ព័ត៌មានអន្ដរជាតិ

រុស្ស៊ីផ្លោងគ្រាប់ដាក់អ៊ុយក្រែនឥតឈប់៩ម៉ោង ស្លាប់មនុស្ស១៤នាក់ របួសរាប់សិបនាក់

បានផុស

១ year មុន

នៅ

ថ្ងៃអង្គារ ១៧ មិថុនា ២០២៥

ដោយ

Chheang

ការវាយប្រហារទាំងយប់ដោយកងកម្លាំងរុស្ស៊ីដែលមានរយៈពេលប្រហែល៩ម៉ោង បានឆក់យកជីវិតមនុស្សយ៉ាងហោចណាស់ ១៤នាក់ និងជាង ៥០នាក់ផ្សេងទៀតបានរងរបួសនៅក្នុងទីក្រុងកៀវ។ នេះបើយោងតាមការប្រកាសរបស់ក្រសួងមហាផ្ទៃអ៊ុយក្រែននៅថ្ងៃអង្គារទី១៧ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការវាយប្រហារលើកនេះ រុស្ស៊ីបានប្រើយន្តហោះគ្មានមនុស្សបើក មីស៊ីលគ្រូស និងយ៉ាងហោចណាស់មីស៊ីលបាលិស្ទិកចំនួនពីរគ្រាប់ សំដៅលើទីតាំងចំនួន២៧នៅទូទាំងរដ្ឋធានីកៀវ ដែលមានដូចជា អគារលំនៅឋាន កន្លែងអប់រំ និងហេដ្ឋារចនាសម្ព័ន្ធសំខាន់ៗ។

អ្វីដែលគួរឲ្យកត់សម្គាល់ ម្នាក់ក្នុងចំណោមអ្នកស្លាប់ត្រូវបានគេកំណត់អត្តសញ្ញាណថាជាជនជាតិអាមេរិកអាយុ ៦២ឆ្នាំ ដែលបាត់បង់ជីវិតព្រោះរងរបួសធ្ងន់ធ្ងរ នៅពេលដែលគ្រាប់មីស៊ីលផ្លោងចំអគារលំនៅឋានកម្ពស់៩ជាន់ នៅក្នុងសង្កាត់ Solomianskyi។

នៅក្នុងការវាយប្រហារដាច់ដោយឡែកមួយទៀតដោយយន្តហោះគ្មានមនុស្សបើករបស់រុស្ស៊ីនៅឯទីក្រុងកំពង់ផែ Odesa ជនស៊ីវិលចំនួន ១៣នាក់បានរងរបួស រួមទាំងកុមារផងដែរ។

មន្ត្រីអ៊ុយក្រែន បានថ្កោលទោសការវាយប្រហារនេះថាជាយុទ្ធនាការគ្រោងទុកមុនដែលផ្តោតលើជនស៊ីវិល។ ប្រធានបុគ្គលិករបស់ប្រធានាធិបតីអ៊ុយក្រែនលោក Andriy Yermak បាននិយាយនៅលើ Telegram ថា «ការវាយប្រហារកាន់តែច្រើនដោយយន្តហោះគ្មានមនុស្សបើករបស់រុស្ស៊ីទៅលើអគារលំនៅឋានក្នុងទីក្រុងកៀវ។ រុស្ស៊ីកំពុងបន្តសង្រ្គាមរបស់ខ្លួនលើជនស៊ីវិល»៕