ព័ត៌មានជាតិ

ចុះបញ្ជីពាណិជ្ជកម្មកាន់តែស្រួល ប្រើពេលឆាប់ មិនបាច់ចំណាយសេវាក្រៅ

បានផុស

១៤ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ការចុះបញ្ជីពាណិជ្ជកម្ម ត្រូវបានសម្រួលនីតិវិធីកាន់តែងាយស្រួល រហ័ស និងប្រសើរជាងមុន។ នេះបើតាមការអះអាងពីមន្រ្តីនៅនាយកដ្ឋានចុះបញ្ជីពាណិជ្ជកម្មនៃក្រសួងពាណិជ្ជកម្ម នៅក្នុងវេទិកាគយនិងសម្ព័ន្ធសមាគមសហគ្រាសធុនតូច និងមធ្យម (FASMEC)។

លោក ឱម តារាឫទ្ធិ ប្រធាននាយកដ្ឋានចុះបញ្ជីពាណិជ្ជកម្មនៃក្រសួងពាណិជ្ជកម្មបានរៀបរាប់ពីដំណើរការចុះបញ្ជីពាណិជ្ជកម្ម ដែលមុនឆ្នាំ ២០១៦ ការចុះបញ្ជីពាណិជ្ជកម្មត្រូវធ្វើឡើងដោយដៃទាំងអស់ តាំងពីការបំពេញពាក្យស្នើសុំ និងការសរសេរវិញ្ញាបនបត្រ ដែលត្រូវចំណាយពេលយូររហូតដល់ ១០ ថ្ងៃ។

ពីឆ្នាំ ២០១៦ ដល់ ២០២០ ក្រសួងពាណិជ្ជកម្មបានប្តូរមកប្រើប្រព័ន្ធស្វ័យប្រវត្តិកម្ម (អនឡាញ) ដោយផ្តល់វិញ្ញាបនបត្រជាទម្រង់ឌីជីថល និងអនុញ្ញាតឱ្យបង់ប្រាក់តាមប្រព័ន្ធធនាគារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់ពីឆ្នាំ ២០២០ រាជរដ្ឋាភិបាលក៏បានរៀបចំបង្កើតថ្នាលបច្ចេកវិទ្យារួមមួយ (CamDX) ដែលប្រមូលផ្តុំសេវាចុះបញ្ជីរបស់ស្ថាប័នសំខាន់ៗដែលមានក្រសួងពាណិជ្ជកម្ម អគ្គនាយកដ្ឋានពន្ធដារ និងក្រសួងការងារឱ្យស្ថិតនៅកន្លែងតែមួយ។

លោក ឱម តារាឫទ្ធិ បញ្ជាក់ថា «នីតិវិធីចុះបញ្ជីពាណិជ្ជកម្មតាមថ្នាលបច្ចេកវិទ្យា CamDX សម្រួលដល់អ្នកស្នើសុំគ្រាន់តែបំពេញព័ត៌មានតែមួយដង គឺស្ថាប័នពាក់ព័ន្ធទាំងអស់អាចទាញយកទៅប្រើប្រាស់បាន ដែលចំណេញពេលវេលា និងកាត់បន្ថយការបំពេញឯកសារផ្ទួនៗ»។

នៅក្នុងអាណត្តិថ្មីរបស់រដ្ឋាភិបាល ក្រសួងពាណិជ្ជកម្មក៏បានធ្វើសមញ្ញកម្មលើលិខិតបទដ្ឋានគតិយុត្តិនៃការចុះបញ្ជី ដែលកាលពីមុនមានលក្ខណៈដាច់ដោយឡែកពីគ្នាឱ្យមកនៅក្រោមប្រកាសតែមួយ ដើម្បីងាយស្រួលក្នុងការពិនិត្យ និងគ្រប់គ្រង។

មន្រ្តីក្រសួងពាណិជ្ជកម្មបង្ហាញពីកំណែទម្រង់ថ្មីនេះមានដូចជា៖

-ការកំណត់វត្ថុអាជីវកម្ម ដើម្បីជួយសម្រួលដល់ម្ចាស់អាជីវកម្មក្នុងការចុះបញ្ជី ដែលកន្លងមកពេលម្ចាស់អាជីវកម្មទៅដាក់ពាក្យសុំបើកអាជីវកម្ម ជារឿយៗមិនបានដឹងថាតើមុខរបររបស់ពួកគាត់តម្រូវឱ្យមានការសុំអនុញ្ញាតពីស្ថាប័នគ្រប់គ្រងពាក់ព័ន្ធជាមុនឬយ៉ាងណានោះទេ។ ជាលទ្ធផល ពេលដាក់ពាក្យរួច ទើបដឹងថាត្រូវទាមទារលិខិតអនុញ្ញាតផ្សេងៗទៀត ដែលធ្វើឱ្យពួកគាត់ត្រូវរត់ចុះរត់ឡើង និងខាតពេលវេលា។

ដើម្បីដោះស្រាយបញ្ហានេះ ឥឡូវនេះមានការរៀបចំដាក់បង្ហាញយ៉ាងច្បាស់លាស់នូវបញ្ជីឈ្មោះប្រភេទមុខរបរណាខ្លះ ដែលតម្រូវឱ្យម្ចាស់អាជីវកម្ម ត្រូវតែសុំលិខិតអនុញ្ញាតពីស្ថាប័នមានសមត្ថកិច្ចពាក់ព័ន្ធជាមុនសិន ទើបអាចមកចុះបញ្ជីវត្ថុអាជីវកម្មនោះបាន។ ការធ្វើបែបនេះគឺដើម្បីផ្តល់ព័ត៌មាន និងឱ្យម្ចាស់អាជីវកម្មបានដឹងមុន ដើម្បីកុំឱ្យមានការលំបាក ឬខាតពេលវេលាដូចពេលមុនៗទៀត។

-ការតម្រូវឱ្យអភិបាលក្រុមហ៊ុនចុះហត្ថលេខាលើសេចក្តីប្រកាសសុចចិត្ត ដើម្បីបង្ការការលាងសម្អាតប្រាក់ ដែលឥលូវនេះត្រូវបានកែសម្រួលមកជាការពិនិត្យសាវតារបុគ្គលវិញ។

-លុបចោលលក្ខន្តិកៈ ដោយក្រុមហ៊ុនមិនចាំបាច់យកច្បាប់ដើមមកតម្កល់ផ្ទាល់នៅក្រសួងពាណិជ្ជកម្មទៀតឡើយ ពោលគឺការបញ្ចូលទៅក្នុងប្រព័ន្ធស្វ័យប្រវត្តកម្ម គឺចាត់ទុកជាផ្លូវការតែម្តង។ ក្រសួងក៏មានភ្ជាប់ QR Code ដើម្បីផ្ទៀងផ្ទាត់ភាពត្រឹមត្រូវផងដែរ។

-ការផ្លាស់ប្តូរនាយកសាខាក្នុងស្រុក៖ មិនតម្រូវឱ្យធ្វើការជូនដំណឹង ឬសុំការអនុញ្ញាតពីក្រសួងពាណិជ្ជកម្មទៀតនោះទេ។

-លេខាធិការក្រុមហ៊ុន៖ លែងតម្រូវឱ្យមានការតម្កល់ប្រាក់ ឬឆ្លងកាត់វគ្គបណ្តុះបណ្តាលពីក្រសួងទៀតហើយ។ អភិបាលក្រុមហ៊ុន ឬបុគ្គលណា ក៏អាចធ្វើជាលេខាធិការបានដែរ។

-ការរំលាយក្រុមហ៊ុន (ការលុបឈ្មោះ)៖ កាន់តែងាយស្រួល ដោយលែងតម្រូវឱ្យមានការធ្វើសវនកម្មពីសវនករដែលទទួលស្គាល់ដោយនិយ័តករទៀតហើយ។ ក្រុមហ៊ុនគ្រាន់តែជម្រះពន្ធរដ្ឋ និងបំណុលរបស់ខ្លួនរួចរាល់ គឺអាចស្នើសុំបិទបាន។

-ទប់ស្កាត់ការកែប្រែព័ត៌មានក្រុមហ៊ុន៖ ក្រសួងក៏លែងទទួលសំណើសុំទប់ស្កាត់ពីបុគ្គលដែលមានជម្លោះទៀតហើយ លុះត្រាតែមានដីកាសម្រេចពីតុលាការទើបក្រសួងអនុវត្តតាម។

ក្នុងវេទិកាគយ និងសម្ព័ន្ធសមាគមសហគ្រាសធុនតូចនិងមធ្យម លោក ឱម តារាឫទ្ធិ បង្ហាញពីទម្រង់សហគ្រាសនិងក្រុមហ៊ុនត្រូវចុះបញ្ជីពាណិជ្ជកម្មរួមមាន៖

–សហគ្រាសឯកបុគ្គល (ភាគច្រើនជាប្រភេទសហគ្រាសធុនតូច និងផ្ទុកពន្ធតូច)
-ក្រុមហ៊ុនសហកម្មសិទ្ធិ (សហកម្មសិទ្ធិទូទៅ និងសហកម្មសិទ្ធិមានកម្រិត)
-ក្រុមហ៊ុនបរទេស (សាខាក្រុមហ៊ុនបរទេស និងការិយាល័យតំណាងក្រុមហ៊ុនបរទេស)
-ក្រុមហ៊ុនមូលធន (ក្រុមហ៊ុនឯកជនទទួលខុសត្រូវមានកម្រិត និងក្រុមហ៊ុនមហាជនទទួលខុសត្រូវមានកម្រិត)
-សាខាក្រុមហ៊ុនក្នុងស្រុក

លោកថា រាល់ទម្រង់សហគ្រាសទាំងអស់ខាងលើ ត្រូវតែចុះបញ្ជីពាណិជ្ជកម្មរយៈពេល ១៥ ថ្ងៃ មុនពេលចាប់ផ្តើមធ្វើអាជីវកម្ម។

មន្រ្តីក្រសួងពាណិជ្ជកម្មបានរំលេចពីប្រសិទ្ធភាពនៃការចុះបញ្ជីពាណិជ្ជកម្មតាមប្រព័ន្ធ CamDX បើអ្នកស្នើសុំមានឯកសារគ្រប់គ្រាន់គឺប្រើពេលត្រឹមតែ ៣ ថ្ងៃ នៃថ្ងៃធ្វើការ ដើម្បីទទួលបានវិញ្ញាបនបត្រឌីជីថល។

ក្នុងវេទិកាគយ និងសម្ព័ន្ធសមាគមសហគ្រាសធុនតូច និងមធ្យមដែលមានការចូលរួមពីសហគ្រាសក្នុងស្រុកជាច្រើនផងនោះ មន្រ្តីនាយកដ្ឋានចុះបញ្ជីពាណិជ្ជកម្ម ក៏បង្ហាញពីឯកសារសំខាន់ៗសម្រាប់ចុះបញ្ជីពាណិជ្ជកម្ម ក្នុងនោះសម្រាប់សហគ្រាសឯកបុគ្គល (SME) តម្រូវការឯកសារមានដូចជា៖ ឈ្មោះសហគ្រាស (នាមករណ៍) ទីស្នាក់ការអចិន្ត្រៃយ៍ច្បាស់លាស់ អត្តសញ្ញាណប័ណ្ណ និងរូបថត។

ចំណែកក្រុមហ៊ុនមូលធនត្រូវការឯកសារមាន៖ ឈ្មោះសហគ្រាស (នាមករណ៍) ទីស្នាក់ការអចិន្ត្រៃយ៍ច្បាស់លាស់ អត្តសញ្ញាណប័ណ្ណ (អភិបាល និងម្ចាស់ភាគហ៊ុន) រូបថត និងលក្ខន្តិកៈ (ក្រសួងមានគំរូលក្ខន្តិកៈស្តង់ដារដែលស្រួលបំពេញ)។

តម្លៃសេវាចុះបញ្ជីក្រុមហ៊ុននៅក្រសួងពាណិជ្ជកម្ម គឺប្រមាណ ១ លាន ១០ ម៉ឺនរៀល (ជាង ២៥០ដុល្លារ)។

បន្ថែមពីនេះ លោកក្រើនរំលឹកពីកាតព្វកិច្ចដែលក្រុមហ៊ុនសហគ្រាសទាំងអស់ត្រូវតម្កល់ប្រតិវេទន៍ (Annual Declaration) ជាកំហិតរៀងរាល់ឆ្នាំ (អាចបង់មុន ៣ ខែនៃថ្ងៃគម្រប់ខួបចុះបញ្ជី) ដែលមានតម្លៃ ៨ ម៉ឺនរៀល (២០ដុល្លារ)។ ប្រសិនបើភ្លេច ឬបង់យឺតយ៉ាវ ក្រុមហ៊ុននឹងត្រូវ រងការពិន័យជាប្រាក់ចំនួន ២ លានរៀល ក្នុងមួយឆ្នាំៗ។

គិតត្រឹមខែមិថុនា ឆ្នាំ ២០២៦ បើតាមរបាយការណ៍ក្រសួងពាណិជ្ជកម្ម មានក្រុមហ៊ុនមូលធនសរុបជិត ៦ ម៉ឺន, សហគ្រាសឯកបុគ្គល (SME) មានប្រមាណ ៤ ម៉ឺន និង សាខាក្រុមហ៊ុនបរទេសជាង ៩០០ ដែលបានចុះបញ្ជីរួចរាល់។

សម្រាប់ចម្ងល់ពីការចុះបញ្ជីពាណិជ្ជកម្ម អាចទាក់ទងមកកាន់ Call Center របស់ក្រសួងពាណិជ្ជកម្មតាមលេខ ១២៦៦ សម្រាប់សាកសួរព័ត៌មានបន្ថែមផ្សេងៗ៕

ចុចអានបន្ត៖ ៦ ជំហានលម្អិត របៀបចុះបញ្ជីអាជីវកម្មតាមថ្នាលបច្ចេកវិទ្យា CamDX
ចុចអានបន្ត៖ ដើម្បីចុះបញ្ជីអាជីវកម្មតាមថ្នាលបច្ចេកវិទ្យា CamDX តម្រូវការឯកសារអ្វីខ្លះ?
ចុចអានបន្ត៖ សហគ្រាសនៅកម្ពុជា បែងចែកជាបួនទម្រង់ធំៗ មានចរិតលក្ខណៈខុសៗគ្នា