ប្រជាជនអាមេរិកភាគច្រើនយល់ឃើញថា សង្គ្រាមអ៊ីរ៉ាក់ គឺជា កំហុស

ពីរទសវត្សរ៍ បន្ទាប់ពីសហរដ្ឋអាមេរិកវាយលុកអ៊ីរ៉ាក់ ប្រជាជនអាមេរិកភាគច្រើនយល់ថាសង្រ្គាមនោះគឺជាកំហុស។ នេះបើយោងតាមការស្ទង់មតិរបស់ Axios/Ipsos ដែលចេញផ្សាយកាលពីសប្តាហ៍មុន។

ថ្វីបើក្នុងឆ្នាំ២០០៣ ជនជាតិអាមេរិកពីរភាគបី បានយល់ព្រមលើសកម្មភាពយោធានោះក៏ដោយ ប៉ុន្តែបច្ចុប្បន្ន ប្រជាជន៦១% ជឿថា វាគឺជាការសម្រេចចិត្តខុស។

ពេលដែលការលុកលុយរបស់សហរដ្ឋអាមេរិកក្នុងប្រទេសអ៊ីរ៉ាក់ ចាប់ផ្តើមនៅថ្ងៃទី២០ខែមីនាឆ្នាំ២០០៣ មានអ្នកឆ្លើយតបទៅនឹងការស្ទង់មតិរបស់ Pew ត្រឹមតែ២៦%ប៉ុណ្ណោះ ដែលប្រឆាំងនឹងសកម្មភាពយោធាដើម្បីផ្តួលរំលំរដ្ឋាភិបាលរបស់លោក សាដាមហ៊ូសេន។

បើយោងតាមការស្ទង់មតិរបស់ Ipsos ដែលធ្វើឡើងកាលពីសប្តាហ៍មុនក្នុងចំណោមជនជាតិអាមេរិកអាយុលើស១៨ឆ្នាំបានបង្ហាញថា ភាគច្រើននៃជនជាតិអាមេរិក (៦៧%) មិនជឿថា សង្រ្គាមនៅអ៊ីរ៉ាក់ ធ្វើឲ្យសហរដ្ឋអាមេរិកកាន់តែមានសុវត្ថិភាពនោះទេ។

ទោះបីជាយ៉ាងណាក៏ដោយ ប្រជាជនអាមេរិកប្រហែលបីភាគបួន និយាយថា ពួកគេចង់ឲ្យសហរដ្ឋអាមេរិកនៅតែជាមេដឹកនាំពិភពលោក។

ពីដំបូងឡើយ មនុស្សភាគច្រើនបានគាំទ្រឲ្យធ្វើសង្គ្រាមដោយសារតែការអះអាងមិនពិតរបស់អតីតរដ្ឋបាលរបស់លោកប្រធានាធិបតី George W. Bush និងប្រព័ន្ធផ្សព្វផ្សាយ អំពីអាវុធប្រល័យលោករបស់អ៊ីរ៉ាក់។

នៅទីបំផុត ការលុកលុយ និងការកាន់កាប់ជាបន្តបន្ទាប់លើប្រទេសអ៊ីរ៉ាក់ បានបណ្តាលឲ្យជនស៊ីវិលរហូតដល់ទៅ២១០០០០នាក់ បាត់បង់ជីវិត៕

ប្រែសម្រួល៖ Vann Vann

ប្រភព៖ RT

ចុចអាន៖ សពលោក សាដាម ហ៊ូសេន ត្រូវគេគាស់ចេញពីផ្នូរ យកទៅកន្លែងសម្ងាត់ អាថ៌កំបាំងមកដល់សព្វថ្ងៃ