ព័ត៌មានជាតិ

ប្រទះឃើញមនុស្សស្លាប់នៅក្រោមសំណង់ស្ទាក់ទឹក បាតស្ទឹងសង្កែ សង្ស័យជាអំពើឃាតកម្ម

បានផុស

៥ years មុន

នៅ

ថ្ងៃសៅរ៍ ៥ មិថុនា ២០២១

ដោយ

សពបុរសម្នាក់ដែលមាននាទីជាអ្នកបើករថយន្តដឹកដី ត្រូវបានគេប្រទះឃើញដេកស្លាប់ ផ្កាប់មុខក្នុងថ្លុកឈាម នៅលើបេតុងបាតស្ទឹង ដែលជាចំណុចសំណង់ស្ទាក់ទឹកស្ទឹងសង្កែ ដែលធ្វើឲ្យប្រភពជាច្រើនមានការសង្ស័យថា អាចជាអំពើឃាតកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការភ្ញាក់ផ្អើលនេះ បានកើតឡើងនៅព្រឹកថ្ងៃទី៥ ខែមិថុនា ឆ្នាំ២០២១ នៅត្រង់ចំណុចសំណង់ស្ទាក់ទឹកមួយកន្លែង ស្ថិតក្នុងភូមិស្នាពីមុខ ឃុំព្រែកខ្ពប ស្រុកឯកភ្នំ ខេត្តបាត់ដំបង បន្ទាប់ពីបានឃើញសពបុរសម្នាក់ដេកស្លាប់ នៅក្នុងថ្លុកឈាមគួរឲ្យរន្ធត់ ដែលបុរសនោះមានឈ្មោះ វង់ ដារ៉ា ហៅវិចិត្រ អាយុ៣០ឆ្នាំ មានស្រុកកំណើតនៅភូមិស្វាយជ្រះ ឃុំស្វាយជ្រះ ស្រុកឈ្នួល ខេត្តក្រចេះ មានមុខរបរជាអ្នកបើករថយន្តដឹកដីនៅក្នុងការដ្ឋាននេះ។

ក្រោយពីកម្លាំងជំនាញខេត្តចុះទៅពិនិត្យជាក់ស្តែង គឺសង្កេតឃើញថា សពមានស្លាកស្នាមដាច់រលាត់ទៅលើរាងកាយ ពិសេសនៅត្រង់ក្បាលនិងលើផ្ទៃមុខ ដោយសពមានសភាពដេកស្លាប់ផ្កាប់មុខទៅលើបេតុងបាតស្ទឹង និងមានឈាមជោកជាំ បន្ទាប់ពីបានផ្ងារសពឡើងគឺឃើញថា ខោជើងវែងដែលសពស្លៀក គឺគេបានរូតខោបើកហើយព្រមទាំងបានបញ្ចេញលិង្គមកខាងក្រៅខោលីអូបន្ថែមទៀត។

តាមការសន្និដ្ឋានជាបឋម គឺលោកស្នងការរង លឹម ពុទ្ធិឡា បានលើកឡើងថា អាចជាការឈរនោមភ្នាក់ស្នៀត ព្រោះកាលពីយប់ថ្ងៃទី៤ បុរសរូបនេះមានការផឹកស៊ីស្រវឹង ដែលគេសង្ស័យថា អាចដើរទៅលើសំណង់ដើម្បីនោម ប៉ុន្តែជាចៃដន្យច្រត់ខុសបង្កាន់ដៃ បណ្តាលឲ្យធ្លាក់មកបាតស្ទឹងតែម្តង ដែលមានកម្ពស់រហូតដល់ ១០,៦០ ម៉ែត្រឯណោះ ទើបបណ្តាលឲ្យស្លាប់តែម្តង។