អគ្គនាយកដ្ឋាន​ពន្ធដារ​ប្រមូលពន្ធបាន ២,៧ពាន់លានដុល្លារ នៅឆ្នាំ ២០២១

ការប្រមូល​ចំណូលពន្ធ-អាកររបស់​អគ្គនាយកដ្ឋាន​ពន្ធដារ នៅឆ្នាំ ២០២១ សរុប​បានប្រមាណ​ជាង ២,៧ពាន់លាន​ដុល្លារ​ ស្មើនឹង​១២៤, ០២%​ ពោលគឺកើន​លើស​ផែនការ​ច្បាប់ហិរញ្ញវត្ថុ​ឆ្នាំ២០២១។​ កំណើន​លើសផែនការ​នៃការ​ប្រមូលពន្ធ​នេះ ​គឺដោយសារ​ការយកចិត្តទុក​ដាក់​របស់​មន្ត្រី ​ការអនុវត្ត​នូវប្រព័ន្ធ​គ្រប់គ្រង​លិខិត​ប្រកាសពន្ធ​លើប្រាក់​ចំណេញ​តាមអនឡាញ ​និងការ​ប្រកួតប្រជែង​ដោយស្មើភាពគ្នា​ក្នុង​ចំណោម​មជ្ឈដ្ឋាន​វិនិយោគក្នុង​ប្រទេស​កម្ពុជា។​ នេះបើតាមការបញ្ជាក់របស់លោក គង់ វិបុល​ អគ្គនាយក​នៃអគ្គនាយកដ្ឋានពន្ធដារ​។

ក្នុងរយៈពេលពេញមួយឆ្នាំ២០២១ កម្ពុជាសម្រេចបានចំណូលពន្ធ-អាករសរុបចំនួន ២៧៨១,៩២លានដុល្លារ  ស្មើនឹង១២៤,០២%។ យោងតាមរបាយការណ៍ស្តីពីលទ្ធផលការងារប្រមូលចំណូលពន្ធឆ្នាំ២០២១ និងទិសដៅការងារឆ្នាំ២០២២របស់អគ្គនាយកដ្ឋានពន្ធដារ បានបង្ហាញថា ចំនួននេះ គឺលើសផែនការឆ្នាំ២០២១ ចំនួន៥៣៨,៨៥លានដុល្លារ ស្មើ២៤ ,០២% ដែលអគ្គនាយកដ្ឋានបានកំណត់ប្រមូលចំណូលពន្ធចំនួនតែជាង២,២ពាន់លានដុល្លារ (២២៤៣,០៧លានដុល្លារ)ប៉ុណ្ណោះ។

ទោះបីជាលទ្ធផលប្រមូលពន្ធរបស់អគ្គនាយកដ្ឋានពន្ធដារក្នុងឆ្នាំ២០២១កន្លងទៅមានភាពប្រសើរច្រើនយ៉ាងណាក្តី ប៉ុន្តែបើធៀបជាមួយនឹងចំណូលពន្ធក្នុងរយៈពេលដូចកាលពីឆ្នាំ២០២០ គឺថយចុះប្រមាណជាង១០៧,០៩លានដុល្លារ ស្មើនឹង-៣,៧១% ខណៈទំហំចំណូលពន្ធក្នុងឆ្នាំ២០២០មានចំនួនជិត៣ពាន់លានដុល្លារ (២ ៨៨៩,០២ ​លាន​ដុល្លារ)។  

ចំណែកការប្រមូលពន្ធសម្រាប់ខែធ្នូឆ្នាំ២០២១ អគ្គនាយកដ្ឋានពន្ធដារសម្រេចបានចំនួនជាង២២១,៦៨លានដុល្លារ ស្មើនឹង៩ ៨៨% បើធៀបនឹងរយៈពេលដូចគ្នាក្នុងឆ្នាំ២០២០ គឺមានចំនួនជាង២៤០លានដុល្លារ៕ អត្ថបទ៖ ទួន សុផល