ដាំស្មៅចំណីសត្វ បានផលទាំងពូជ ទាំងលក់ និងស្លឹកជាចំណីសត្វ

ពូជស្មៅបីប្រភេទ ដែលនាំចូលពីប្រទេសថៃ ត្រូវបានកសិករខ្មែរបានសិក្សាស្វែងយល់​​យក​ពូជ​មក​ដាំ​ហើយផ្តល់ការផ្គត់ផ្គង់សម្រាប់ជាចំណីសត្វ​នៅទូទាំង២៥ខេត្តក្រុង។

នេះជាការអះអាង​របស់កសិករខ្មែរម្នាក់នៅស្រុកភ្នំស្រួច ខេត្តកំពង់ស្ពឺ​ ដែល​បាន​ដាំ​ស្មៅ​បីប្រភេទនេះ​សម្រាប់​ចំណីសត្វ​។ លោក ម៉ា ទីន ដែលបានដាំស្មៅបីប្រភេទ​ លើផ្ទៃដីដំបូង​ជាង១​ហិកតា​ ដោយការប្រើ​ប្រាស់​ទុនតិចតួចប៉ុណ្ណោះ ។

ឈ្មោះស្មៅទាំងបីប្រភេទ​ ដែលនាំចូលពីប្រទេសថៃ​ ​មាន​ឈ្មោះ​ថា ស្មៅ​ផ្អែម​អ៊ី​ស្រា​អែល ស្មៅណេណា និងស្មៅឃីង​ហ្គ្រាស់​។លោក ម៉ា ទីន បានដាំស្មៅ​ប្រភេទ​នេះ​អស់​រយៈពេលបីឆ្នាំ​មកហើយ​ដោយប្រើរយៈ​ពេលដាំ១ខែកន្លះ ទៅ២ខែ ដោយ​ដាក់​ជីអាចម៍គោជា​ប្រ​ចាំ​ហើយរដូវដែល​ដាំស្មៅ​ទាំងនោះ គឺក្នុងកំឡុង​ខែមេសា ពេលធ្លាក់ភ្លៀងតិចៗដោយ​មិនចំណាយទឹក​ច្រើន​នោះទេ។

ប្រភេទស្មៅឈ្មោះ ណេណា​និងស្មៅ ឃីងហ្គ្រាស់ សម្បូររោមច្រើន សម​ជាចំណីរបស់​សត្វជើង៤​ទំពាអៀង​មាន គោ ក្របី ពពែ ចៀម ដោយឡែកចំពោះស្មៅផ្អែមអ៊ីស្រាអែល ស្លឹក​របស់វាជាចំណីរ​បស់សត្វគ្រប់​ប្រ​ភេទ​។ លោក ម៉ា ទីន បញ្ជាក់ទៀតថា បីឆ្នាំមកនេះ លោកមាន​គម្រោងដាំដុះ​ស្មៅបីប្រភេទ​លើផ្ទៃដី២​ហិកតា​បន្ថែម​ទៀត ​ដោយសារតម្រូវការអ្នកដាំដុះច្រើននៅទូទាំង២៥ខេត្តក្រុង។

​អ្នកដាំស្មៅរូបនេះ បញ្ជាក់ថា បច្ចុប្បន្ននេះ​មិនមានទិញពូជពីក្រៅនោះទេ តែធ្វើការបណ្តុះដើមខ្លួន​ឯង​ដោយ​ក្នុងនោះស្មៅផ្អែម​អ៊ីស្រាអែល​ មួយកង់បានថ្លៃ១៥០រៀល ស្មៅណេណា មួយកង់បានថ្លៃ១៣០រៀល និង​ស្មៅឃីងហ្គ្រាស់ មួយ​កង់​បាន​ថ្លៃ១០០រៀល ហើយលក់ក្នុង១ថ្ងៃ បានជាង៥០០បំពង់ ផងដែរ​៕

អត្ថបទ ៖ កញ្ញា វ៉ាត​