរយៈពេលជាងមួយឆ្នាំ មុនពេលគេឃើញចូលរួមការប្រគំតន្ត្រីមួយកាលពីខែកុម្ភៈ ឆ្នាំមុនដែលបានជំរុញឲ្យអ្នកតាមដានធ្វើការវិភាគទៅលើសុខភាព និងមានផ្ទៃពោះរបស់លោកស្រី។

សេវាស៊ើបការណ៍សម្ងាត់ជាតិរបស់កូរ៉េខាងត្បូងបានប្រាប់សមាជិកសភាថា តាមពិតទៅ លោកស្រី មិនចេញធ្វើសកម្មភាពខាងក្រៅដើម្បីការពារការឆ្លងមេរោគកូវីដ-១៩ ប៉ុន្តែក៏ជាឱកាសនៅជាមួយកូន។ គេជឿថា លោក គីម និងលោកស្រី មានកូន៣នាក់ ប៉ុន្តែកូនៗទាំងនោះកម្រលេចមុខជាសាធារណៈណាស់៕