មីយ៉ាន់ម៉ា បន្តទម្លាក់គ្រាប់បែកលើតំបន់នៅជាប់ព្រំដែនថៃ ធ្វើឲ្យពលរដ្ឋថៃឯណោះ ក៏រស់នៅមិនស្រណុក

នៅថ្ងៃអាទិត្យទី១៧ខែសីហាឆ្នាំ២០២៥ របបយោធាមីយ៉ាន់ម៉ា បានបន្តបញ្ជូនយន្តហោះចម្បាំង២គ្រឿងទៀត ទៅទម្លាក់គ្រាប់បែកលើតំបន់ Mochi នៃស្រុក Loikaw ក្នុងរដ្ឋ Kayah ដែលស្ថិតនៅជាប់ខេត្ត Mae Hong Son របស់ថៃ ធ្វើឲ្យពលរដ្ឋថៃ រស់នៅទីនោះ ក៏មិនស្រណុកចិត្តដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការវាយប្រហារថ្មីនេះ យន្តហោះបានកម្ទេចមន្ទីរពេទ្យ Do-Ka-Hlo សឹងតែទាំងស្រុង ព្រមទាំងបណ្តាលឲ្យជនស៊ីវិលចំនួន៦នាក់ រងរបួសផងដែរ។

តាមការបញ្ជាក់ពីកងទ័ព KA, យន្តហោះទាំង២គ្រឿងនោះ គឺជាប្រភេទ YAK-130 របស់កងទ័ពអាកាសមីយ៉ាន់ម៉ា ដោយទម្លាក់គ្រាប់បែកទម្ងន់ ២២៦គីឡូក្រាម ចំនួន៤គ្រាប់ បង្កការខូចខាតធ្ងន់ធ្ងរដល់មន្ទីរពេទ្យ។

ទោះបីជាយ៉ាងណាក៏ដោយ ការវាយប្រហារនោះ មិនបណ្តាលឲ្យអ្នកភូមិណាម្នាក់ បាត់បង់ជីវិតទេ។

កាលពីសប្តាហ៍មុន កងទ័ពមីយ៉ាន់ម៉ា ក៏បានបញ្ជូនយន្តហោះចម្បាំងទៅទម្លាក់គ្រាប់បែក ២៥គ្រាប់លើមូលដ្ឋានរបស់កងទ័ពរំដោះជាតិការ៉ែន (KNLA) ធ្វើឲ្យប្រជាជនត្រូវភៀសខ្លួន ឆ្លងទន្លេចូលទឹកដីថៃដែរ។

សូមជម្រាបជាថ្មី បន្ទាប់ពីរដ្ឋប្រហារយោធាឆ្នាំ២០២១មក ជម្លោះប្រដាប់អាវុធនៅមីយ៉ាន់ម៉ា បានកើនឡើងយ៉ាងខ្លាំងដោយ កងកម្លាំងការ៉ែន KNLA ដែលជាចលនាប្រដាប់អាវុធរបស់គណបក្សនយោបាយ Karen National Union (KNU) បានចូលរួមជាមួយកងកម្លាំងតស៊ូប្រជាធិបតេយ្យផ្សេងទៀតដូចជា People’s Defense Force – PDF ដើម្បីប្រយុទ្ធតតាំងនឹងរបបយោធា។

ការប្រយុទ្ធគ្នាភាគច្រើនកើតឡើងនៅក្នុង រដ្ឋកាយីន របស់មីយ៉ាន់ម៉ា ដែលមានព្រំដែនជាប់នឹងប្រទេសថៃ ខណៈការប្រយុទ្ធគ្នាទ្រង់ទ្រាយធំ តែងតែកើតឡើងនៅជុំវិញទីក្រុងយុទ្ធសាស្ត្រមួយចំនួនដូចជា Myawaddy ដែលជាច្រកពាណិជ្ជកម្មដ៏សំខាន់៕

អត្ថបទ៖ សុខ សុវណ្ណ

ចុចអាន៖ យន្តហោះចម្បាំងរបបសឹកមីយ៉ាន់ម៉ា វាយប្រហារលើក្បួនរថយន្តស៊ីវិលសម្លាប់មនុស្ស១៦នាក់