ព័ត៌មានអន្ដរជាតិ

ចិន ច្រានចោលព័ត៌មានក្លែងក្លាយរបស់ថៃ ដែលថាខ្លួនផ្តល់អាវុធថ្មីដល់កម្ពុជា

បានផុស

១១ ខែ មុន

នៅ

ថ្ងៃអាទិត្យ ២៧ កក្កដា ២០២៥

ដោយ

Chheang

ប្រទេសចិន បានច្រានចោលយ៉ាងដាច់អហង្ការចំពោះរបាយការណ៍មិនពិតរបស់ប្រទេសថៃ ដែលចោទថា ទីក្រុងប៉េកាំងបានផ្គត់ផ្គង់សម្ភារៈយោធាថ្មីៗដល់កម្ពុជា ក្នុងអំឡុងពេលជម្លោះព្រំដែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ Independent កាលពីថ្ងៃទី២៦កក្កដា លោក Sheng Wei នាយករងផ្នែកអាស៊ីនៃការិយាល័យសហប្រតិបត្តិការយោធាអន្តរជាតិ (OIMC) នៃកងទ័ពរំដោះប្រជាជនចិន បាននិយាយថា សម្ភារៈយោធាចិនទាំងអស់ ដែលកម្ពុជាមាននាពេលបច្ចុប្បន្ន គឺជា«មរតកនៃគម្រោងកិច្ចសហប្រតិបត្តិការជាប្រវត្តិសាស្ត្រ»តែប៉ុណ្ណោះ។

លោក Sheng Wei បានមានប្រសាសន៍ថា «ចាប់តាំងពីភាពតានតឹងបានចាប់ផ្តើមនៅតាមបណ្តោយព្រំដែនកម្ពុជា-ថៃ ប្រទេសចិន មិនបានផ្តល់ឧបករណ៍យោធាណាមួយដល់កម្ពុជាសម្រាប់ប្រើប្រាស់ប្រឆាំងនឹងប្រទេសថៃនោះទេ។ សម្ភារៈយោធាចិនទាំងអស់ដែលកម្ពុជាកាន់កាប់នាពេលបច្ចុប្បន្ន គឺជាមរតកនៃកិច្ចព្រមព្រៀងសហប្រតិបត្តិការកន្លងមក»។ លោកក៏បានជំរុញសាធារណជនកុំឲ្យជឿព័ត៌មានក្លែងក្លាយដែលបង្កើតឡើងដោយក្រុមមនុស្សអាក្រក់ផងដែរ។

សូមជម្រាបថា ប្រព័ន្ធផ្សព្វផ្សាយមួយចំនួនរបស់ថៃ បានប្រឌិតរឿងមិនពិត ដើម្បីមួលបង្កាច់កម្ពុជានៅលើឆាកអន្តរជាតិ។ តួយ៉ាងដូចជា ការប្រឌិតព័ត៌មានដែលថាកម្ពុជាបានផ្ទុះអាវុធជាមួយឡាវ បន្ទាប់ពីយោធាថៃបានបដិសេធថាខ្លួនមិនមែនជាអ្នកផ្លោងគ្រាប់ចូលទឹកដីឡាវនោះទេ ហើយបានចោទកម្ពុជាជាអ្នកបាញ់ដោយមិនមានមូលដ្ឋានច្បាស់លាស់។ យ៉ាងណាមិញ កងទ័ពប្រជាជនឡាវ បានចេញមកបកអាក្រាតរបាយការណ៍មិនពិត និងមានចេតនាដ៏អាក្រក់របស់ថៃ ដោយអះអាងថា កម្ពុជា-ឡាវពុំមានការផ្ទុះអាវុធទាល់តែសោះ ដែលនេះឆ្លុះបញ្ចាំងថា ព័ត៌មានរបស់ថៃមួយចំនួនគ្មានវិជ្ជាជីវៈ និងសម្បូរទៅការបំផ្លើសខុសពីការពិត៕

ដោយ៖ ឈាង

ចុចអាន៖ ឡាវបដិសេធមិនបានផ្ទុះអាវុធជាមួយកម្ពុជាដូចការផ្សាយរបស់ថៃទេ