សពលោក សាដាម ហ៊ូសេន​ ត្រូវគេគាស់ចេញពីផ្នូរ យកទៅកន្លែងសម្ងាត់ អាថ៌កំបាំងមកដល់សព្វថ្ងៃ (មានវីដេអូ)

អតីតនាយករដ្ឋមន្ត្រីអ៊ីរ៉ាក់លោក Mustafa al-Kadhimi បានអះអាងថា សាកសពរបស់ប្រធានាធិបតីអ៊ីរ៉ាក់លោក សាដាម ហ៊ូសេន ត្រូវបានទម្លាក់ចោលនៅជិតផ្ទះអតីតនាយករដ្ឋមន្ត្រីក្នុងទីក្រុង បាកដាដ បន្ទាប់ពីការប្រហារជីវិតក្នុងឆ្នាំ២០០៦។

ក្នុងបទសម្ភាសជាមួយកាសែតអារ៉ាប់ Asharq Al-Awsat កាលពីចុងសប្តាហ៍ លោក al-Kadhimi បានបញ្ជាក់ថា សាកសពរបស់លោក សាដាម ត្រូវបានទុកចោលនៅក្នុងតំបន់មួយចន្លោះផ្ទះរបស់គាត់ និងផ្ទះរបស់លោក Nouri al-Maliki ដែលជានាយករដ្ឋមន្ត្រីនៅពេលនោះ ក្នុងតំបន់បៃតង របស់ទីក្រុង។

ការ​អត្ថាធិប្បាយ​នេះ ​កើត​ឡើង​បន្ទាប់​ពី​លោក al-Kadhimi ត្រូវ​បាន​គេ​សួរ​ថា តើ​លោក​បាន​ឃើញលោក ​សាដាម ​ប៉ុន្មាន​ដង?

អតីតនាយករដ្ឋមន្ត្រីរូបនេះបានពន្យល់ថា គាត់បានឃើញ សាដាម លើកដំបូងនៅក្នុងសវនាការតុលាការ។ ទោះ​​យ៉ាង​ណា លោក al-Kadhimi បានឃើញលោក សាដាម លើក​ទី​ពីរ​និងជាលើកចុងក្រោយនៅពេល​ប្រហារ​ជីវិត។

លោក al-Kadhimi បានបង្ហាញនៅក្នុងបទសម្ភាសនោះថា “ខ្ញុំមិនយល់ស្របចំពោះទង្វើនៃការបោះចោលសាកសពរបស់គាត់នៅក្បែរផ្ទះរបស់គាត់ទេ ប៉ុន្តែខ្ញុំបានឃើញឆ្មាំមួយក្រុម ហើយខ្ញុំបានស្នើសុំឲ្យពួកគេនៅឲ្យឆ្ងាយពីសាកសព ដើម្បីគោរពដល់អ្នកស្លាប់”។

លោក al-Kadhimi ​បន្ត​ថា “មែនហើយ សាកសព​របស់​សាដាម ​ត្រូវ​បានគេយក​មក​ក្រៅ​ផ្ទះ​របស់ al-Maliki។ លោក Al-Maliki បានបញ្ជាឲ្យប្រគល់សពទៅក្រុមនិកាយរបស់កុលសម្ព័ន្ធ al-Nada ដែលជាកុលសម្ព័ន្ធរបស់លោក សាដាម ដូច្នេះពួកគេអាចយកសពចេញពីតំបន់បៃតងបាន”។

សពលោក សាដាម ត្រូវ​បានបញ្ចុះនៅទីក្រុង Tikrit។ ក្រោយឆ្នាំ២០១២ នៅពេលតំបន់នេះ ស្ថិតក្រោមការគ្រប់គ្រងរបស់ក្រុម ISIS, សពត្រូវបានគាស់និងយកទៅទីតាំងសម្ងាត់ ដែលគ្មាននរណាដឹងសោះ រហូតមកដល់សព្វថ្ងៃនេះ។ ផ្នូរ​របស់​កូនៗ​គាត់ ​ក៏​ត្រូវ​បាន​គេ​វាយ​កម្ទេច​ដែរ។

គួរបញ្ជាក់ថា ក្នុងឆ្នាំ២០០៣ កងកម្លាំងចម្រុះដឹកនាំដោយសហរដ្ឋអាមេរិក បានផ្តួលរំលំរបបរបស់លោកសាដាម ដោយអះអាងថា ប្រធានាធិបតីអ៊ីរ៉ាក់ មានកាន់កាប់អាវុធប្រល័យលោក និងរក្សាទំនាក់ទំនងជាមួយក្រុមអាល់កៃដា។

បន្ទាប់​ពី​ត្រូវ​បាន​រក​ឃើញ​ថា​មាន​ទោស​ឧក្រិដ្ឋកម្ម​ប្រឆាំង​នឹង​មនុស្សជាតិ លោកសាដាម​ត្រូវ​បាន​គេ​ព្យួរ​ក ​នៅ​ព្រឹក​ព្រលឹម​ថ្ងៃ​ទី៣០ខែ​ធ្នូ ឆ្នាំ២០០៦៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Aljazeera

ចុចអាន៖ ទីបំផុត ទាហានអាមេរិក ទម្លាយខ្ទេច អំពីដំណើររឿង ចុះចាប់លោក សាដាម ហ៊ូសេន ដល់រូងក្រោមដី