រដ្ឋមន្ត្រីការបរទេស ថៃ បញ្ជាក់ពីសុខភាពលោកស្រី អ៊ុងសាន ស៊ូជី ដែលកំពុងជាប់ឃុំ

រដ្ឋមន្ត្រីការបរទេសថៃលោក Don Pramudwinai បាននិយាយថា កាលពីពេលថ្មីៗនេះ លោកបានជួបជាមួយអតីតមេដឹកនាំជាប់ឆ្នោតមីយ៉ាន់ម៉ាដែលត្រូវបណ្ដេញចេញពីតំណែងគឺលោកស្រី អ៊ុងសាន ស៊ូជី ហើយក៏បានបញ្ជាក់ពីបញ្ហាសុខភាពរបស់លោកស្រីផងដែរ ។

លោក Don Pramudwinai ដែលអញ្ជើញទៅជួបម្ចាស់ជ័យលាភី​ណូបែលសន្តិភាពនៅរដ្ឋធានីណៃពិដោរបស់មីយ៉ាន់ម៉ាកាលពីថ្ងៃអាទិត្យកន្លងទៅបានបញ្ជក់ថា លោកស្រី អ៊ុងសាន ស៊ូជី ដែលកំពុងត្រូវបានឃុំខ្លួនដោយយោធា ឥឡូវនេះគឺមានសុខភាពល្អជាធម្មតាទេ ។

អ្នកនាំពាក្យក្រសួងការបរទេសថៃរូបនេះបាននិយាយទៀតថា នៅក្នុងជំនួបនោះលោកស្រី អ៊ុងសាន ស៊ូជី បាននិយាយគាំទ្រឲ្យមានកិច្ចសន្ទនា ហើយក៏បានសម្តែងការព្រួយបារម្ភអំពីចំនួនអ្នកស្លាប់ក្នុងរដ្ឋប្រហារដែលបានកើតឡើងលើប្រជាជន និងសេដ្ឋកិច្ចមីយ៉ាន់ម៉ាក្នុងរយៈពេល ២ ឆ្នាំចុងក្រោយនេះផងដែរ ។

គួរបញ្ជាក់ថា លោក Don Pramudwinai បានរាយការណ៍ពីដំណើរទស្សនកិច្ចនេះនៅក្នុងកិច្ចប្រជុំរដ្ឋមន្ត្រីការបរទេសមកពីសមាគមប្រជាជាតិអាស៊ីអាគ្នេយ៍ (អាស៊ាន) ដែលធ្វើឡើងនៅរដ្ឋធានីហ្សាកាតា ប្រទេសឥណ្ឌូណេស៊ីកាលពីថ្ងៃពុធ ហើយនេះ​ក៏ជា​លើក​ទី​មួយ​ផងដែរ ​ដែល​មន្ត្រី​ការបរទេស​ថៃទទួល​បាន​ការ​បំពេញ​ទស្សនកិច្ច​ជាមួយ​លោកស្រី អ៊ុងសាន ស៊ូជី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អាស៊ាន នៅតែរកផ្លូវចេញពីវិបត្តិមីយ៉ាន់ម៉ា មិនឃើញ