ទាហានថៃ បាញ់ប្រហារ សម្លាប់អ្នករត់ពន្ធគ្រឿងញៀន១៣នាក់ នៅជិតព្រំដែនមីយ៉ាន់ម៉ា

អ្នករត់ពន្ធគ្រឿងញៀនចំនួន១៣ នាក់បានស្លាប់ក្នុងអំឡុងការបាញ់ប្រហារជាមួយយោធា នៅជិតព្រំដែនមីយ៉ាន់ម៉ា កាលពីយប់ថ្ងៃសៅរ៍ទី១៦ខែធ្នូ។ នេះបើតាមការបញ្ជាក់ពី លោកឧត្តមសេនីយ៍ Praphat Phobsuwan មេបញ្ជាការនៃក្រុមកិច្ចការពិសេស Pha Muang។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្នាំញៀនមេតំហ្វេតាមីនប្រមាណ ១.៧លានគ្រាប់ ក៏ត្រូវបានរឹបអូសផងដែរ ក្នុងប្រតិបត្តិការបង្រ្កាបគ្រឿងញៀនដោយអង្គភាព Thap Chao Tak នៃក្រុមកិច្ចការពិសេស Pha Muang នៅភូមិ Pang Ma Han ក្នុងខេត្ត ឈៀងរ៉ៃ។

ក្នុងប្រតិបត្តិការនោះ ទាហាននិងក្រុម​នៃ​អង្គភាព ​បាន​រក​ឃើញ​សាកសព​មនុស្ស១៣នាក់ និងបាវចំនួន១៧ ដែល​មានផ្ទុក​ថ្នាំ​ញៀន​​ប្រមាណ ១.៧លាន​គ្រាប់។

យោងតាមលោកឧត្តមសេនីយ៍ Praphat, ការប្រយុទ្ធគ្នាដោយកាំភ្លើងរវាងទាហាន និងក្រុមគ្រឿងញៀន បានផ្ទុះឡើងនៅម៉ោង៧យប់ថ្ងៃសៅរ៍ ពេលទាហានព្យាយាមស្វែងរកបុរសមួយក្រុមដែលពួកគេឃើញដើរកាត់ព្រៃ។

ពេលរកឃើញ បុរស​ទាំង​នោះ​មិន​​ឈប់​ទេ តែបែរជាបើក​ការ​បាញ់​ប្រហារ​លើ​ក្រុម​ល្បាតទៅវិញ​ ជាហេតុនាំឲ្យទាហានបាញ់ទៅលើពួកគេតែម្តង។ លុះព្រឹកឡើងទើបទាហាន ​ចុះទៅ​ពិនិត្យ​ទីតាំង ដោយរកឃើញសាកសព និងបាវ​ដែល​ផ្ទុក​ថ្នាំ​ញៀន​។

លោកឧត្តមសេនីយ Praphat បញ្ជាក់ថា ទាហានក៏បានរុករកតំបន់ជុំវិញផងដែរ ដើម្បីស្វែងរកព័ស្តុតាងបន្ថែមទៀត។

នៅថ្ងៃដដែលនោះ កងទ័ពថៃ បានបង្ហោះលើទំព័រហ្វេសប៊ុករបស់ខ្លួនថា អង្គភាពប្រឆាំងគ្រឿងញៀន បានរឹបអូសថ្នាំញៀនប្រភេទមេតំហ្វេតាមីនចំនួន ១ ១១៨ ០០០ គ្រាប់ទៀតពីផ្ទះមួយកន្លែង ដែលស្ថិតក្រោមការឃ្លាំមើលមួយរយៈមកហើយនៅក្នុងស្រុក Muang Chaing Rai៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ កូឡុំប៊ី ប្រកាសប្រគល់ទ្រព្យសម្បត្តិដែលរឹបអូសបានពីក្រុមជួញដូរ គ្រឿងញៀន ទៅឲ្យកសិករ និងស្ត្រី