ព័ត៌មានអន្ដរជាតិ

យូណេស្កូ ទទួលស្គាល់ សម្លតុងយ៉ាំ របស់ថៃ ជាសម្បត្តិបេតិកភណ្ឌវប្បធម៌អរូបី

បានផុស

៤ ខែ មុន

នៅ

ថ្ងៃពុធ ៤ ធ្នូ ២០២៤

ដោយ

Chheang

អង្គការយូណេស្កូ (UNESCO) នៅព្រឹកថ្ងៃពុធនេះបានចុះបញ្ជីសម្លតុងយ៉ាំ របស់ប្រទេសថៃ ចូលជាបេតិកភណ្ឌវប្បធម៌អរូបីនៃមនុស្សជាតិជាផ្លូវការហើយ។ នេះបើយោងតាមការចុះផ្សាយរបស់សារព័ត៌មាន Bangkok Post នៅថ្ងៃទី៤ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងវប្បធម៌ លោកស្រី Sudawan Wangsuphakijkosol បាននិយាយថា សេចក្ដីសម្រេចនេះ ធ្វើឡើងនៅទីក្រុងអាសង់ស្យុង នៃប្រទេសប៉ារ៉ាហ្គាយ នៅម៉ោង ៤និង១០នាទីល្ងាចថ្ងៃអង្គារ ឬម៉ោង ២និង១០នាទីព្រឹកថ្ងៃពុធ ម៉ោងនៅប្រទេសថៃ។

លោកស្រី Sudawan បានប្រាប់ថា៖ «សម្លតុងយ៉ាំ ឆ្លុះបញ្ចាំងពីរបៀបរស់នៅរបស់ប្រជាជនថៃ។ វាជាមុខម្ហូបរបស់ប្រជាជនក្នុងសហគមន៍កសិកម្មតាមមាត់ទន្លេក្នុងតំបន់ទំនាបកណ្តាល។ គ្រឿងផ្សំរបស់វាបានមកពីធនធានក្នុងស្រុក ហើយប្រជាជនក្នុងតំបន់ប្រែក្លាយវាទៅជាអាហារដែលមានសុខភាពល្អ»។ ដើម្បីធ្វើសម្លតុងយ៉ាំ បង្គាត្រូវចម្អិនក្នុងទឹកស្ងោរលាយជាមួយបន្លែរុក្ខជាតិ ដែលអ្នកស្រុកដាំនៅផ្ទះ ដូចជា រំដេង ស្លឹកគ្រៃ និងស្លឹកក្រូចសើច។

លោកស្រីបន្តថា «រសជាតិរបស់សម្លគឺមានជាតិជូរពីក្រូចឆ្មារ អមដោយរសជាតិប្រៃពីអំបិល ឬទឹកត្រី រសជាតិហឹរពីម្ទេស ផ្អែមពីបង្គា និងជូរតិចៗពីជី»។

សូមបញ្ជាក់ថា កន្លងមក បេតិកភណ្ឌវប្បធម៌ចំនួន ៤ របស់ថៃ ត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរួចហើយ រួមមាន របាំល្ខោនស្បែកមុខ របាំល្ខោននរាហ៍ ម៉ាស្សាថៃ និងពិធីបុណ្យសង្ក្រាន្ត៕

ដោយ៖ ឈាង