ថៃ ព្រមានព្យុះទីហ្វុង Noru នឹងមកដល់ល្ងាចថ្ងៃស្អែក

យោងតាមការព្យាករណ៍របស់នាយកដ្ឋានឧតុនិយមថៃបានឲ្យដឹងថា ព្យុះទីហ្វុង Noru ដែលកំពុងបង្កឲ្យមានការបាក់ដីនៅប្រទេសវៀតណាម នឹងបោកបក់ឆ្លងកាត់ប្រទេសឡាវ ហើយបន្ទាប់មកឆ្ពោះទៅកាន់ភាគឦសាននៃប្រទេសថៃក្នុងខេត្ត Ubon Ratchathani និង Amnat Charoen នៅល្ងាចថ្ងៃព្រហស្បតិ៍ ។

ក្រៅពីបោកបក់មកកាន់​តំបន់ភាគ​ឦសានរបស់ប្រទេសថៃហើយនោះ, ព្យុះ Noru ក៏នឹងបង្កការបោកបក់នៅភាគខាងជើង និង​តំបន់​ទំនាប​កណ្តាលផងដែរ ខណៈខេត្ត Ubon Ratchathani, ខេត្ត Si Saket, ខេត្ត Surin និងខេត្ត Buri Ram ត្រូវបានណែនាំឲ្យប្រុងជើងការ ក៏ដូចជាប្រឈមនឹងភ្លៀងធ្លាក់ខ្លាំងដែលនាំមកដោយព្យុះនេះ ។

ទន្ទឹមនោះ អាជ្ញាធរក៏កំពុងឲ្យមានការប្រុងប្រយ័ត្នខ្ពស់ចំពោះកម្លាំងខ្យល់បក់របស់ព្យុះទីហ្វុង Noru ដែលនឹងប្រែទៅជាព្យុះត្រូពិច មុនពេលឈានដល់ភាគឦសានប្រទេសថៃនៅថ្ងៃព្រហស្បតិ៍ ជាពិសេសព្យុះនេះនឹងធ្វើឲ្យមានមហន្តរាយកាន់តែធ្ងន់ធ្ងរថែមទៀតនៅក្នុងតំបន់ដែលប្រឈមនឹងទឹកជំនន់រួចហើយ ។

ដោយឡែកយោងតាម​គណៈបញ្ជាការ​គ្រប់គ្រងទឹក​ជាតិ​ដែល​បាន​និង​កំពុង​តាម​ដាន​ទន្លេមេគង្គបានឲ្យដឹងថា កម្រិត​ទឹក​ក្នុង​ទន្លេតាម​ព្រំដែន​អន្តរជាតិ​រំពឹងថា ​នឹង​កើនឡើង​ចាប់ពី​ថ្ងៃ​ពុធនេះ ដល់​ថ្ងៃទី​២ ខែតុលា ដោយសារ​ភ្លៀង​ធ្លាក់​ខ្លាំង​ដែលបង្កឡើង​ដោយ​ព្យុះនេះ ។

ជាចុងក្រោយមជ្ឈមណ្ឌលក៏បានជូនដំណឹងដល់ប្រជាពលរដ្ឋរស់នៅតាមច្រាំងទន្លេក្នុងខេត្ត Nakhon Phanom, ខេត្ត Mukdahan, ខេត្ត Amnat Charoen និងខេត្ត Ubon Ratchathani ឲ្យត្រៀមខ្លួនសម្រាប់ផលប៉ះពាល់ពីកម្ពស់ទឹកដែលហក់ឡើងខ្លាំងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ព្យុះទីហ្វុង Noru បណ្តាលឲ្យបាក់ដី និងបង្កការបំផ្លិចបំផ្លាញនៅ វៀតណាម