ថៃ ព្រមានព្យុះ Noru នឹងបង្កទឹកជំនន់ភ្លាមៗក្នុងខេត្តជាច្រើន ចាប់ពីថ្ងៃនេះ

ខេត្ត​ជាច្រើននៅក្នុងប្រទេសថៃ​ត្រូវ​បាន​​ព្រមាន​ពី​ទឹកជំនន់​ភ្លាមៗ​នៅ​ថ្ងៃ​ព្រហស្បតិ៍នេះ និង​ថ្ងៃ​សុក្រ ដោយសារតែ​ភ្លៀង​ធ្លាក់​ខ្លាំង​ដែល​បង្ក​ឡើង​ដោយ​ព្យុះ Noru ។

នាយកដ្ឋានឧតុនិយមថៃបានចេញការព្រមានអំពីអាកាសធាតុលើកទី ១៩ របស់ខ្លួននៅថ្ងៃព្រហស្បតិ៍នេះ ដោយបញ្ជាក់ថា ព្យុះ Noru បានមកដល់ស្រុក Kham Khuean Kaeo ខេត្ត Yasothon នៅម៉ោង ៤ ទៀបភ្លឺជាមួយនឹងល្បឿនខ្យល់បក់ ៥៥ គីឡូម៉ែត្រក្នុងមួយម៉ោង ។

ព្យុះនេះ​ក៏កំពុង​រំកិល​ទៅ​ទិស​ពាយ័ព្យ​ក្នុង​ល្បឿន ១០ គីឡូម៉ែត្រ​ក្នុង​មួយ​ម៉ោង ហើយ​ត្រូវ​បាន​គេ​រំពឹង​ថា​នឹង​ចុះ​ខ្សោយ​ទៅ​ជាខ្យល់​សម្ពាធ​ទាប​សកម្មវិញផងដែរ ។

ទន្ទឹមនោះ ក៏មានខ្យល់មូសុងនិរតីដែលមានកម្លាំងខ្លាំងនឹងបក់កាត់លើសមុទ្រ Andaman ភាគខាងត្បូង និងឈូងសមុទ្រផងដែរ ហើយនឹងនាំមកនូវភ្លៀងធ្លាក់ខ្លាំងនៅភាគខាងជើង ភាគឦសាន តំបន់កណ្តាល រួមទាំងទីក្រុងបាងកក និងតំបន់ជុំវិញ ក៏ដូចជានៅប៉ែកខាងកើត និងខាងត្បូងនៅថ្ងៃព្រហស្បតិ៍នេះ និងថ្ងៃសុក្រ ។

ស្របពេលជាមួយគ្នានេះ ក្រសួង​បាន​ណែនាំ​ដល់​ប្រជាពលរដ្ឋ​ទូទាំង​ប្រទេស​ឲ្យ​ប្រុងប្រយ័ត្ន​ចំពោះ​ជំនន់​ទឹកភ្លៀង​ដែល​អាច​បង្ក​ជាទឹកជំនន់ភ្លាមៗ ជាពិសេស​នៅតាម​បណ្តោយ​ផ្លូវទឹក​ក្បែរ​ជើងភ្នំ និង​តំបន់​ទំនាប ខណៈប្រជាពលរដ្ឋ​នៅតាម​មាត់សមុទ្រក៏​គួរតែ​ប្រុងជើងការ​ចំពោះ​ការកើនឡើង​នៃ​ទឹកសមុទ្រផងដែរ ​។

ក្រសួងក៏បានព្យាករណ៍ថា ចាប់ពីថ្ងៃព្រហស្បតិ៍នេះដល់ថ្ងៃសៅរ៍នៅសមុទ្រ Andaman ឈូងសមុទ្រខាងលើ និងខាងក្រោមនឹងមានរលកសមុទ្រកម្ពស់ពី ២-៣ ម៉ែត្រ ឬខ្ពស់ជាងនេះ នៅពេលមានផ្គររន្ទះ ហើយបានណែនាំនាវានេសាទទាំងអស់បន្តការប្រុងប្រយ័ត្ន និងកាច់ចង្កូតចេញពីតំបន់ដែលមានភ្លៀងធ្លាក់ ខណៈទូកតូចៗត្រូវបានព្រមានឲ្យនៅលើគោករហូតដល់ថ្ងៃសៅរ៍ ៕

ប្រែសម្រួលដោយ ៖ ជីវ័ន្ត

ប្រភព ៖ The Nations

ចុចអាន ៖ ថៃ ព្រមានព្យុះទីហ្វុង Noru នឹងមកដល់ល្ងាចថ្ងៃស្អែក