ស្ពានបេតុងអំណោយសម្តេចតេជោ ហ៊ុន សែន ដាក់ឱ្យដំណើរបន្ទាប់ពីបញ្ចប់សាងសង់ ១០០%

ស្ពានបេតុងថ្មីដ៏រឹងមាំ ត្រូវបានដាក់ឱ្យដំណើរការជាផ្លូវការ បន្ទាប់ពីស្ថាបនារួចរាល់ ១០០ % ដែលស្ពាននេះតភ្ជាប់ពីភូមិ៣ ទៅភូមិព្រៃឫស្សី សង្កាត់ព្រះពន្លា ក្រុងសិរីសោភ័ណ ក្នុងខេត្តបន្ទាយមានជ័យ។ ការអភិវឌ្ឍន៍ហេដ្ឋារចនាសម្ព័ន្ធនេះ គឺជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។

ការស្ថាបនាស្ពានបេតុងនេះ ជំនួសឱ្យស្ពានឈើព្រះពន្លា ដែលត្រូវបានបាក់ដោយទឹកជំនន់ អស់រយៈពេលច្រើនឆ្នាំមកហើយចាប់ពីឆ្នាំ ២០២០មក ដែលបានបង្កការលំបាកដល់ប្រជាពលរដ្ឋធ្វើដំណើរក្នុងរយៈកាលកន្លងមកនេះ។ យ៉ាងណាមិញ កាលពីថ្ងៃទី ៧ ខែវិច្ឆិកា​ ឆ្នាំ ២០២៥ មន្រ្តីក្រសួង និងមន្ទីរអភិវឌ្ឍន៍ជនបទខេត្ត បានចុះត្រួតពិនិត្យឃើញថាស្ថាបនាបាន ១០០% ហើយ។

លោក ជា យុទ្ឋារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ បានឱ្យដឹងថា ការងារស្ថាបនាស្ពានបេតុង(ស្ពានព្រះពន្លា)នេះមានប្រវែង៩០ម៉ែត្រ ទទឹង១០ម៉ែត្រ និងស្ថាបនាផ្លូវបេតុងសងខាងក្បាលស្ពានប្រវែង២០០ម៉ែត្រ ទទឹង១០ម៉ែត្រ កម្រាស់០.២ម៉ែត្រ តភ្ជាប់ពីភូមិ៣ ទៅភូមិព្រៃឫស្សី សង្កាត់ព្រះពន្លា ក្រុងសិរីសោភ័ណ និងអនុវត្តដោយនាយកដ្ឋានផ្លូវលំជនបទ នៃក្រសួងអភិវឌ្ឍន៍ជនបទ។

លោកបញ្ជាក់ថា ជាលទ្ធផលគិតមកដល់ថ្ងៃនេះអនុវត្តបាន១០០%ហើយ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា តាមរយៈលោក កែ គឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ និងលោកជំទាវ៕

ដោយ៖ ពៅ