លោក ទេព អស្នារិទ្ធ៖ យុវជនត្រូវជ្រើសរើសផ្លូវក្លាយជា «ភ្នាក់ងារសុវត្ថិភាពព័ត៌មាន» ដើម្បី​ចៀស​ឆ្ងាយ​ពីព័ត៌មានក្លែងក្លាយ

លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បាន​ដាក់​សំណួរ​ពិចារណា​ដល់យុវសិស្សថា៖ ក្នុងនាមជាយុវជន តើប្អូនៗ​នឹង​ជ្រើសរើស​ផ្លូវ​មួយ​ដែលប្រឈមនឹងគ្រោះថ្នាក់នៃព័ត៌មានក្លែងក្លាយ ឬជ្រើសរើសផ្លូវមួយទៀតដែលក្លាយជា “ភ្នាក់ងារសុវត្ថិភាពព័ត៌មាន”?

សំណួរដែលមានលក្ខណៈ​ឱ្យមានការពិចារណានេះ មានគោលបំណងលើក​ទឹកចិត្ត​ដល់​យុវជន ជាពិសេសសិស្សានុសិស្ស ឱ្យចូលរួមយ៉ាងសកម្មក្នុងការការពារសន្តិសុខព័ត៌មានជាតិ។ ការងារនេះស្របទៅនឹងបេសកកម្មរបស់ក្រសួងព័ត៌មាន និងរាជរដ្ឋាភិបាល ក្នុងការ​ប្រយុទ្ធ​ប្រឆាំង​នឹង​ព័ត៌មានក្លែងក្លាយ។

ការចោទសួរនេះ ធ្វើឡើងក្នុងឱកាស ដែលលោកអញ្ជើញជាអធិបតី ក្នុងពិធីផ្សព្វផ្សាយ «យុទ្ធនាការ​ប្រយុទ្ធប្រឆាំងព័ត៌មានក្លែងក្លាយ» ជំហានទី២ ដែលបានរៀបចំឡើងនៅវិទ្យាល័យ សុខ អាន ថ្នល់បំបែក ស្ថិតក្នុងទ្រាំង ខេត្តតាកែវ ដោយ​មាន​សិស្សានុសិស្ស​ចូលរួម​ប្រមាណ​ជាង ១ ១០០នាក់។

ឆ្លើយតបនឹងសំណួរភ្លាមសិស្សានុសិស្សដែលបានចូលរួមក្នុងយុទ្ធនាការនេះ បានឆ្លើយ​យ៉ាង​ស្រុះ ព្រមៗគ្នាថា ៖ «ក្នុងនាមជាយុវជន យើងត្រូវជ្រើសរើសផ្លូវដែលក្លាយជា ភ្នាក់ងារសុវត្ថិភាពព័ត៌មានក្នុងសង្គម»។

លោក ទេព អស្នារិទ្ធ បានវាយតម្លៃខ្ពស់ និងកោតសរសើរចំពោះការប្តេជ្ញាចិត្តរបស់យុវសិស្ស ដែលបានជ្រើសរើសធ្វើជាភ្នាក់ងារសុវត្ថិភាពព័ត៌មានសម្រាប់សហគមន៍ និងសង្គមកម្ពុជា។

លោក បានជំរុញឱ្យយុវវ័យយើងប្រែក្លាយការប្តេជ្ញានេះទៅជាសកម្មភាពជាក់ស្តែង សម្រាប់ការអនុវត្តប្រចាំថ្ងៃ ដើម្បីចូលរួមទប់ស្កាត់ និងលុបបំបាត់ព័ត៌មានក្លែងក្លាយ ការផ្សាយ ឬចែករំលែកព័ត៌មានបែបបំពុល ប្រឌិតក្លែងបន្លំ ឱ្យអស់ពីក្នុងលំហព័ត៌មានក្នុងសង្គម។ លោកក៏បានលើកទឹកចិត្តយុវសិស្សទាំងអស់ ឱ្យ ប្រើប្រាស់ឧបករណ៍ស្មាតហ្វូន(smart phone) ឱ្យចំគោលដៅ នោះគឺ ការប្រើដែលបម្រើសកម្មដល់ការសិក្សាប្រកបដោយប្រសិទ្ធភាព។

លោកអ្នកនាំពាក្យក្រសួងព័ត៌មាន បានអំពាវនាវដល់ស្រទាប់យុវវ័យ ត្រូវប្រកាន់​ខ្ជាប់​នូវ​គោល​ការណ៍​ «៣កុំ ១ការពារ» គឺកុំ​ទាន់​ជឿ​ភ្លាម​តាម​អារម្មណ៍​ឬ​ការរំជើបរំជួល​នៅ​ពេល​ឃើញ​ព័ត៌មាន​ប្លែក​ដោយត្រូវផ្អាកហើយគិតសិន កុំទាន់ចែករំលែក​ប្រភព​មិន​ច្បាស់លាស់​ដើម្បី​ជៀសវាង​ការ​ចែកចាយ​មេរោគនៃព័ត៌មានក្លែងក្លាយ, និង​កុំ​ប្រហែស​ពេល​ប្រើប្រាស់​បណ្តាញ​សង្គម ដោយត្រូវមានស្មារតីប្រុងប្រយ័ត្នខ្ពស់ចំពោះព័ត៌មានហូរចូល និង​មិន​ត្រូវ​ចុច​លើតំណភ្ជាប់ (link) ចម្លែកឬមានភាពទាក់ទាញហួសហេតុឡើយ រួមផ្សំនឹង «១ការពារ» គឺការពារសន្តិសុខព័ត៌មានខ្លួនឯង៖ តាមរយៈការពង្រឹងអក្ខរកម្មព័ត៌មាន និងយកចំណេះដឹងនេះទៅចែករំលែកបន្តដល់មិត្តភក្តិ គ្រួសារ និងមនុស្សជុំវិញខ្លួនឱ្យបានយល់ដឹងទាន់ល្បិចកលនៃព័ត៌មានក្លែងក្លាយ៕