អាស៊ាន នៅតែរកផ្លូវចេញពីវិបត្តិមីយ៉ាន់ម៉ា មិនឃើញ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ បានចង្អុលបង្ហាញថា អាស៊ាននឹងបន្តកំណត់គោលដៅអនុវត្តផែនការដើម្បីបញ្ចប់អំពើហិង្សានៅមីយ៉ាន់ម៉ា ប៉ុន្តែសេចក្តីថ្លែងការណ៍រួមរបស់ប្លុកមានសមាជិក១០ប្រទេសមួយនេះ មិនបានបង្ហាញពីវឌ្ឍនភាពជាក់ស្តែងឆ្ពោះទៅរកការដោះស្រាយស្ថានការណ៍នោះទេ។

រដ្ឋមន្ត្រីការបរទេសបានចេញសេចក្តីថ្លែងការណ៍នេះកាលពីថ្ងៃព្រហស្បតិ៍ ទី១៣ ខែកក្កដា បន្ទាប់ពីបញ្ចប់កិច្ចប្រជុំ នៅក្នុងប្រទេសឥណ្ឌូណេស៊ី បន្ទាប់ពីអាស៊ាន បានថ្កោលទោសអំពើហិង្សាជាបន្តបន្ទាប់នៅក្នុងប្រទេសមីយ៉ាន់ម៉ា រួមទាំងការវាយប្រហារពីអាកាស និងការបាញ់ផ្លោងផងដែរ ។

លើសពីនេះ រដ្ឋមន្ត្រីក៏និយាយដែរថា ការអនុវត្តកិច្ចព្រមព្រៀងជាឯកច្ឆន្ទ ៥ ចំណុច នៅតែសំខាន់ដើម្បីដោះស្រាយវិបត្តិនយោបាយក្នុងប្រទេសមីយ៉ាន់ម៉ា។ ផែនការ​ដែល​ព្រមព្រៀង​ក្នុង​ឆ្នាំ២០២១ ដោយ​សមាជិក​អាស៊ានជាមួយ​វត្តមាន​មេដឹកនាំ​យោធា​មីយ៉ាន់ម៉ា គឺបានអំពាវនាវ​ឲ្យ​បញ្ចប់​ជា​បន្ទាន់​ចំពោះ​អំពើ​ហិង្សា​នៅក្នុង​ប្រទេស ។

គួរបញ្ជាក់ថា ប្រទេសមីយ៉ាន់ម៉ា ត្រូវញាំញីដោយការប្រយុទ្ធគ្នា ចាប់តាំងពីយោធាដណ្តើមអំណាចនៅដើមឆ្នាំ២០២១ មុនពេលធ្វើការបង្រ្កាបបង្ហូរឈាមលើគូប្រជែង ដែលគាំទ្រលទ្ធិប្រជាធិបតេយ្យ ជាហេតុជំរុញឲ្យមានការវាយប្រហារសងសឹកដោយចលនាតស៊ូ និងកងទ័ពជនជាតិភាគតិច៕

ប្រែសម្រួល៖ Vann Vann

ប្រភព៖ NHK, Reuters

ចុចអាន៖ បញ្ហាចំនួន ២ នឹងដាក់បញ្ចូលក្នុងកិច្ចប្រជុំចង្អៀតរដ្ឋមន្ត្រីការបរទេស អាស៊ាន