ត្រាំ ទុកពេល៥០ថ្ងៃឲ្យ ពូទីន បើមិនព្រមបញ្ចប់សង្គ្រាមនៅអ៊ុយក្រែន អាមេរិកនឹងប្រើធម៌ក្តៅ

បន្ទាប់ពីរងពាក្យរិះគន់ជុំវិញការអសមត្ថភាពដោះស្រាយជម្លោះរុស្ស៊ី-អ៊ុយក្រែន មិនដូចការអួតអាងពីដំបូង លើកនេះប្រធានាធិបតីអាមេរិក ដូណាល់ ត្រាំ បានប្រកាសប្រើធម៌ក្តៅដោយគំរាមថា លោកទុកពេលឲ្យមេដឹកនាំវិមានក្រឹមឡាំង វ្ល៉ាឌីមៀរ ពូទីន ៥០ថ្ងៃដើម្បីឈានដល់កិច្ចព្រមព្រៀងបញ្ចប់សង្គ្រាម បើមិនដូច្នោះទេ រដ្ឋាភិបាលទីក្រុងវ៉ាស៊ីនតោន នឹងដាក់ពន្ធ១០០%លើទីក្រុងមូស្គូនិងពន្ធបន្ទាប់បន្សុំ ហើយបញ្ជូនសព្វាវុធកាន់តែច្រើនទៅឲ្យទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបពិភាក្សាជាមួយអគ្គលេខាធិការអង្គការណាតូ ម៉ាក រូតេ នៅការិយាល័យរាងពងក្រពើកាលពីថ្ងៃចន្ទទី១៤ខែកក្កដាឆ្នាំ២០២៥ លោក ត្រាំ និយាយថា «យើងអត់សប្បាយចិត្តទេចំពោះរុស្ស៊ី ហើយយើងនឹងដាក់ពន្ធធ្ងន់ធ្ងរបំផុតរហូតដល់១០០%លើដៃគូពាណិជ្ជកម្មរបស់ពួកគេ ប្រសិនបើគ្មានកិច្ចព្រមព្រៀងសន្តិភាពក្នុងរយៈពេល៥០ថ្ងៃ»។

ជុំវិញការដាក់ពន្ធនេះដែរ មន្ត្រីសេតវិមានបានបញ្ជាក់ប្រាប់ CNN ថា នៅពេលប្រធានាធិបតីសំដៅលើ «ពន្ធបន្ទាប់បន្សំ» លោកចង់មានន័យថា ជាពន្ធ១០០%លើរុស្ស៊ីនិងទណ្ឌកម្មបន្ទាប់បន្សំលើប្រទេសផ្សេងទៀតដែលទិញប្រេងពីរុស្ស៊ី។ សហរដ្ឋអាមេរិកធ្វើពាណិជ្ជកម្មតិចតួចបំផុតជាមួយរុស្ស៊ី ដែលធ្វើឲ្យទណ្ឌកម្មបន្ទាប់បន្សំជារឿងចាំបាច់ត្រូវធ្វើ។

ទន្ទឹមនោះ លោកត្រាំក៏ប្រកាសបញ្ជូនសព្វាវុធទៅឲ្យអ៊ុយក្រែន តាមរយៈអង្គការណាតូ ដែលនឹងគ្រប់គ្រងទាំងការទូទាត់និងការចែកចាយផងដែរ។

មុននេះ លោក ត្រាំ ប្រកាសថា សហរដ្ឋអាមេរិកនឹងបញ្ជូន​ប្រព័ន្ធមីស៊ីលការពារអាកាស Patriot ទៅឲ្យអ៊ុយក្រែន ខណៈប្រព័ន្ធទាំងនេះត្រូវការជាចាំបាច់ដើម្បីជួយលោក ហ្សេលេនស្គី ការពារទីក្រុងរបស់ខ្លួនពីការវាយប្រហារដោយយន្តហោះគ្មានមនុស្សបើក និងមីស៊ីលរុស្ស៊ី។

ទោះបីជាយ៉ាងណាក៏ដោយ លោកមិនបានបញ្ជាក់ឡើយថាតើប្រព័ន្ធ Patriot នឹងត្រូវបញ្ជូនទៅប៉ុន្មាន ប៉ុន្តែលោកបំភ្លឺថា ការចំណាយនឹងត្រូវសងវិញដោយ​សហភាពអឺរ៉ុបឬសម្ព័ន្ធមិត្តណាតូ។ លោក ត្រាំ និយាយថា «ជា​ចម្បង​ យើង​នឹងបញ្ជូនពួកគេនូវសម្ភារៈយោធាទំនើបៗជាច្រើន។ ពួកគេនឹងបង់ប្រាក់​​ឲ្យ​យើង ១០០​% សម្រាប់រឿងនោះ ហើយនោះជាអ្វីដែលយើងចង់បាន»។

សូមជម្រាប​ថា លោក ​ត្រាំ ​កាន់តែ​​បង្ហាញ​ការ​​មិន​ពេញចិត្ត​ជាមួយ​​​លោក លោក ពូទីន ដោយសារ​​​​​ប្រធានាធិបតី​រុស្ស៊ី​​​ប្រឆាំង​នឹង​ការ​ប៉ុនប៉ង​របស់​​លោក​​ក្នុងការ​ចរចា​បទឈប់បាញ់​៕

អត្ថបទ៖ សុខ សុវណ្ណ

ចុចអាន៖ អាមេរិកនឹងបញ្ជូន​ខែល​ការពារ​អាកាស Patriot ទៅ​កាន់​អ៊ុយក្រែន