ថ្ងៃនេះ ខេត្តភាគកណ្ដាល ថៃ រៀបចំការបោះឆ្នោតសកលឡើងវិញ

គណៈកម្មាធិការរៀបចំការបោះឆ្នោតថៃ (EC) បានប្រកាសថា ការិយាល័យបោះឆ្នោតលេខ១០ ក្នុងមណ្ឌលបោះឆ្នោតលេខ១ នៃខេត្ត Nakhon Pathom ភាគកណ្ដាលប្រទេសថៃ នឹងរៀបចំការបោះឆ្នោតសកលឡើងវិញនៅថ្ងៃអាទិត្យ ទី២១ ខែឧសភានេះ បន្ទាប់ពីការបោះឆ្នោតកាលពីថ្ងៃទី១៤ ខែឧសភាកន្លងទៅ ត្រូវបានរំខានដោយព្យុះផ្គររន្ទះ ។

EC បានប្រកាសលុបចោលការបោះឆ្នោតនៅទីនោះនៅវេលាម៉ោង ៤ និង ៤៥ នាទីរសៀលថ្ងៃទី១៤ ខែឧសភា បន្ទាប់ពីមានផ្គររន្ទះ និងខ្យល់កន្ត្រាក់បានបំផ្លាញតង់ការិយាល័យបោះឆ្នោត ដែលមានទីតាំងនៅការិយាល័យរដ្ឋបាលឃុំ Bang Khaem ក្នុងស្រុក Muang ស្របពេលដែលអ្នកបោះឆ្នោតមួយចំនួន មិនទាន់បានទៅបោះឆ្នោតនោះទេ នៅពេលដែលការបោះឆ្នោតត្រូវបានបិទ ។

ប្រធាន EC លោក Itthiporn Boonprakong បាននិយាយថា ការិយាល័យបោះឆ្នោតនោះ មានអ្នកបោះឆ្នោតសរុប ៩៤៣ នាក់ ប៉ុន្តែក៏មានប្រជាពលរដ្ឋមួយចំនួន បានទៅបោះឆ្នោតរួចហើយផងដែរនៅពេលព្រឹក ពោលមុនពេលត្រូវបានរំខានដោយព្យុះផ្គររន្ទះ ។

លោកបានបន្ថែមថា ប៉ុន្តែទោះជាយ៉ាងណា ការិយាល័យបោះឆ្នោតខេត្ត Nakhon Pathom បានអញ្ជើញអ្នកបោះឆ្នោតទាំងអស់ឲ្យទៅបោះឆ្នោតម្តងទៀតនៅការិយាល័យបោះឆ្នោតដដែលនៅថ្ងៃទី២១ ខែឧសភានេះ ចាប់ពីម៉ោង ៨ ព្រឹកដល់ម៉ោង ៥ ល្ងាច ។

គួរបញ្ជាក់ថា នៅក្នុងការបោះឆ្នោតថ្ងៃទី១៤ ខែឧសភាកន្លងមកទៅ បេក្ខជនមកពីគណបក្សឆាតថៃផាតាណា (CTPP) បានឈ្នះក្នុងមណ្ឌលបោះឆ្នោតចំនួន ៣ ក្នុងចំណោមណ្ឌលចំនួន ៦ របស់ខេត្ត Nakhon Pathom ខណៈដែលគណបក្សចលនាឆ្ពោះទៅមុខ (MFP) បានឈ្នះនៅក្នុងមណ្ឌលទី៤  និងទី៥ ហើយគណបក្សថៃរួបរួមជាតិ (UTN) របស់លោក ប្រាយុទ្ធ បានឈ្នះនៅក្នុងមណ្ឌលទី២ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand