សម្ដេចតេជោ ហ៊ុន សែន ៖ ស្ថាប័នចំនួន ៣ កំពុងរៀបចំបង្កើត​គម្រោង ឧទ្យានសន្តិភាពមេគង្គ

សម្ដេចតេជោ ហ៊ុន សែន​​ នាយករដ្ឋមន្ត្រីនៃកម្ពុជា បានឲ្យដឹងថា ស្ថាប័នចំនួន ៣ បាននិងកំពុងរៀបចំបង្កើត​គម្រោងឧទ្យានសន្តិភាពមេគង្គ ដើម្បីបន្តលើកកម្ពស់សន្តិភាព និងវិបុលភាពនៅក្នុងតំបន់។

នៅក្នុងពិធីបើក កិច្ចប្រជុំកំពូលសន្តិភាពពិភពលោកឆ្នាំ ២០២២ ក្រោមមូលបទ «ឆ្ពោះទៅកាន់សន្តិភាពនៅឧបទ្វីបកូរ៉េ» នាព្រឹកថ្ងៃទី ១១ ខែកុម្ភៈនេះ សម្ដេតេជោនាយករដ្ឋមន្ត្រី បានបង្ហើបឲ្យដឹងថា ដើម្បីបន្តលើកកម្ពស់សន្តិភាព និងវិបុលភាពនៅក្នុងតំបន់ សហព័ន្ធសន្តិភាពសកល ដោយសហការជាមួយក្រុមប្រឹក្សាវប្បធម៌អាស៊ី និងវិទ្យាស្ថានចក្ខុវិស័យអាស៊ី ដែលមានមូលដ្ឋាននៅក្នុងប្រទេសកម្ពុជា កំពុងបង្កើត​គម្រោងឧទ្យានសន្តិភាពមេគង្គ។

សម្ដេចតេជោ ហ៊ុន សែន បានថ្លែងបន្តថា គម្រោងបង្កើតឧទ្យានសន្តិភាពមេគង្គ គឺក្នុងគោលបំណងបន្តលើកកម្ពស់តម្លៃ នៃវប្បធម៌សន្តិភាព កសាងមូលដ្ឋានគ្រឹះ នៃប្រព័ន្ធសន្តិភាព និងចងក្រងឯកសារ ព្រមទាំងចែករំលែកចំណេះដឹង អំពីសន្តិភាព ផងដែរ។

ជាមួយគ្នានេះ សម្ដេចតេជោនាយករដ្ឋមន្ត្រី បាន​បង្ហាញក្ដីសង្ឃឹមថា គម្រោងបង្កើតឧទ្យានសន្តិភាពមេគង្គ នឹងនាំមកនូវលទ្ធផលផ្កែផ្កា និងអត្ថន័យ៕

អត្ថបទ៖ ឃួន សុភ័ក្រ