សន្តិសុខសង្គម

មិនដឹងមានបញ្ហាអ្វី បុរសម្នាក់ ជិះរថយន្តសុខៗ ដកកាំភ្លើងបាញ់ទៅលើមេឃ ៥ គ្រាប់ រួចគេចខ្លួនបាត់ នៅបឹងកក់

បានផុស

៧ ខែ មុន

នៅ

ថ្ងៃអាទិត្យ ២៨ កញ្ញា ២០២៥

ដោយ

អ៊ិន ពិសី

បុរសម្នាក់ ជិះរថយន្តមិនចាំម៉ាក បានដកកាំភ្លើងបាញ់រះឡើងលើមេឃចំនួន ៥ គ្រាប់ បង្កឲ្យមានការភ្ញាក់ផ្អើលនៅក្នុងបឹងកក់។

ហេតុការណ៍នេះបានកើតឡើងកាលពីវេលាម៉ោង ១២ និង ៣០ នាទីយប់រំលងអធ្រាត្រឈានចូលថ្ងៃទី ២៨ ខែកញ្ញា ឆ្នាំ ២០២៥ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

បើតាមការបញ្ជាក់ពីពលរដ្ឋនៅក្បែរនោះបានឲ្យដឹងថា មុនកើតហេតុពួកគាត់កំពុងនិយាយគ្នាលេងនៅមុខផ្ទះ ស្របពេលនោះក៏បានឮសំឡេងផ្ទុះយ៉ាងខ្លាំងចំនួន ២ ដង។ ខណៈនោះគាត់បានរត់ចេញមកមើលស្មានថា ផ្ទុះហ្គាស ប៉ុន្តែចៃដន្យ ក៏ប្រទះឃើញ ដៃបុរសម្នាក់ កាន់កាំភ្លើង ភ្ជង់ឡើងទៅលើមេឃ ចេញពីខាងក្នុងរថយន្តមិនចាំម៉ាក ១ គ្រឿង រួចធ្វើសកម្មភាពបាញ់ទៅលើមេឃចំនួន ៣ គ្រាប់បន្ថែមទៀត រួចក៏បើករត់គេចខ្លួនបាត់ស្រមោល។ ភ្លាមៗ គាត់ក៏ប្រញាប់ទាក់ទងរកសមត្ថកិច្ចចុះមកអន្តរាគមន៍ផងដែរ។

ក្រោយកើតហេតុកម្លាំងសមត្ថកិច្ច និងកងរាជអាវុធហត្ថ ចុះមកដល់ទីតាំងខាងលើ និងបានប្រមូលគ្រាប់កាំភ្លើង និងបន្តស៊ើបអង្កេត និងរកមុខជនសង្ស័យ ដើម្បីធ្វើការទៅតាមនីតិវិធីច្បាប់៕

អត្ថបទ ៖ រដ្ឋា