ត្រាំ ចេញបញ្ជាដាក់ទោសប្រហារជីវិត អ្នកណាសម្លាប់មន្ត្រី និងជនអន្តោប្រវេសន៍ដែលប្រព្រឹត្តអំពើឧក្រិដ្ឋកម្ម

ក្នុងបញ្ជាប្រតិបត្តិសំខាន់មួយទៀតដែលលោក ដូណាល់ ត្រាំ បានចុះហត្ថលេខានៅថ្ងៃដំបូងក្នុងនាមប្រធានាធិបតីអាមេរិកទី៤៧, លោកបានសម្រេចលុបចោលបញ្ជាផ្អាកប្រហារជីវិតដែលចេញដោយអតីតប្រធានាធិបតី ចូ បៃដិន ហើយបញ្ជាឲ្យអគ្គរដ្ឋអាជ្ញាស្តីទី James McHenry ស្វែងរកយុត្តាធិការសហព័ន្ធ និងដាក់ទោសប្រហារជីវិតសម្រាប់ជនទាំងឡាយណា ដែលត្រូវបានរកឃើញមានពិរុទ្ធពីបទឃាតកម្មលើមន្ត្រីអនុវត្តច្បាប់ ក៏ដូចជាជនអន្តោប្រវេសន៍ខុសច្បាប់ ដែលត្រូវបានផ្តន្ទាទោសពីបទឧក្រិដ្ឋផងដែរ។

តាមការចុះផ្សាយរបស់ Truthout កាលពីថ្ងៃអង្គារទី២១ខែមករាឆ្នាំ២០២៥, ក្នុងបញ្ជានោះ លោក ត្រាំ បានអំពាវនាវឲ្យមានការអនុវត្តទោសប្រហារជីវិតកាន់តែខ្លាំងនៅទូទាំងសហរដ្ឋអាមេរិក ព្រោះថា មានតែទោសបែបនេះទេ ទើបជាឧបករណ៍សំខាន់ អាចរារាំងអំពើឧក្រិដ្ឋកម្មបាន។

បញ្ជាប្រតិបត្តិរបស់លោក ត្រាំ ស្តីពីការកាត់ទោសប្រហារជីវិតនេះ ក៏អះអាងផងដែរថា «មានតែការដាក់ទោសប្រហារជីវិតប៉ុណ្ណោះ ដែលអាចនាំមកនូវយុត្តិធម៌សម្រាប់ជនរងគ្រោះនៃអំពើឧក្រិដ្ឋកម្មដ៏សាហាវ និងក្រុមគ្រួសាររបស់ពួកគេ»។

រម្លឹកទៅអាណត្តិដំបូងរបស់អ្នកសាធារណរដ្ឋ, រដ្ឋបាលលោក ត្រាំ បានអនុវត្តការប្រហារជីវិតសហព័ន្ធចំនួន១៣លើក ដែលនេះជាតួលេខច្រើនបំផុតបើធៀបនឹងប្រធានាធិបតីផ្សេងៗនៅក្នុងប្រវត្តិសាស្ត្រសម័យទំនើប។

យ៉ាងណា ការអនុវត្តទោសនេះត្រូវបានផ្អាកជាបណ្តោះអាសន្នក្រោមការដឹកនាំរបស់លោក ចូ បៃដិន ក្នុងឆ្នាំ២០២១ ហើយមុនចាកចេញ អ្នកប្រជាធិបតេយ្យក៏បានបន្ថយទោសទណ្ឌិត៣៧នាក់ ពីប្រហារជីវិតមកនៅជាប់ពន្ធនាគារពេញជីវិតវិញ ដែលរឿងនេះត្រូវបានលោក ត្រាំ រិះគន់យ៉ាងខ្លាំង៕

អត្ថបទ៖ សុខ សុវណ្ណ

ចុចអាន៖ បៃដិន ទុកសំបុត្រមួយច្បាប់ឲ្យ ត្រាំ នៅក្នុងថតតុ