ព័ត៌មានអន្ដរជាតិ

ជនជាតិឥណ្ឌា១០លាននាក់ សម្រុកមុជទឹកលាងបាប ក្នុងថ្ងៃពិសេសនៃពិធីបុណ្យ Kumbh Mela

បានផុស

១ year មុន

នៅ

ថ្ងៃពុធ ១២ កុម្ភៈ ២០២៥

ដោយ

Chheang

អ្នកកាន់សាសនាហិណ្ឌូជាង ១០លាននាក់ បាននាំគ្នាជ្រមុជទឹក ដើម្បីលាងបាបកម្មក្នុងពិធីបុណ្យ Kumbh Mela ស្ថិតនៅទីក្រុង Prayagra រដ្ឋ Uttar Pradesh ភាគខាងជើងប្រទេសឥណ្ឌា។

មនុស្សម្នាចូលរួមក្នុងពិធីបុណ្យ Kumbh Mela (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមអាជ្ញាធរក្នុងតំបន់ ការមុជទឹកនៅថ្ងៃពុធទី១២កុម្ភៈនេះ មានរយៈពេល ៤ម៉ោង ដែលត្រូវចាត់ទុកជាថ្ងៃដ៏វិសុទ្ធបំផុតនៃពិធីបុណ្យហិណ្ឌូដែលប្រារព្ធរយៈពេល៤៥ថ្ងៃ ហើយក៏ជាការជួបជុំមនុស្សជាតិដ៏ធំបំផុតរបស់ពិភពលោកផងដែរ។

មន្ត្រីនៅកន្លែងពិធីបុណ្យ Kumbh Mela បានបង្កើនចំនួនប៉ូលិស និងដាក់ពង្រាយការល្បាតតាមអាកាស សម្រាប់ករណីសង្គ្រោះបន្ទាន់ណាមួយ។

លោក Prashant Kumar មេប៉ូលិសក្នុងរដ្ឋ Uttar Pradesh បានប្រាប់ថា៖ «ត្រឹមមួយថ្ងៃ មានមនុស្សច្រើននៅក្នុងទីក្រុងនេះ ច្រើនជាងចំនួនប្រជាជននៃប្រទេសមួយចំនួនទៅទៀត ហើយតួលេខនេះកំពុងកើនឡើងជាបន្តបន្ទាប់»។

លោកបានបន្ថែមថា មនុស្សជាង ១០លាននាក់បានចុះងូតទឹកតាំងពីម៉ោង ៨ព្រឹក ហើយមានការរំពឹងទុកថានឹងកើនឡើងច្រើនបន្ថែមទៀត។

ចន្ទពេញវង់នៅថ្ងៃទី១២ខែកុម្ភៈនេះ ឬហៅថាថ្ងៃ «Magh Poornima» ត្រូវបានចាត់ទុកជាថ្ងៃដ៏វិសុទ្ធបំផុតនៅក្នុងពិធីបុណ្យ Kumbh Mela។

ការរក្សាសុវត្ថិភាព គឺជាបញ្ហាប្រឈមដ៏ចម្បងក្នុងពិធីបុណ្យនេះ។ តួយ៉ាង មនុស្សជាង ៣០នាក់ ត្រូវបានសម្លាប់នៅក្នុងការរត់ជាន់គ្នាកាលពីថ្ងៃទី២៩មករា ខណៈដែលមនុស្សជាង ៧៦លាននាក់បានទៅងូតទឹកលាងបាបនៅក្នុងពិធីបុណ្យ Kumbh Mela។

សូមជម្រាបជាថ្មី ពិធីបុណ្យ Kumbh Mela គឺរៀបចំឡើងរៀងរាល់១២ឆ្នាំម្តងនៅ Sangam ដែលជាចំណុចប្រសព្វនៃទន្លេដ៏ពិសិដ្ឋទាំងបីគឺ គង្គា យ៉ាមូណា និង សារ៉ាស្វាទី។

អ្នកកាន់សាសនាហិណ្ឌូជឿថា ការងូតនៅក្នុងទឹកពិសិដ្ឋនេះ នឹងលាងជម្រះអំពើបាបរបស់ពួកគេ ហើយជួយឲ្យពួកគេ ទទួលបានសេចក្ដីសង្រ្គោះ៕