ទិញកាំភ្លើងបាញ់គំរាមប្រ​ពន្ធ គ្រាដែលខ្លួន ពាក់ព័ន្ធជា​មួយ​ស្រីក្មេង ត្រូវ​សមត្ថកិច្ច​ចាប់ខ្លួន

បុរសម្នាក់ត្រូវសមត្ថកិច្ច​ចាប់ខ្លួន​បន្ទាប់ពី​បាន​លួច​ទិញ​អាវុធ ខុសច្បាប់ដើម្បីទុកបាញ់គំរាមប្រពន្ធ ហើយបានធ្វើការបាញ់ចំនួន ២គ្រាប់។​

ហេតុការណ៍នេះ មានការភ្ញាក់ផ្អើលកាលពីថ្ងៃទី ៦ ខែកក្កដា វេលាម៉ោង ៧យប់ នៅចំណុចភួមិរូង២ ឃុំព្រៃត្រឡាច ស្រុករុក្ខគិរី ខេត្តបាត់ដំបង។

បុរសជនសង្ស័យមានឈ្មោះ ហ៊ាន វុទ្ធី អាយុ ៤៩ឆ្នាំ រស់នៅភូមិឃុំកើតហេតុ ជនដែលកាន់អាវុធនៅដៃនោះមានឈ្មោះ ហ៊ាន វុទ្ធី ភេទប្រុស អាយុ ៤៩ ឆ្នាំ រស់នៅភូមិ ឃុំ ខាងលើ ដែលបានបាញ់គំរាមកំហែងទៅលើប្រពន្ធឈ្មោះ ឆោម អេម អាយុ ៥៣ ឆ្នាំ ដែលគេបានយកអាវុធខ្លីម៉ាកk59 ទៅបាញ់នៅខាងមុខផ្ទះចំនួន ២ គ្រាប់ ធ្វើឱ្យប្រជាពលរដ្ឋក្នុងភូមិភ័យខ្លាច។

ក្រោយពីបានទទួលព៌ត័មានភ្លាម កំលាំង អធិការដ្ឋាននគរបាលស្រុក សហការជាមួយកំលាំងប៉ុស្តិ៍ព្រៃត្រឡាច បានចុះបង្ក្រាបឃាត់ខ្លួនជនឈ្មោះ ហ៊ាន វុទ្ធី និងដកហូតបានអាវុធខ្លី ១ ដើម ម៉ាកk59 បង់១ និង គ្រាប់ចំនួន ៣ គ្រាប់។

នៅចំពោះមុខសមត្ថកិច្ចជនសង្ស័យបានសារភាពថា កន្លងមកខ្លួនធ្លាប់លែងលះជាមួយប្រពន្ធម្តងរួចមកហើយ ដោយបានទៅជាប់ជាមួយស្រីក្មេងម្នាក់ ថែមទាំងបានកូន២នាក់ទៀតផង ដោយការចុះទៅសែនជាមួយស្រីក្មេងនោះ ប្រពន្ធបានអោយលុយចំនួន៥០០០ដុល្លារផងដែរដើម្បីអោយឈប់ត្រឡប់មកវិញ។

ជនសង្ស័យបានបន្តថា ក្រោយមកខ្លួនក៏បានឡើងទៅភ្នំពេញដើម្បីទិញថ្នាំបាញ់ស្មៅពេលរដូវធ្វើចំការ ប៉ុន្តែពេលឡើងទៅដល់ក៏បានជួបពួកម៉ាក ដោយគេបានណែនាំអោយខ្លួនទិញកាំភ្លើងយកមកទុកប្រើប្រាស់ ហើយខ្លួនក៏មានចេត​នាយកមកទុកគំរាមប្រពន្ធកុំឲ្យរករឿងពេក។

ទីបំផុតថ្មីៗនេះខ្លួនក៏បានមកសុំជាជាមួយប្រពន្ធដើមវិញ លុះនៅល្ងាចមិញនេះប្រពន្ធចាប់ផ្តើមរអ៊ូរទាំខ្លាំងពេក ទើបទ្រាំមិនបានខ្លួនក៏ទាញយកកាំភ្លើងមកបាញ់ទៅលើចំនួន២គ្រាប់ ហើយក៏ត្រូវប៉ូលិសចាប់ខ្លួនតែម្តង។

បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញរៀបចំឯកសារដើម្បីបញ្ជូនទៅកាន់តុលាការហើយ ពាក់ព័ន្ធនឹងការប្រើប្រាស់អាវុធខុសច្បាប់ និងបទគំរាមកំហែងអាយុជីវិតផងដែរ៕ ដោយៈ សោ និយមរ័ត្ន