រុស្ស៊ី ឆ្លើយតបទៅអ្នកវិភាគដែលចោទថា លោក ពូទីន រៀបចំផែនការទម្លាក់​យន្តហោះធ្វើឃាតមេទាហានស៊ីឈ្នួល

បន្ទាប់ពីហេតុការណ៍ធ្លាក់យន្តហោះដ៏រន្ធត់របស់មេទាហានស៊ីឈ្នួលរុស្ស៊ីលោក Yevgeny Prigozhin កាលពីពេលកន្លងទៅ អ្នក​វិភាគ​មួយ​ចំនួន​បាន​លើក​ឡើងស្រដៀងៗគ្នា​ថា លោកប្រធានាធិបតីររុស្ស៊ី​ វ្ល៉ាឌីមៀរ ពូទីន នេះហើយគឺជាអ្នក​បញ្ជា​ឲ្យ​ធ្វើ​ឃាតមេទាហានស៊ីឈ្នួល Wagner Group ។​

លោក Prigozhin និងមនុស្ស ៩ នាក់ផ្សេងទៀតត្រូវគេរាយការណ៍ថាបានស្លាប់កាលពីថ្ងៃទី២៣ ខែសីហា នៅពេលដែលយន្តហោះ Embraer Legacy 600 មានលេខកន្ទុយ RA-02795 ដែលពួកគេជិះបានធ្លាក់នៅភាគពាយព្យនៃទីក្រុងមូស្គូ ហើយអ្នកវិភាគលោកខាងលិចជាច្រើនបានជឿជាក់ថា ការធ្លាក់យន្តហោះនេះត្រូវបានរៀបចំឡើងដោយទីភ្នាក់ងារសន្តិសុខរបស់រុស្ស៊ី ។

ទន្ទឹមនោះ អ្នកវិភាគលោកខាងលិចក៏បានដាក់មូលហេតុនៃការធ្លាក់យន្តហោះនេះ គឺជាការសងសឹករបស់លោក ពូទីន ទៅលើលោក Prigozhin និងសមាជិកដទៃទៀតនៃក្រុមទាហានស៊ីឈ្នួល Wagner Group ដោយសារតែការបះបោរនៅរុស្ស៊ីកាលពីខែមិថុនាកន្លងទៅ ។

ពាក់ព័ន្ធនឹងបញ្ហានេះដែរ អ្នកនាំពាក្យវិមានក្រឹមឡាំងលោក Dmitry Peskov បានចេញមកបដិសេធរាល់ការវិភាគដែលថា រដ្ឋាភិបាលរុស្ស៊ីបានជាប់ពាក់ព័ន្ធក្នុងការសម្លាប់មេដឹកនាំទាហានស៊ីឈ្នួលលោក Yevgeny Prigozhin ហើយលោកថែមទាំងលើកឡើងទៀតថា ការអះអាងទាំងអស់នោះគឺជា “ការកុហកទាំងស្រុង” ។

លោក Peskov បានបញ្ជាក់ថា “នៅពេលនិយាយអំពីបញ្ហានេះ ចាំបាច់ត្រូវពឹងផ្អែកទាំងស្រុងលើការពិត ហើយការពិតមិនទាន់កើតមានច្រើននោះទេ ជាពិសេសយើងមិនទាន់មានព័ស្តុតាងគ្រប់គ្រាន់ណាមួយដើម្បីធ្វើការវាយតម្លៃចំពោះហេតុការណ៍នេះនៅឡើយទេ” ។

ទោះជាយ៉ាងណាក៏ដោយ រហូតមកដល់ពេលនេះមិនទាន់មានប្រភពច្បាស់ការណ៍ណាមួយបញ្ជាក់ពីការស្លាប់របស់លោក Prigozhin នៅក្នុងឧបទ្ទវហេតុធ្លាក់យន្តហោះនេះនៅឡើយទេ ហើយរឿងនេះត្រូវគេនឹកឃើញដល់ហេតុការណ៍កាលពី ៤ ឆ្នាំមុន ដែលក៏កើតមានរឿងរ៉ាវស្រដៀងគ្នានេះលើមេទាហានស៊ីឈ្នួលរូបនេះផងដែរ ប៉ុន្តែ ៣ ថ្ងៃក្រោយកើតហេតុ លោក Prigozhin ស្រាប់តែបង្ហាញខ្លួនគួរឲ្យភ្ញាក់ផ្អើលបំផុត ហើយថែមទាំងមិនមានរបួសអ្វីទាំងអស់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ស្គាល់ឈ្មោះ និងតួនាទីមន្ត្រី ចិន ដែលត្រូវសន្តិសុខ អាហ្រ្វិកខាងត្បូង រារាំង​មិនឲ្យចូលជាមួយលោក Xi Jinping