យន្តហោះចម្បាំងរបបសឹកមីយ៉ាន់ម៉ា វាយប្រហារលើក្បួនរថយន្តស៊ីវិលសម្លាប់មនុស្ស១៦នាក់

សារព័ត៌មាន Irrawaddy បានរាយការណ៍កាលពីថ្ងៃពុធថា យន្តហោះចម្បាំងរបស់របបយោធាមីយ៉ាន់ម៉ាបានបើកការវាយប្រហារតាមផ្លូវអាកាសទៅលើក្បួនរថយន្តស៊ីវិលមួយនៅក្នុងតំបន់ Sagaing ភាគពាយ័ព្យប្រទេសមីយ៉ាន់ម៉ា ដោយបានសម្លាប់មនុស្ស១៦ នាក់ និង ២០នាក់ផ្សេងទៀតរងរបួស។

ការវាយប្រហារនេះបានកើតឡើងកាលពីថ្ងៃចន្ទ ដោយមានយន្តហោះយោធាចំនួនប្រាំគ្រឿងបានទម្លាក់គ្រាប់បែកលើរថយន្តដឹកទំនិញមួយក្រុមដែលជាប់គាំងអស់រយៈពេលជាច្រើនថ្ងៃដោយសារការប៉ះទង្គិចគ្នារវាងកងកម្លាំងយោធា និងក្រុមជនជាតិភាគតិចប្រដាប់អាវុធនៅជិតផ្លូវប្រសព្វរវាងតំបន់ Sagaing និង Shwebo ។

លើសពីនេះក្បួន​ដែល​ដឹកប្រជាជនភៀសខ្លួន និង​អ្នក​ធ្វើ​ដំណើរ​ផ្សេង​ទៀត​បាន​ជាប់​គាំង​កណ្តាល​ការ​ប្រយុទ្ធ​គ្នា​។ សាក្សី​បាន​និយាយ​ថា នៅលើផ្លូវ​មាន​មនុស្ស​កកកុញ​នៅ​ពេល​របបសឹក​ទម្លាក់គ្រាប់បែកលើ។ ការវាយប្រហារនេះបាន​បំផ្លាញ​រថយន្ត​ដឹកទំនិញ និង​សាំង​យ៉ាងតិច​៨​គ្រឿង ខណៈ​ហាង និង​ផ្ទះ​ជាច្រើន​ក៏​រង​ការខូចខាត​ផងដែរ​។ សាកសពចំនួន៧ត្រូវបានរកឃើញកាលពីថ្ងៃចន្ទ និងចំនួន៩ទៀតរកឃើញនៅថ្ងៃបន្ទាប់។

គួរបញ្ជាក់ថាការវាយប្រហារនេះបានបង្ហាញពីការកើនឡើងយ៉ាងធ្ងន់ធ្ងរមួយទៀតនៅក្នុងយុទ្ធនាការយោធារបស់របបសឹកមីយ៉ាន់ម៉ានៅក្នុងតំបន់ Sagaing ដែលរងគ្រោះដោយជម្លោះ និងជាបន្ទាយរឹងមាំនៃកងកម្លាំងតស៊ូប្រឆាំងរបបសឹកចាប់តាំងពីរដ្ឋប្រហារឆ្នាំ ២០២១ ៕

អត្ថបទ៖ ប៊ុន សុភាព