៣​ចំណុច​សំខាន់ៗ ពាក់ព័ន្ធ​នឹង​​បទ​ឈប់​បាញ់​តំបន់​ហ្គាហ្សា ដែល​កំពុង​ចរចា​រវាង​អ៊ីស្រាអែល​និង​ហាម៉ាស

បើតាមប្រភពពីអ៊ីស្រាអែល និងប៉ាឡេស្ទីនដែល​បាន​រាយការណ៍កាលពីថ្ងៃអង្គារ​ទី​១៤​ខែ​មករា​ឆ្នាំ​២០២៥ ក្រុមហាម៉ាស នឹងដោះលែង​ចំណាប់ខ្មាំង​​ចំនួន​ ៣៣​នាក់ ដែលត្រូវបានឃុំខ្លួននៅ​តំបន់​ហ្គាហ្សា ខណៈដែល​អ៊ីស្រាអែល​ នឹងដោះលែងអ្នកទោសប៉ាឡេស្ទីនប្រហែល ១ ០០០​នាក់នៅក្នុងដំណាក់កាលដំបូងនៃកិច្ចព្រមព្រៀង។

អ្នកសម្របសម្រួលមកពី​ប្រទេសកាតា អេហ្ស៊ីប និង​សហរដ្ឋអាមេរិក បានបង្កើនកិច្ចខិតខំប្រឹងប្រែង ដើម្បី​បញ្ចប់កិច្ចព្រមព្រៀង ក្នុងរយៈពេលប៉ុន្មានថ្ងៃថ្មីៗនេះ។ កាតា បាននិយាយថា កិច្ចព្រមព្រៀងនេះគឺស្ថិតនៅក្នុង «ដំណាក់កាលចុងក្រោយ» ហើយ។

ខាងក្រោមនេះ គឺជាព័ត៌មាន​សំខាន់ៗ​មួយ​ចំនួន​នៃដំណាក់កាលដំបូងដែលរំពឹងទុក​ក្នុង​កិច្ចព្រមព្រៀងរវាង​អ៊ីស្រាអែល និង​ក្រុម​សកម្ម​​ប្រយុទ្ធ​ប៉ាឡេស្ទីន៖

ការផ្លាស់ប្តូរអ្នកទោស-ចំណាប់ខ្មាំង

អ្នកនាំពាក្យរដ្ឋាភិបាលអ៊ីស្រាអែលលោក David Mencer កាលពីថ្ងៃអង្គារ បានអះអាងថា អ៊ីស្រាអែលកំពុងស្វែងរកការដោះលែងចំណាប់ខ្មាំងចំនួន ៣៣​នាក់ដែលជាផ្នែក​មួយ​នៃដំណាក់កាលដំបូង។

លោក Mencer បាននិយាយក្នុងអំឡុងពេលសន្និសីទសារព័ត៌មានតាមប្រព័ន្ធអ៊ីនធឺណែតថា៖ «មានចំណាប់ខ្មាំង ៣៣​នាក់ ដែលយើងចង់ដោះលែង» ដោយបន្ថែមថា អ៊ីស្រាអែលសុខចិត្តដោះលែងអ្នកទោសប៉ាឡេស្ទីនរាប់រយនាក់ជាថ្នូរនឹងការដោះលែង។

អ្នកទាំង ៣៣នាក់នេះ ស្ថិតក្នុងចំណោមចំណាប់ខ្មាំង ៩៤នាក់ ដែល​កំពុង​ត្រូវ​ឃុំខ្លួននៅហ្គាហ្សា ចាប់តាំងពីការវាយប្រហារថ្ងៃទី​៧​ខែតុលា​ឆ្នាំ​២០២៣ នៅ​ពេល​ក្រុម​ហាម៉ាស​វាយ​ប្រហារ​លើ​ភាគ​ខាង​ត្បូង​ប្រទេស​អ៊ីស្រាអែល ដែល​ជា​ដើម​ទង​បង្ក​ឲ្យ​មានសង្គ្រាមកំពុងកើត​ឡើង​នេះ។

ប្រភព​ចំនួន​ពីរដែលជិតស្និទ្ធនឹងក្រុមហាម៉ាស បានប្រាប់​ទីភ្នាក់ងារ​ព័ត៌មាន AFP ថា អ៊ីស្រាអែលនឹងដោះលែងអ្នកទោសប៉ាឡេស្ទីនប្រហែល ១ ០០០​នាក់ រួមទាំងអ្នកដែលមាន​ទោស​ធ្ងន់​ផងដែរ។

ប្រភពស្និទ្ធនឹងក្រុមហាម៉ាស បាននិយាយថា៖ «ដំណាក់កាលដំបូងនៃកិច្ចព្រមព្រៀងចែងពីការដោះលែងចំណាប់ខ្មាំងអ៊ីស្រាអែលចំនួន ៣៣​នាក់ជាក្រុម ដោយចាប់ផ្តើមពីកុមារ និងស្ត្រី»។

តំបន់ការពាររបស់អ៊ីស្រាអែល

មន្ត្រី​អ៊ីស្រាអែល​ម្នាក់ ​បាន​និយាយ​ថា ការ​ចរចា​សម្រាប់​ដំណាក់​កាល​ទីពីរ​នឹង​ចាប់​ផ្តើម​នៅ​ថ្ងៃ​ទី​១៦ បន្ទាប់​ពី​ការ​អនុវត្ត​ដំណាក់​កាល​ទី​១។

ដំណាក់កាលនេះ នឹងគ្របដណ្តប់លើការដោះលែងឈ្លើយសឹកដែលនៅសេសសល់ រួមទាំង «ទាហានប្រុស បុរសដែលដល់​អាយុយោធា និងសាកសពចំណាប់ខ្មាំងដែលត្រូវបានសម្លាប់»។ នេះ​បើ​យោង​តាម​ការ​រាយការណ៍​ពី​​កាសែត Times of Israel។

ប្រព័ន្ធផ្សព្វផ្សាយអ៊ីស្រាអែល បាន​ឲ្យ​ដឹង​ថា នៅក្រោមកិច្ចព្រមព្រៀងដែលបានស្នើឡើង អ៊ីស្រាអែលនឹងរក្សាតំបន់ការពារមួយនៅ​ហ្គាហ្សាក្នុងដំណាក់កាលដំបូង។

យោងតាមប្រភពជិតស្និទ្ធនឹងក្រុម​ហាម៉ាស កងកម្លាំងអ៊ីស្រាអែលត្រូវបានគេរំពឹងថានឹងបន្ត​រក្សា​វត្តមាន​​ក្នុង​ចម្ងាយ​រហូតដល់ ៨០០​ម៉ែត្រនៅខាងក្នុង​តំបន់​ហ្គាហ្សា ដែលលាតសន្ធឹងពី​ទីក្រុង Rafah នៅភាគខាងត្បូងរហូតដល់​ទីក្រុង Beit Hanun នៅភាគខាងជើង។

មន្ត្រីអ៊ីស្រាអែល បាន​ប្រាប់​ថា កងកម្លាំងអ៊ីស្រាអែលនឹងមិនដកខ្លួនទាំងស្រុងចេញពីតំបន់ហ្គាហ្សាឡើយ រហូតទាល់តែចំណាប់ខ្មាំងទាំងអស់ត្រូវបានបញ្ជូនមកវិញ។

កាសែត​អ៊ីស្រាអែល Haaretz បានរាយការណ៍ថា អ៊ីស្រាអែលនឹងអនុញ្ញាត​ឲ្យ​មាន​ការ​ផ្លាស់​ទី​របស់​អ្នកស្រុកពីភាគខាងត្បូង​​តំបន់​ហ្គាហ្សា​ទៅ​កាន់​ភាគខាងជើង​វិញ។

ចំណុច​ប្រទាក់​ក្រឡា

ការ​ចរចា​លើក​មុន​បាន​រអាក់រអួល​ជុំវិញ​បញ្ហា​ចម្រូងចម្រាស​មួយ​ចំនួន។

ចំណុចជាប់គាំងសំខាន់ៗ រួមមាន ការខ្វែងគំនិតគ្នាលើ​ភាព​អចិន្ត្រៃយ៍នៃ​បទឈប់បាញ់ ទំហំនៃ​ជំនួយមនុស្សធម៌ដែលត្រូវបានអនុញ្ញាតចូលទៅក្នុងហ្គាហ្សា និងការវិលត្រឡប់​របស់​ប្រជាជន​ហ្គាហ្សា​ត្រឡប់​ទៅផ្ទះ​សម្បែង​របស់ពួកគេ។

ការ​ខ្វែង​គំនិត​គ្នា​ផ្សេង​ទៀត​ទាក់ទងនឹងការដកទ័ពអ៊ីស្រាអែល ការបើកច្រកព្រំដែនឡើងវិញ និងការគ្រប់គ្រងលើតំបន់ហ្គាហ្សា។

កន្លង​មក នាយករដ្ឋមន្ត្រីអ៊ីស្រាអែល លោក Benjamin Netanyahu បានជំទាស់យ៉ាងដាច់អហង្ការចំពោះការដកទ័ពទាំងស្រុង និងបានច្រានចោលរាល់ការគ្រប់គ្រងរបស់ប៉ាឡេស្ទីននៅក្នុងទឹកដី​​តំបន់​ហ្គាហ្សា៕

ដោយ៖ ឈាង