ឆេះទូកដ នៅឥណ្ឌូណេស៊ី ស្លាប់មនុស្ស ១៣នាក់

មនុស្សយ៉ាងតិច១៣នាក់បានស្លាប់ បន្ទាប់ពីទូកដ ដែលផ្ទុកមនុស្សរាប់រយនាក់ ត្រូវអគ្គិភ័យឆាបឆេះនៅភាគខាងកើតប្រទេសឥណ្ឌូណេស៊ី​ កាលពីថ្ងៃចន្ទទី២៤ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូកដ KM Express Cantika 77 បានផ្ទុះឆេះនៅជិតឆ្នេរនៃកោះ Timor ក្នុងខេត្ត East Nusa Tenggara ដោយអ្នកដំណើរនាំគ្នាលោតចុះពីទូក។

លោក Isyak Nuka ប្រធានទីភ្នាក់ងារដឹកជញ្ជូនខេត្ត East Nusa Tenggara បានប្រាប់ AFP ថា ប្រតិបត្តិការស្វែងរក និងជួយសង្គ្រោះ បានសង្គ្រោះមនុស្សចំនួន ២៤១ នាក់នៅរស់ ក្នុងចំណោមអ្នកដំណើរ និងនាវិក ២៥៤នាក់។

លោក Nuka និយាយថា “មនុស្សចំនួន១៣នាក់បានស្លាប់។ មនុស្ស ២៤១នាក់ផ្សេងទៀតត្រូវបានជម្លៀសចេញ”។ យ៉ាងណាក្តី លោកមិនបញ្ជាក់ពីមូលហេតុនៃការឆាបឆេះនេះទេ។

ផ្នែកខាងលើនៃ​ទូក ​បានឆាប​ឆេះ ខណៈ​ធ្វើដំណើរចេញ​ពី​ទីរួមខេត្ត Kupang ទៅកាន់​ក្រុង Kalabahi នៅលើ​កោះ Alor។

អាជ្ញាធរ​ បាន​បញ្ជូន​ទូក​សង្គ្រោះ​ចំនួន​បី​គ្រឿង ហើយ​អ្នក​នេសាទ​ក្នុង​តំបន់​បាន បញ្ចេញទូក​រៀងៗ​ខ្លួន​ ដើម្បី​ជួយដល់​កិច្ចប្រឹងប្រែង​សង្គ្រោះ​។

គួរបញ្ជាក់ថា ឧបទ្ទវហេតុដែនទឹក តែងតែកើតឡើងនៅក្នុងប្រទេសអាស៊ីអាគ្នេយ៍ដែលមានកោះប្រហែល ១៧ ០០០ មួយនេះ ដោយសារតែស្តង់ដារសុវត្ថិភាព មានភាពធូររលុង។

ក្នុងឆ្នាំ២០១៨ មនុស្សជាង១៥០នាក់ បានលង់ទឹកស្លាប់ នៅពេលស្រឡាងមួយគ្រឿង បានលិចនៅក្នុងបឹងមួយ លើកោះស៊ូម៉ាត្រា៕

ប្រែសម្រួល៖ Vann Vann

ប្រភព៖ CNA

ចុចអាន៖ ហេតុការណ៍លិចស្រឡាង និងទូកដ សម្លាប់មនុស្សច្រើនបំផុត ក្នុងប្រវត្តិសាស្រ្តពិភពលោក