ព័ត៌មានអន្ដរជាតិ

រុស្ស៊ីបន្តវាយប្រហារយ៉ាងខ្លាំងលើក្រុង Kharkiv សម្លាប់មនុស្ស២នាក់ របួស៥៤នាក់

បានផុស

១ year មុន

នៅ

ថ្ងៃពុធ ១១ មិថុនា ២០២៥

ដោយ

Chheang

ការវាយប្រហារដោយយន្តហោះគ្មានមនុស្សបើករបស់រុស្សីនៅថ្ងៃពុធទី១១ខែមិថុនានេះ បានបណ្តាលឲ្យមនុស្សយ៉ាងតិច២នាក់ស្លាប់ និង៥៤នាក់រងរបួស ក្នុងនោះមានកុមារ ៥នាក់នៅទីក្រុង Kharkiv ភាគឦសាននៃប្រទេសអ៊ុយក្រែន។

អគារដែលរងការវាយប្រហារនៅថ្ងៃទី១១មិថុនា២០២៥ (រូបថត៖ ទីភ្នាក់ងារសង្គ្រោះបន្ទាន់របស់អ៊ុយក្រែន)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអាជ្ញាធរក្នុងតំបន់ ការវាយប្រហារមានរយៈពេលប្រហែល៩នាទី ដោយយន្តហោះគ្មានមនុស្សបើកចំនួន១៧គ្រឿង បានវាយប្រហារតំបន់លំនៅដ្ឋានក្នុងសង្កាត់ចំនួន២។

អភិបាលក្រុង Kharkiv លោក Ihor Terekhov បានពណ៌នាការបំផ្លិចបំផ្លាញថាជា «ការវាយប្រហារដោយផ្ទាល់លើអគារកម្ពស់ច្រើនជាន់ ផ្ទះឯកជន សួនកុមារ សហគ្រាស និងការដឹកជញ្ជូនសាធារណៈ»។

ទីភ្នាក់ងារសង្គ្រោះបន្ទាន់ បានជួយជនរងគ្រោះពីសំណង់ដែលខូចខាត និងបានប្រយុទ្ធនឹងអណ្តាតភ្លើងដ៏សន្ធោរសន្ធៅពេញមួយយប់។ មនុស្ស៩នាក់ត្រូវបានបញ្ជូនទៅសម្រាកព្យាបាលនៅឯមន្ទីរពេទ្យ ក្នុងនោះមានក្មេងស្រីអាយុ២ឆ្នាំម្នាក់ និងក្មេងប្រុសអាយុ១៥ឆ្នាំម្នាក់។

កាលពីដើមសប្តាហ៍នេះ ទីក្រុង Kharkiv បានរងការវាយប្រហារតាមអាកាសដ៏ខ្លាំងក្លាបំផុតជាច្រើនលើកពីរុស្ស៊ី គិតចាប់តាំងសង្គ្រាមបានផ្ទុះឡើងនៅខែកុម្ភៈឆ្នាំ២០២២ ដែលបណ្តាលឲ្យមានជនស៊ីវិលស្លាប់ និងខូចខាតទ្រព្យសម្បត្តិសាធារណៈជាច្រើន។

អ៊ុយក្រែនអះអាងថា ការវាយប្រហារទាំងនេះគឺជាផ្នែកមួយនៃការសងសឹកយ៉ាងចាស់ដៃរបស់រុស្ស៊ី បន្ទាប់ពីប្រតិបត្តិការ«សំណាញ់ពីងពាង»របស់អ៊ុយក្រែនដែលបំផ្លាញយន្តហោះចម្បាំងរុស្ស៊ីអស់ជាច្រើនគ្រឿងកាលពីថ្ងៃទី១ខែមិថុនា។

កន្លងមក ភាគីទាំងពីរបានបដិសេធកំណត់គោលដៅលើជនស៊ីវិលនៅក្នុងសង្រ្គាម។ យ៉ាងណាមិញ ជនស៊ីវិលរាប់ពាន់នាក់នៅត្រូវបានសម្លាប់នៅក្នុងជម្លោះ ដែលភាគច្រើនជាជនជាតិអ៊ុយក្រែន៕