រុស្ស៊ី ប្រកាសជោគជ័យ ក្រោយបាញ់មីស៊ីលរាប់រយគ្រាប់ វាយសន្ធាប់អ៊ុយក្រែន ថ្ងៃបុណ្យណូអែល

ក្រោយបាញ់មីស៊ីលរាប់រយគ្រាប់និងបញ្ជូនដ្រូនរាប់រយគ្រឿងទៅវាយប្រហារប្រទេសអ៊ុយក្រែន ពេលនេះរុស្ស៊ី បានប្រកាសពីជោគជ័យ ដោយក្រសួងការពារជាតិបានចេញសេចក្តីថ្លែងការណ៍ថា ខ្លួនវាយប្រហារចំៗគោលដៅដូចដែលបានគ្រោងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិរុស្ស៊ី អះអាងថា កងកម្លាំងរបស់ខ្លួនបានបើកការវាយប្រហារទ្រង់ទ្រាយធំ លើហេដ្ឋារចនាសម្ព័ន្ធថាមពលអ៊ុយក្រែនសំខាន់ៗ ហើយគោលដៅទាំងអស់សុទ្ធតែបាញ់ចំៗ។

តាមការចុះផ្សាយរបស់ BBC នៅថ្ងៃព្រហស្បតិ៍ទី២៦ខែធ្នូឆ្នាំ២០២៤, ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី អះអាងថា «រុស្ស៊ីបានបាញ់មីស៊ីល៧០គ្រាប់និងបញ្ជូនដ្រូនជាង១០០គ្រឿង មកកម្ទេចហេដ្ឋារចនាសម្ព័ន្ធថាមពលអ៊ុយក្រែន ប៉ុន្តែយ៉ាងណា មានមីស៊ីលជាង៥០គ្រាប់និងដ្រូនអត្តឃាតមួយចំនួន ត្រូវបាញ់ទម្លាក់»។

ស្របពេលជាមួយគ្នានោះ អភិបាលក្រុង Kharkiv លោក Oleh Syniehubov បញ្ជាក់ថា មីស៊ីលរបស់រុស្ស៊ីដែលវាយប្រហារចំថ្ងៃបុណ្យណូអែល បានសម្លាប់មនុស្សចំនួន៦នាក់ និងបង្កការខូចខាតយ៉ាងដំណំដល់សំណង់ស៊ីវិល។

ជុំវិញបញ្ហានេះដែរ លោក ហ្សេលេនស្គី បានថ្កោលទោសការវាយប្រហារនេះថាជាទង្វើអមនុស្សធម៌បំផុត។ ប្រមុខរដ្ឋាភិបាលទីក្រុងកៀវ ប្រកាសថា «លោកពូទីន រើសយកថ្ងៃបុណ្យណូអែលសម្រាប់ការវាយប្រហារ។ តើមានអ្វីអមនុស្សធម៌ជាងនេះទៀត? គោលដៅគឺវិស័យថាមពលរបស់យើង ពួកគេបន្តប្រយុទ្ធដើម្បីផ្ដាច់ភ្លើងនៅអ៊ុយក្រែន»។

ដោយឡែក ប្រធានាធិបតីអាមេរិក ចូ បៃដិន ក៏និយាយដែរថា «គោលបំណងនៃការវាយប្រហារដ៏ឃោឃៅនេះ គឺដើម្បីកាត់ផ្តាច់មិនឲ្យប្រជាជនអ៊ុយក្រែនមានកម្តៅនិងអគ្គិសនី ក្នុងរដូវរងា ហើយធ្វើឲ្យបណ្តាញអគ្គិសនីអ៊ុយក្រែន ដួលរលំ។

យ៉ាងណា ទន្ទឹមនោះ ប្រធានាធិបតីអាមេរិក ក៏ស្នើឲ្យក្រសួងការពារជាតិ បន្តជួយអាវុធទៅអ៊ុយក្រែន ដើម្បីប្រយុទ្ធតតាំងជាមួយរុស្ស៊ីផងដែរ។

សូមបញ្ជាក់ថា នារយៈពេលប៉ុន្មានខែចុងក្រោយនេះ រុស្ស៊ីបានពន្លឿនការវាយលុកនៅទូទាំងភាគខាងកើតប្រទេសអ៊ុយក្រែន ដើម្បីដណ្តើមយកទឹកដីឲ្យបានច្រើនតាមដែលអាចធ្វើទៅបាន មុនពេលប្រធានាធិបតីជាប់ឆ្នោតអាមេរិកលោក ដូណាល់ ត្រាំ ឡើងកាន់អំណាចក្នុងខែមករា។

មេដឹកនាំ​គណបក្ស​សាធារណរដ្ឋ​រូបនេះ​សន្យា​ថា ​នឹង​បញ្ចប់​ជម្លោះ​រយៈពេល​ជិត​បី​ឆ្នាំ​យ៉ាង​ឆាប់​រហ័ស ប៉ុន្តែមិនលាតត្រដាងលក្ខខណ្ឌណាមួយឡើយ៕

អត្ថបទ៖ សុខ សុវណ្ណ

ចុចអាន៖ ថ្ងៃបុណ្យណូអែល រុស្ស៊ី បាញ់មីស៊ីលស្រោចពេញទំហឹងលើ អ៊ុយក្រែន