ព័ត៌មានអន្ដរជាតិ

កូរ៉េខាងត្បូង ៖ កូរ៉េខាងជើង អាចបាញ់នុយក្លេអ៊ែរ មុនការបោះឆ្នោតពាក់កណ្ដាលអាណត្តិរបស់ អាមេរិក

បានផុស

៣ years មុន

នៅ

ថ្ងៃអង្គារ ២៣ សីហា ២០២២

ដោយ

អតីតនាយកសេវាកម្មស៊ើបការណ៍សម្ងាត់ជាតិ (NIS) របស់កូរ៉េខាងត្បូងលោក Park Jie-won បាននិយាយកាលពីថ្ងៃចន្ទថា ប្រទេសកូរ៉េខាងជើងទំនងជានឹងធ្វើការបាញ់សាកល្បងអាវុធនុយក្លេអ៊ែរ នៅមុនការបោះឆ្នោតពាក់កណ្តាលអាណត្តិរបស់សហរដ្ឋអាមេរិកនាខែវិច្ឆិកា ដើម្បីបង្ហាញពីសមត្ថភាពនុយក្លេអ៊ែររបស់ខ្លួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Park បាននិយាយប្រាប់វិទ្យុ KBS ថា “កូរ៉េខាងជើងនឹងបាញ់សាកល្បងមីស៊ីលបំពាក់ដោយក្បាលគ្រាប់ធុនតូច និងស្រាលដែលមានសមត្ថភាពអាចហោះហើរទៅកាន់សហរដ្ឋអាមេរិក ជាពិសេសគឺគំរាមកំហែងដល់រដ្ឋបាលលោក Joe Biden នៅមុនការបោះឆ្នោតពាក់កណ្តាលអាណត្តិ” ។

លោក Park ក៏បាននិយាយផងដែរថា កូរ៉េខាងជើងក៏អាចនឹងធ្វើសកម្មភាពបង្កហេតុដូចគ្នានេះក្នុងការតវ៉ាចំពោះសមយុទ្ធយោធារបស់កូរ៉េខាងត្បូង និងសហរដ្ឋអាមេរិក ដែលបានចាប់ផ្តើមកាលពីថ្ងៃចន្ទ ។

ពាក់ព័ន្ធនឹងសមយុទ្ធយោធានេះដែរ កូរ៉េខាងជើងបានរិះគន់ជាបន្តបន្ទាប់ថា វាជាការហាត់សមរបស់កូរ៉េខាងត្បូង និងអាមេរិកសម្រាប់ការឈ្លានពាន និងគំរាមកំហែងដល់ការឆ្លើយតបផ្នែកយោធារបស់ខ្លួន ។

ជាចុងក្រោយអតីតមន្ត្រីកូរ៉េខាងត្បូងរូបនេះបានបញ្ជាក់ថា កូរ៉េខាងជើងបានបញ្ចប់ការត្រៀមលក្ខណៈរួចរាល់ហើយ ហើយប្រុងជើងការដើម្បីធ្វើការបាញ់សាកល្បងនុយក្លេអ៊ែរលើកទី ៧ របស់ខ្លួននៅពេលណាក៏បាន ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ កូរ៉េខាងត្បូង-អាមេរិក ចាប់ផ្តើមសមយុទ្ធយោធា ធំបំផុតក្នុងរយៈពេល ៥ឆ្នាំ (មានវីដេអូ)