ព័ត៌មានអន្ដរជាតិ

អាមេរិកមិនចង់ឃើញសង្គ្រាម រុស្ស៊ី-អ៊ុយក្រែន បន្ត ខណៈរុស្ស៊ីបង្កើនការវាយប្រហារ

បានផុស

២ ខែ មុន

នៅ

ថ្ងៃអង្គារ ២៦ ឧសភា ២០២៦

ដោយ

រដ្ឋមន្ត្រីការបរទេសអាមេរិក លោក Marco Rubio អះអាងថា សហរដ្ឋអាមេរិកនៅតែមានឆន្ទៈសម្របសម្រួល ចំពោះសង្គ្រាមរវាងរុស្ស៊ីនិងអ៊ុយក្រែន បន្ទាប់ពីទីក្រុងមូស្គូបានបើកការវាយប្រហារដ៏ធំមួយលើទីក្រុងកៀវកាលពីថ្ងៃទី២៤ មួយថ្ងៃបន្ទាប់រុស្ស៊ីជំរុញឱ្យជនបរទេស មន្រ្តីទូត ចាកចេញពីទីក្រុងរបស់អ៊ុយក្រែនជាបន្ទាន់។

យោងតាមសារព័ត៌មាន TRT World ចុះផ្សាយថ្ងៃទី២៦ ខែឧសភា ឆ្នាំ២០២៦ ការអំពាវនាវផ្នែកការទូតបានកើតឡើង បន្ទាប់ពី លោក Rubio បានជួបសន្ទនាតាមទូរស័ព្ទជាមួយរដ្ឋមន្ត្រីការបរទេសរុស្ស៊ី លោក Sergey Lavrov ទាក់ទងនឹងវិបត្តិដែលកំពុងកើនឡើង។

លោក Rubio ប្រាប់អ្នកយកព័ត៌មាន អំឡុងពេលទស្សនកិច្ចផ្លូវការទៅកាន់ប្រទេសឥណ្ឌាថា៖ « រាល់ពេលយើងឃើញការវាយប្រហារធំៗពីម្ខាងទៅម្ខាងទៀត វាជាការរម្លឹកថាហេតុអ្វីបានជាសង្គ្រាមដ៏គួរឱ្យភ័យខ្លាចមួយបានអូសបន្លាយយូរជាងសង្គ្រាមលោកលើកទីពីរទៅទៀត? សង្រ្គាមត្រូវតែបញ្ចប់»។

រដ្ឋមន្ត្រីការបរទេសអាមេរិក លោក Marco Rubio ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្ថែមថា៖ « សហរដ្ឋអាមេរិកត្រៀមខ្លួនជាស្រេច ជួយគ្រប់យ៉ាងដែលយើងអាចធ្វើបាន ដើម្បីជួយសម្រួលដល់ការបញ្ចប់សង្គ្រាមនេះ ហើយសង្ឃឹមថានឹងមានលទ្ធផលល្អលេចឡើង នៅចំណុចណាមួយ»។

ការផ្តល់ជូនលើការសម្របសម្រួលនេះធ្វើឡើង បន្ទាប់ពីការព្រមានផ្លូវការ ពីលោក Lavrov ដែលបានជូនដំណឹងដល់ លោក Rubio តាមទូរស័ព្ទថា កងកម្លាំងរុស្ស៊ីនឹងចាប់ផ្តើមការវាយប្រហារជាប្រព័ន្ធលើទីតាំងយោធា និងមជ្ឈមណ្ឌលនានាប្រើប្រាស់ដោយកងទ័ពអ៊ុយក្រែននៅទីក្រុងកៀវ។

យោងតាមសេចក្តីថ្លែងការណ៍មួយចេញផ្សាយដោយទីភ្នាក់ងារសារព័ត៌មានរុស្ស៊ី Tass លោក Lavrov និយាយថា៖ « ប្រតិបត្តិការនេះគឺស្ថិតនៅលើការណែនាំដោយផ្ទាល់របស់ប្រធានាធិបតី ពូទីន ដើម្បីឆ្លើយតបទៅនឹងការវាយប្រហារជាបន្តបន្ទាប់របស់អ៊ុយក្រែនប្រឆាំងនឹងហេដ្ឋារចនាសម្ព័ន្ធស៊ីវិលក្នុងប្រទេសរុស្ស៊ី»។

អំឡុងពេលនៃការហៅទូរស័ព្ទ លោក Lavrov បានជំរុញឱ្យសហរដ្ឋអាមេរិកធានាការជម្លៀសបុគ្គលិកការទូតរបស់ខ្លួន និងពលរដ្ឋអាមេរិកផ្សេងទៀតចេញពីរដ្ឋធានីអ៊ុយក្រែនជាបន្ទាន់៕

សម្រួល៖ ណឺ មិនា