អ៊ីស្រាអែល សង្ឃឹមថា អាមេរិកនឹងគាំទ្រខ្លួនចំពោះការវាយប្រហារអ៊ីរ៉ង់ លើកក្រោយ

ក្នុងរបាយការណ៍ដែលផ្សាយដោយ Times of Israel នៅថ្ងៃអង្គារទី៨ខែកក្កដាឆ្នាំ២០២៥ ប្រទេសអ៊ីស្រាអែលកំពុងសង្ឃឹមយ៉ាងមុតមាំថា សហរដ្ឋអាមេរិក នឹងគាំទ្រខ្លួនចំពោះការវាយប្រហារអ៊ីរ៉ង់លើកក្រោយទៀត ប្រសិនបើទីក្រុងតេហេរ៉ង់ ចាប់ផ្តើមកម្មវិធីនុយក្លេអ៊ែរសាជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍នោះ ប្រភពចំនួន២បានដកស្រង់សម្តីរដ្ឋមន្ត្រីកិច្ចការយុទ្ធសាស្ត្រអ៊ីស្រាអែល Ron Dermer ដែលប្រាប់ក្រុមមន្ត្រីបន្ទាប់ពីកិច្ចប្រជុំនៅទីក្រុងវ៉ាស៊ីនតោនកាលពីសប្តាហ៍មុនថា លោកគិតថាសេតវិមាន នឹងគាំទ្រការវាយប្រហារថ្មីរបស់អ៊ីស្រាអែលក្រោមកាលៈទេសៈជាក់លាក់ ដូចជាការប៉ុនប៉ងរបស់ទីក្រុងតេហេរ៉ង់ក្នុងការកសាងកម្មវិធីនុយក្លេអ៊ែររបស់ខ្លួនឡើងវិញ ឬការទាញយកសារធាតុអ៊ុយរ៉ាញ៉ូមចម្រាញ់រួច ដែលត្រូវបានគេជឿថាកំពុងរក្សាទុកនៅក្នុងរោងចក្រក្រោមដីដែលសហរដ្ឋអាមេរិកបានទម្លាក់គ្រាប់បែកកាលពីខែមុនជាដើម។

ពាក់ព័ន្ធរឿងនេះដែរ កាលពីសប្តាហ៍មុនសមាជិករដ្ឋសភាអាមេរិកពីររូប បានបង្ហាញសេចក្តីព្រាងច្បាប់មួយ ដែលនឹងអនុញ្ញាតឲ្យលោកប្រធានាធិបតី ដូណាល់ ត្រាំ ផ្តល់យន្តហោះទម្លាក់គ្រាប់បែក B-2 និងគ្រាប់បែក «Bunker Buster» ទម្ងន់ ១៣ ៦០៧គីឡូក្រាមដល់អ៊ីស្រាអែល បើសិនជាអ៊ីរ៉ង់ហ៊ានវាយប្រហារនាពេលអនាគត និងប្រសិនបើរកឃើញថា ទីក្រុងតេហេរ៉ង់ នៅតែបន្តអភិវឌ្ឍកម្មវិធីអាវុធនុយក្លេអ៊ែរ។

ច្បាប់នោះមានឈ្មោះ «Bunker Buster Act» ត្រូវបានបង្ហាញកាលពីថ្ងៃពុធទី២ខែកក្កដាឆ្នាំ២០២៥ដោយលោក Josh Gottheimer នៃរដ្ឋ New Jersey និងលោក Mike Lawler នៃរដ្ឋ New York ជាមួយគោលបំណងឲ្យលោក ត្រាំ ចាត់វិធានការដើម្បីធានាថា អ៊ីស្រាអែល រៀបចំវាយប្រហាររួចស្រេចគ្រប់កាលៈទេសៈ ប្រសិនបើអ៊ីរ៉ង់ស្វែងរកការអភិវឌ្ឍអាវុធនុយក្លេអ៊ែរ មែន។

សូមជម្រាបជាថ្មី អ៊ីស្រាអែលបានចាប់ផ្តើមសង្រ្គាមផ្លូវអាកាសកាលពីថ្ងៃទី​១៣​ខែមិថុនា ដោយវាយលុកទីតាំងនុយក្លេអ៊ែរអ៊ីរ៉ង់ និងសម្លាប់មេបញ្ជាការយោធាកំពូល​ជា​ច្រើនរូប ក៏ដូចជាជនស៊ីវិលនៅក្នុងការវាយប្រហារដ៏អាក្រក់បំផុតចំពោះសាធារណរដ្ឋឥស្លាម​ គិត​ចាប់តាំងពីសង្រ្គាមឆ្នាំ​១៩៨០​​ជាមួយអ៊ីរ៉ាក់។

អ៊ីរ៉ង់ ​បាន​សងសឹកវិញ​ដោយ​ការ​ផ្លោង​​មីស៊ីល​លើ​ទីតាំង​យោធា​ ហេដ្ឋារចនាសម្ព័ន្ធ និង​ទីក្រុង​របស់​អ៊ីស្រាអែល។ សហរដ្ឋ​អាមេរិក​បាន​ចូល​រួម​​ក្នុង​សង្រ្គាម​នៅ​ថ្ងៃ​ទី​២២​ខែ​មិថុនា ដោយ​ការ​​ទម្លាក់​គ្រាប់​ខ្នាត​ធំ​លើ​រោងចក្រ​នុយក្លេអ៊ែរ​​ចំនួន​៣​របស់​អ៊ីរ៉ង់ដូចជា Fordo, Natanz និង Isfahan៕

អត្ថបទ៖ សុខ សុវណ្ណ

ចុចអាន៖ សមាជិកសភាអាមេរិក ស្នើច្បាប់អនុញ្ញាតឲ្យ ត្រាំ ផ្តល់ B-2 ទៅអ៊ីស្រាអែល ទុកវាយអ៊ីរ៉ង់ ថ្ងៃមុខ