ព័ត៌មានអន្ដរជាតិ

ក្រុមហាម៉ាស ស្នើបទឈប់បាញ់រយៈពេល៥ទៅ១០ឆ្នាំជាមួយអ៊ីស្រាអែល

បានផុស

៣១ នាទីutes មុន

នៅ

ថ្ងៃអង្គារ ១១ មីនា ២០២៥

ដោយ

Chheang

ក្រុមហាម៉ាស បានស្នើបទឈប់បាញ់ជាមួយអ៊ីស្រាអែលដែលមានរយៈពេលពី ៥ ទៅ ១០ឆ្នាំ គួបផ្សំនឹងការផ្លាស់ប្តូរអ្នកទោស។ នេះបើយោងតាមលោក Adam Boehler បេសកជនពិសេសរបស់ប្រធានាធិបតីអាមេរិកលោក ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្តើមនេះ បានកើតឡើងក្នុងអំឡុងពេលកិច្ចពិភាក្សាដោយសម្ងាត់រវាងលោក Boehler និងមន្ត្រីជាន់ខ្ពស់របស់ហាម៉ាសលោក Khalil al-Hayya។ លោក Boehler បានសម្តែងសុទិដ្ឋិនិយម ដោយលើកឡើងថា ក្រុមហាម៉ាសអាចនឹងពិចារណាការរំសាយអាវុធ និងបោះបង់ការគ្រប់គ្រងតំបន់ហ្គាហ្សា ដើម្បីជួយសម្រួលដល់បទឈប់បាញ់។

លោក Boehler បាននិយាយកាលពីថ្ងៃទី៩ខែមីនាថា៖ «ពួកគេបានស្នើឲ្យមានបទឈប់បាញ់ពី ៥ ទៅ ១០ឆ្នាំ ដែលក្រុមហាម៉ាសនឹងដាក់អាវុធចុះទាំងអស់ ហើយសហរដ្ឋអាមេរិកនឹងចូលជួយ ក៏ដូចជាប្រទេសដទៃទៀត ធានាថា មិនមានផ្លូវរូងក្រោមដី គ្មាននរណាផ្ដួលរលំយោធា ហើយក្រុមហាម៉ាសមិនពាក់ព័ន្ធនឹងនយោបាយតទៅមុខទៀតទេ»។

ការលាតត្រដាងនៃកិច្ចចរចាទាំងនេះ បានធ្វើឲ្យមានប្រតិកម្មយ៉ាងខ្លាំងពីមន្ត្រីអ៊ីស្រាអែល។ រដ្ឋមន្ត្រីហិរញ្ញវត្ថុលោក Bezalel Smotrich បានរិះគន់ជាសាធារណៈចំពោះវិធីសាស្រ្តរបស់លោក Boehler ដោយអះអាងថា គាត់មិនអាចតំណាងឲ្យផលប្រយោជន៍របស់អ៊ីស្រាអែលទេ។ រដ្ឋបាលអ៊ីស្រាអែល តាមសេចក្តីរាយការណ៍ បានដឹងពីការចរចារទាំងនេះ តាមរយៈបណ្តាញសារព័ត៌មានរបស់អាមេរិក មុនពេលទទួលបានការជូនដំណឹងជាផ្លូវការ ដែលធ្វើឲ្យភាពតានតឹងកាន់តែធ្ងន់ធ្ងរ។

លោក Steve Witkoff បេសកជនមជ្ឈិមបូព៌ារបស់លោក ត្រាំ បានសង្កត់ធ្ងន់ថា ដើម្បីឲ្យកិច្ចព្រមព្រៀងបទឈប់បាញ់ណាមួយមានប្រសិទ្ធភាព ក្រុមហាម៉ាសត្រូវតែបោះបង់ចោលអាវុធ និងចាកចេញពីតំបន់ហ្គាហ្សា។ លោក Witkoff ដែលបច្ចុប្បន្ននៅប្រទេសកាតាសម្រាប់ការចរចាបន្ថែម បានគូសបញ្ជាក់ថា សន្តិភាពមិនអាចទទួលបានទេដរាបណាកងកម្លាំងយោធារបស់ក្រុមហាម៉ាសបង្កការគំរាមកំហែងដល់អ៊ីស្រាអែល។ លោកក៏បានលើកឡើងពីភាពចាំបាច់នៃការកំណត់អ្នកស្នងតំណែងដើម្បីគ្រប់គ្រងតំបន់ហ្គាហ្សា ក្រោយបទឈប់បាញ់ត្រូវបានអនុវត្តផងដែរ៕