ឥណ្ឌា ប្រកាសអនុវត្តច្បាប់ចុះសញ្ជាតិ តែមិនរាប់បញ្ចូលអ្នកកាន់សាសនាឥស្លាម

រដ្ឋាភិបាលរបស់នាយករដ្ឋមន្រ្តីលោក Narendra Modi បានប្រកាសអនុវត្តច្បាប់សញ្ជាតិឆ្នាំ ២០១៩ ប៉ុន្តែមិនរាប់បញ្ចូលអ្នកកាន់សាសនាឥស្លាមនោះឡើយ ពោលប៉ុន្មានសប្តាហ៍មុនពេលមេដឹកនាំជាតិនិយមហិណ្ឌូរូបនេះស្វែងរកតំណែងនៅក្នុងការបោះឆ្នោតអាណត្តិទី ៣ ។​ នេះបើយោងតាមការចេញផ្សាយរបស់សារពត៌មាន CNA កាលពីថ្ងៃទី១២ ខែមីនា ។

ច្បាប់ស្តីពីវិសោធនកម្មសញ្ជាតិត្រូវបានអនុម័តដោយសភាឥណ្ឌាក្នុងឆ្នាំ ២០១៩ ប៉ុន្តែរដ្ឋាភិបាលរបស់លោក Modi បានផ្អាក បន្ទាប់ពីមានការតវ៉ាដ៏សាហាវបានផ្ទុះឡើងនៅក្នុងរដ្ឋធានី New Delhi និងកន្លែងផ្សេងទៀត ។

ច្បាប់នេះនឹងផ្ដល់នូវផ្លូវដ៏លឿនមួយដល់ការចូលសញ្ជាតិសម្រាប់អ្នកកាន់សាសនាហិណ្ឌូ ផាស៊ីស ស៊ីក ពុទ្ធសាសនិក ជេន និងគ្រិស្តសាសនិក ដែលបានភៀសខ្លួនចេញពីអាហ្វហ្គានីស្ថាន បង់ក្លាដែស និងប៉ាគីស្ថានចូលមកកាន់ឥណ្ឌា មុនថ្ងៃទី៣១ ខែធ្នូ ឆ្នាំ២០១៤ ប៉ុន្តែមិនរាប់បញ្ចូលអ្នកកាន់សាសនាឥស្លាមឡើយ ។

ទន្ទឹមនោះ ការចុះសញ្ជាតិរបស់ប្រជាពលរដ្ឋគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលលោក Modi ដើម្បីកំណត់អត្តសញ្ញាណ និងលុបបំបាត់មនុស្សដែលខ្លួនអះអាងថា ចូលមកប្រទេសឥណ្ឌាដោយខុសច្បាប់ ខណៈការស្ទង់មតិភាគច្រើនបង្ហាញថា លោក Modi នឹងឈ្នះសំឡេងភាគច្រើននៅក្នុងការបោះឆ្នោត ដែលគ្រោងនឹងធ្វើឡើងនៅខែឧសភា ។

លោក Modi បាន​លាយ​បញ្ចូល​សាសនា​កាន់​តែ​ខ្លាំង​ឡើង​ជាមួយ​នឹង​នយោបាយ​ក្នុង​រូបមន្ត​មួយ​ដែល​មាន​ភាព​ស៊ី​ជម្រៅ​ជាមួយ​ប្រជាជន​ហិណ្ឌូ​ ។ កាលពីខែមករា គាត់បានកម្ទេចចោលវិហារឥស្លាមដើម្បីបើកប្រាសាទហិណ្ឌូបំពេញតាមការសន្យារបស់អ្នកកាន់សាសនាហិណ្ឌូ ។

គួរបញ្ជាក់ថា ប្រទេសឥណ្ឌាគឺជាជម្រករបស់ប្រជាជនមូស្លីមប្រមាណ ២០០ លាននាក់ដែលបង្កើតជាក្រុមជនជាតិភាគតិចដ៏ធំមួយនៅក្នុងប្រទេសដែលមានប្រជាជនជាង ១.៤ ពាន់លាននាក់មួយនេះ ។ យ៉ាងណា ពួកគេត្រូវបានខ្ចាត់ខ្ចាយស្ទើរតែគ្រប់តំបន់នៃប្រទេសឥណ្ឌា ហើយត្រូវបានគេកំណត់គោលដៅនៅក្នុងការវាយប្រហារជាបន្តបន្ទាប់ ចាប់តាំងពី លោក Modi ឡើងកាន់អំណាចជាលើកដំបូងក្នុងឆ្នាំ ២០១៤ ៕

អត្ថបទ ៖ ប៊ុន សុភាព