ដឹងហើយ រយៈចម្ងាយហោះហើររបស់មីស៊ីលដែល កូរ៉េខាងជើង បាញ់ព្រឹកមិញ

អគ្គសេនាធិការចម្រុះរបស់កូរ៉េខាងត្បូង (JCS) បានប្រកាសនៅថ្ងៃព្រហស្បតិ៍នេះថា កាំជ្រួចមីស៊ីលដែលកូរ៉េខាងជើង បាញ់ឆ្ពោះទៅទិសខាងកើតក្បែរទីក្រុងព្យុងយ៉ាង បានហោះហើយក្នុងរយៈចម្ងាយប្រហែល ១,០០០ គីឡូម៉ែត្រ ។

ទោះយ៉ាងណា អគ្គសេនាធិការចម្រុះរបស់កូរ៉េខាងត្បូង (JCS) មិន​បាន​បង្ហាញ​ពី​រយៈកម្ពស់​របស់មីស៊ីលនេះ​នោះ​ទេ ដោយគ្រាន់តែបញ្ជាក់ថា មីស៊ីលរបស់កូរ៉េខាងជើង គឺ​ត្រូវ​បាន​បាញ់​ចេញពីទីតាំងក្នុងដី ហើយ​នៅ​មុំដ៏​ខ្ពស់​មួយ ។

ទន្ទឹមនោះ រដ្ឋមន្ត្រីការពារជាតិជប៉ុន លោក Hamada Yasukazu បាននិយាយថា មីស៊ីលដែលកូរ៉េខាងជើងបាញ់នៅព្រឹកព្រលឹមថ្ងៃព្រហស្បតិ៍នេះ គឺជាមីស៊ីលផ្លោងអន្តរទ្វីបប្រភេទ ICBM ប៉ុន្តែមិនទាន់មានព័ត៌មានណាមួយបង្ហាញថា មីស៊ីលបានធ្លាក់នៅលើទឹកដីរបស់ប្រទេសជប៉ុន ឬចូលទៅក្នុងតំបន់សេដ្ឋកិច្ចផ្តាច់មុខរបស់ខ្លួននោះទេ ។

គួរបញ្ជាក់ថា នេះគឺជាការបាញ់បង្ហោះមីស៊ីលផ្លោងទី ៩ ហើយរបស់កូរ៉េខាងជើង ចាប់តាំងពីដើមឆ្នាំ ២០២៣ មក ខណៈកាលពីឆ្នាំមុន កូរ៉េខាងជើងបានបញ្ចប់ការសាកល្បងមីស៊ីលផ្លោងចំនួន ៣៧ គ្រាប់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង បាញ់មីស៊ីល បង្កឲ្យមានការជម្លៀសមនុស្សលើកោះ ហុកកៃដូ