ព័ត៌មានជាតិ

ទៅដើរលេងខេត្តឧត្តរមានជ័យ មិនគួររំលងតំបន់ទេសចរណ៍ទាំង ០៩ កន្លែងនេះ

បានផុស

៦ ខែ មុន

នៅ

ថ្ងៃព្រហស្បតិ៍ ១៥ ធ្នូ ២០២២

ដោយ

ខេត្តឧត្តរមានជ័យ ទោះបីនៅឆ្ងាយពីតំបន់ប្រជុំជនស្ថិតនៅជាប់ព្រំដែនថៃក៏មានកន្លែងដើរលេងកម្សាន្តជាច្រើនកន្លែង សម្រាប់ភ្ញៀវទេសចរ ដូចជារមណីយដ្ឋានទឹកធ្លាក់ តំបន់ប្រាសាទបុរាណ និងតំបន់ប្រវត្តិសាស្រ្តជាដើម។

កន្លែងទេសចរណ៍ទាំង ០៩ កន្លែងនេះ គឺគោលដៅទេសចរណ៍ដ៏ទាក់ទាញដែលភ្ញៀវទេសចរមិនគួរមើលរំលងសម្រាប់ដំណើរកម្សាន្តមកខេត្តឧត្តរមានជ័យ។

១. ទឹកជ្រោះដាចំប៉ី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទឹកជ្រោះដាចំប៉ី ឬក៏គេច្រើនហៅថា ទឹកធ្លាក់ល្អាងតាថុង,ទឹកធ្លាក់ចំបុី មានទីតាំងស្ថិតនៅ សង្កាត់អូរស្មាច់ ក្រុងសំរោង ខេត្តឧត្តរមានជ័យ និងមានចម្ងាយប្រហែល ៧០ គីឡូម៉ែត្រ ពីផ្សាររង្វង់មូលអន្លង់វែង។

ចំណុចទាក់ទាញ ដែលភ្ញៀវទេសចរចូលចិត្តទៅលេងទឹក, ពិកនិច, ដើរលេងគយគន់ទេសភាព។

២.ប្រាសាទខ្នារ

ប្រាសាទខ្នារ ជាប្រាសាទបុរាណវ័យចំណាស់មួយសាងសង់នៅសតវត្សទី ១០ ក្នុងរាជ្យព្រះបាទជ័យវរ្ម័នទី ៤។ ប្រាសាទនេះមានចម្លាក់ក្រឡោតទាបស្រស់ស្អាត រួមទាំងរូបទេពជាច្រើននៅលើផ្ទាំងថ្មធម្មជាតិ។ នៅតាមផ្លូវទៅប្រាសាទមានការរៀបចំដោយមាន ជណ្តើរឡើងធ្វើអំពីឈើចំនួន1181កាំ បត់បែនតាមចន្លោះផ្ទាំងថ្មតូចធំ និងព័ទ្ធជុំដោយដើមឈើតូចធំបង្កើតបានជាផ្ទាំងទស្សនីយភាពគួរជាទីគយគន់។

៣. ប្រាសាទដំរីទ្រោម

ប្រាសាទដំរីទ្រោម ស្ថិតនៅឃុំគោកមន ស្រុកបន្ទាយអំបិល ខេត្តឧត្តរមានជ័យ នៅលើជួរភ្នំដងរែក សាងសង់ឡើងនៅសតវត្សទី១១ ដល់ សតវត្សទី១៣។ ប្រាសាទនេះមានដុំថ្មមួយដុំមានរាងដូចសត្វដំរីទ្រោម ឱនដងខ្លួនដល់ដី រាង និង សណ្ឋាននេះបញ្ជាក់អោយឃើញថាប្រាសាទនេះ ជាទីកន្លែងដែលដំរីទ្រោមខ្លួនអោយព្រះរាជាយាងគង់លើខ្នងត្រង់ប្រាសាទនេះ។ មិនតែប៉ុណ្ណោះបារមីដំរីទ្រោមខ្លាំង ទើបគ្រប់គ្នាមានការជឿជាក់។

៤. ប្រាសាទតា ក្របី

ប្រាសាទតា ក្របី ចាប់ផ្តើមមានកេរ្តិ៍ឈ្មោះល្បីល្បាញក្រោយពេលទាហានកម្ពុជា និងថៃ វាយប្រយុទ្ធគ្នា ដើម្បីគ្រប់គ្រងប្រាសាទចំណាស់នេះ។ បច្ចុប្បន្នទីតាំងប្រាសាទមានទាំងទាហានខ្មែរថៃឈរជើង តែភ្ញៀវទេសចរនៅតែអាចទៅទស្សនាបានជាធម្មតា។

៥. ប្រសាទតា មាន់ធំ

ប្រាសាទតាមាន់ធំកសាងឡើងដើម្បីឧទ្ទិសដល់ព្រះសិវៈក្នុងព្រាហ្មញ្ញសាសនា នៅក្នុងសម័យអាណាចក្រអង្គរ ដែលមានទីតាំងស្ថិតនៅលើជួរភ្នំដងរែក។ ប្រសិនបើគ្មានដើមឈើនៅលើជម្រាលភ្នំនៅពីមុខប្រាសាទ គេនឹងឃើញមានទិដ្ឋភាពដ៏ស្អាតលើដីទំនាបរបស់កម្ពុជាឆ្ពោះទៅភាគខាងត្បូង ហើយប្រសិនបើគេចេញពីខ្លោងទ្វារប្រាសាទ គេអាចធ្វើដំណើរលើផ្លូវបុរាណ ដែលមកពីរាជធានីអង្គរ ចំណែកនៅខាងក្រោមមានស្រះទឹកបុរាណមួយ។

៦. រមណីយដ្ឋាន ដីរលុះធំ

រមណីយដ្ឋាន ដីរលុះធំ មានចម្ងាយ១៨គីឡូម៉ែត្រ ពីទីរួមខេត្តឧត្តរមានជ័យ។ រមណីយដ្ឋាននេះ កំពុងតែទាក់ទាញភ្ញៀវទេសចរជាតិ និងអន្តរជាតិទៅទស្សនាកម្សាន្ត ជាពិសេសគឺថ្ងៃឈប់សម្រាកចុងសប្តាហ៍ និងថ្ងៃបុណ្យធំៗ។

៧. ផ្ទះតាម៉ុក

ផ្ទះតាម៉ុក ស្ថិតនៅតាមបណ្ដោយផ្លូវលេខ ៦៨ ចម្ងាយប្រហែល ១០០ គីឡូម៉ែត្រ ពីទីរួមខេត្តឧត្តរមានជ័យ។ នៅទីនោះមានរូបសំណាកដែលនៅសេសសល់ពិពណ៌នាក្នុងកំឡុងពេលមេដឹកនាំខ្មែរក្រហមតស៊ូបង្ហូរឈាមប្រឆាំងនឹងរដ្ឋាភិបាល។

៨. វត្តប្រាសាទរាជាសំរោង

វត្តប្រាសាទរាជាសំរោង មានទីតាំងស្ថិតនៅក្រុងសំរោង ខេត្តឧត្តរមានជ័យ។ វត្តនេះមានការរៀបចំបានយ៉ាងល្អ និងមានវិហារដ៏ធំមួយមានគូរគំនូរទាក់ទងជាមួយពុទ្ធប្រវត្តិរបស់ព្រះសម្មាសម្ពុទ្ធផងដែរ។

០៩. អូស្មាច់

អូស្មាច់ជាច្រកព្រំដែននៅតាមព្រំដែនកម្ពុជា–ថៃ ចម្ងាយប្រហែល ៤១ គីឡូម៉ែត្រពីទីរួមខេត្តឧត្តរមានជ័យ។ ក្រៅពីច្រកសម្រាប់ការដោះដូរពាណិជ្ជកម្មនិងលំហូរអ្នកដំណើរ ក៏មានរៀបចំកន្លែងកម្សាន្តដូចជាកាស៊ីណូ ភោជនីយដ្ឋានល្អៗ និងសណ្ឋាគារប្រណីតៗ៕

ដោយ៖ ថារី

Related Topics:ខេត្តឧត្តរមានជ័យ